22nd Apr2022

ໂຄສະນາຜົນຮ້າຍຢາເສບຕິດ ໃຫ້ນ້ອງນັກຮຽນ ມສ ສິນໄຊ.

by somda phoneor

ໃນວັນທີ 21 ເມສາ 2022, ຢູ່ໂຮງຮຽນ ມັດທະຍົມສົມບູນ ສຶກສາ ສິນໄຊ ເມືອງຈັນທະບູລີ ນະຄອນຫຼວງວຽງຈັນ ໄດ້ຮັບຟັງການໂຄສະນາເຜີຍແຜ່ຜົນຮ້າຍ-ໄພອັນຕະລາຍຂອງ ຢາເສບຕິດ. ໂດຍ ພັທ ກົງຕາ ບຸດຕິຈັກ ຫົວໜ້າ ປກສ ກຸ່ມ 3 ສີສະຫວາດ ເປັນຜູ້ບັນຍາຍ, ມີ ທ່ານ ຈັນທະຄານ ລັດຕະນາ ຮອງຫ້ອງການສຶກສາ-ກິລາ ເມືອງຈັນທະບູລີ, ທ່ານ ນ. ອາລີ ພົນເສນາ ຜູ້ອຳນວຍການ ໂຮງຮຽນ ມສ ສິນໄຊ, ຄູອາຈານ ແລະ ນ້ອງນັກຮຽນເຂົ້າຮ່ວມ.

ພັທ ກົງຕາ ບຸດຕິຈັກ ໃຫ້ຮູ້ວ່າ: ການລົງໂຄສະນາຄັ້ງນີ້ ແນໃສ່ປູກຈິດສໍານຶກໃຫ້ນ້ອງນັກຮຽນ ມັດທະຍົມສົມບູນສຶກສາ ສິນໄຊ ຮັບຮູ້ ແລະ ເຂົ້າໃຈເຖິງຜົນຮ້າຍ-ໄພອັນຕະລາຍຂອງຢາເສບຕິດ ພ້ອມທັງແນະນໍາໃຫ້ນ້ອງນັກຮຽນ ເຂົ້າໃຈບັນຫາ ທີ່ຄວນເອົາໃຈໃສ່ ເພື່ອຫ່າງໄກຈາກຢາເສບຕິດ. ຕ້ອງເຝີກຝົນຫຼໍ່ຫຼອມຕົນເອງ ໃຫ້ມີຄວາມຮູ້ ແລະ ເປັນຄົນດີ, ເຄົາລົບນັບຖື, ເຊື່ອຟັງຄຳສັ່ງສອນຂອງພໍ່, ແມ່ ແລະ ບອກສອນຂອງຄູອາຈານ, ເປັນຄົນມີເຫດຜົນ, ມີຄວາມຄິດສ້າງສັນໄປໃນທາງທີ່ດີ , ກ້າວໜ້າໃນການດຳລົງຊີວິດ ຮູ້ຍາດເອົາກາລະໂອກາດສ້າງອານາຄົດ, ເມື່ອມີບັນຫາສ່ວນຕົວ ຫຼື ພາຍໃນຄອບຄົວ ກໍ່ບໍ່ຕ້ອງໄປພົວພັນກັບຢາເສບຕິດ, ບໍ່ໄປຂ້ອງກ່ຽວກັບການພະນັນຕ້ອງຫ້າມທຸກປະເພດ, ບໍ່ທ່ຽວເດິກ ຫຼື ໄປມົ້ວສຸມໃນສິ່ງທີ່ບໍ່ດີ, ປະຕິເສດຕໍ່ການຢາກຮູ້, ຢາກເຫັນ, ຢາກລອງ ເສບຢາເສບຕິດ ແລະ ຢຸດຕິການພົວພັນກັບກຸ່ມຄົນບໍ່ດີໂດຍເດັດຂາດ, ຄວນໃຊ້ເວລາຫວ່າງອອກກໍາລັງກາຍຫຼິ້ນກິລາ ຫລື ສີລະປະ ແລະ ສ້າງກິດຈະກໍາອື່ນໆທີ່ບໍ່ກ່ຽວພັນກັບສິ່ງເສບຕິດ.

Off

Comments are closed.