21st Apr2022

ແຂວງ ໄຊຍະບູລີ ສ້າງແຜນກໍານົດພະນັກງານ ນໍາພາ-ຄຸ້ມຄອງ.

by somda phoneor

ກອງປະຊຸມ ສ້າງແຜນກໍານົດພະນັກງານ ນໍາພາ-ຄຸ້ມຄອງ ຂັ້ນສູນກາງຄຸ້ມຄອງຂອງແຂວງ ໄຊຍະບູລີ ໄດ້ໄຂຂຶ້ນໃນ ວັນທີ 21 ເມສາ ນີ້, ໂດຍການເປັນທານຂອງ ທ່ານ ພົງສະຫວັນ ສິດທະວົງ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງ ໄຊຍະບູລີ, ເຂົ້າຮ່ວມມີຮອງເລຂາພັກແຂວງ, ປະທານສະພາປະຊາຊົນແຂວງ, ກໍາມະການປະຈໍາພັກ, ກໍາມະການພັກແຂວງ, ມີຕາງໜ້າຄະນະຈັດຕັ້ງສູນກາງພັກ, ມີຫົວໜ້າພະແນກການ, ກົມກອງ, ລັດວິສາຫະກິດອ້ອມຂ້າງແຂວງ, ມີອາດີດການນໍາຂອງແຂວງ, ມີເລຂາພັກເມືອງ, ເຈົ້າເມືອງ ແລະ ຫົວໜ້າຄະນະຈັດຕັ້ງ 11 ເມືອງເຂົ້າຮ່ວມ.

ທ່ານ ພົງສະຫວັນ ສິດທະວົງ ໄດ້ກ່າວວ່າ: ໃນໄລຍະຜ່ານມາ ຄະນະປະຈໍາພັກແຂວງໄຊຍະບູລີ ແມ່ນໄດ້ເອົາໃຈໃສ່ນໍາພາສ້າງແຜນກຳນົດພະນັກງານນຳພາ-ຄຸ້ມຄອງນັບແຕ່ຂັ້ນບ້ານຂຶ້ນມາ. ໂດຍປະຕິບັດຕາມມະຕິຂອງກົມການເມືອງສູນກາງພັກ ແລະ ຄໍາແນະນໍາຂອງຄະນະຈັດຕັ້ງສູນກາງພັກຢ່າງເຂັ້ມງວດ, ເຮັດໃຫ້ວຽກງານຄຸ້ມຄອງພະນັກງານ ແລະ ວຽກງານສ້າງແຜນກຳນົດພະນັກງານນຳພາ-ຄຸ້ມຄອງ ເຫັນວ່າປະຕິບັດຖຶກຕ້ອງຕາມບາດກ້າວຂັ້ນຕອນ, ພາຍຫຼັງແຜນກໍານົດພະນັກງານຖຶກຮັບຮອງແລ້ວ ຄະນະພັກແຕ່ລະຂັ້ນ ກໍ່ໄດ້ເອົາໃຈໃສ່ປະຕິບັດໂດຍມີແຜນການກໍ່ສ້າງ-ບໍາລຸງ, ມີແຜນສັບຊ້ອນຈັດວາງ, ຄຸ້ມຄອງ ແລະ ຕິດຕາມກວດກາໃກ້ຊິດຕໍ່ການເຄື່ອນໄຫວປະຕິບັດໜ້າທີ່ວຽກງານ ທີ່ໄດ້ຮັບມອບໝາຍ ແລະ  ສົ່ງໄປກໍ່ສ້າງຢູ່ຮາກຖານ ເພື່ອຝຶກຝົນຫຼໍ່ຫຼອມພະນັກງານທີ່ຢູ່ໃນແຜນກໍານົດ. ໃນກອງປະຍັງໄດ້ພ້ອມກັນ ປະກອບຄໍາຄິດ-ຄໍາເຫັນຕໍ່ການສ້າງແຜນກຳນົດພະນັກງານນຳພາ-ຄຸ້ມຄອງ ຂັ້ນສູນກາງຄຸ້ມຄອງ; ຄົ້ນຄວ້າຊອກເປົ້າໝາຍບຸກຄະລາກອນ ເຂົ້າໃນການສ້າງແຜນກຳນົດພະນັກງານນຳພາ-ຄຸ້ມຄອງ ຂັ້ນສູນກາງຄຸ້ມຄອງຢູ່ແຂວງໄຊຍະບູລີ, ເພື່ອສ້າງໃຫ້ໄດ້ພະນັກງານນຳພາ-ຄຸ້ມຄອງ ຜູ້ທີ່ມີຄວາມຮູ້-ຄວາມສາມາດ, ມີຄຸນທາດການເມືອງໜັກແໜ້ນ ກໍ່ຄືມີຄວາມເຂັ້ມແຂງ, ໜັກແໜ້ນ, ເດັດດ່ຽວ, ມີຍຸດໂທບາຍທີ່ຄ່ອງແຄ້ວ, ນີ້ມນວນທີ່ສຸດ, ສາມາດຕອບສະໜອງກັບຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່, ພ້ອມດຽວກັນຍັງໄດ້ຮັບຟັງການສະຫຼຸບການຈັດຕັ້ງປະຕິບັດການສ້າງແຜນກຳນົດພະນັກງານນຳພາ-ຄຸ້ມຄອງ ຂັ້ນສູນກາງຄຸ້ມຄອງ ໃນໄລຍະ ປີ 2015-2020 ຜ່ານມາ ແລະ ຈະໄດ້ເຊື່ອມຊຶມເອກະສານສໍາຄັນອື່ນໆ.

 

Off

Comments are closed.