26th Apr2022

ລັດຖະມົນຕີ ກະຊວງຖະແຫຼງຂ່າວ ວັດທະນະທໍາ ແລະ ທ່ອງທ່ຽວ ຕ້ອນຮັບການເຂົ້າພົບປະຢ້ຽມຢາມຂອງ ຫົວໜ້າໂຄສະນາອົບຮົມສູນກາງພັກ ກອມມູນິດຫວຽດນາມ

by Peaung Thanonkeo

ໃນວັນທີ 25 ເມສາ 2022 ທ່ານ ນາງ ສວນສະຫວັນ ວິຍະເກດ ກໍາມະການສູນກາງພັກ ລັດຖະມົນຕີ ກະຊວງຖະແຫຼງຂ່າວ ວັດທະນະທໍາ ແລະ ທ່ອງທ່ຽວ ໄດ້ຕ້ອນຮັບການເຂົ້າພົບປະຢ້ຽມຢາມຂອງ ຄະນະຜູ້ແທນຂັ້ນສູງ ຄະນະໂຄສະນາອົບຮົມສູນກາງພັກ ກອມມູນີດຫວຽດນາມ ນໍາໂດຍ ທ່ານ ຫງວຽນຈ້ອງ ເງ້ຍ ເລຂາທິການສູນກາງພັກ ຫົວໜ້າຄະນະໂຄສະນາອົບຮົມສູນກາງພັກ ກອມມູນິດຫວຽດນາມ ພ້ອມດ້ວຍຄະນະ ເນື່ອງໃນໂອກາດທີ່ທ່ານເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ.

ໃນໂອກາດດັ່ງກ່າວ ທ່ານ ນາງ ສວນສະຫວັນ ວິຍະເກດ ໄດ້ຕີລາຄາສູງຕໍ່ການມາຢ້ຽມຢາມ ແລະ ເຮັດວຽກ ຂອງຄະນະໂຄສະນາອົບຮົມສູນກາງພັກ ກອມມູນິດຫວຽດນາມ ໃນຄັ້ງນີ້ ເຊີ່ງເປັນການຮັດແໜ້ນຄວາມສາມັກຄີ, ເສີມຂະຫຍາຍສາຍພົວພັນຮອບດ້ານ ລະຫວ່າງ ສອງພັກ-ສອງລັດ ກໍຄືປະຊາຊົນສອງຊາດ ລາວ-ຫວຽດນາມ ທີ່ມີມູນເຊື້ອມາແຕ່ດົນນານ, ເຊີ່ງການມາຢ້ຽມຢາມຂອງຄະນະໂຄສະນາອົບຮົມສູນກາງພັກ ກອມມູນິດຫວຽດນາມ ຍັງຢູ່ໃນທ່າມກາງທີ່ສອງພັກ-ສອງລັດ ກະກຽມຄວາມພ້ອມໃນການສະເຫຼີມສະຫຼອງ ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ ແລະ ວັນເຊັນສົນທິສັນຍາມິດຕະພາບ ລາວ-ຫວຽດນາມ ຄົບຮອບ 45 ປີ ທີ່ຈະໝູນວຽນມາຮອດໃນມໍ່ໆນີ້ໃຫ້ມີບັນຍາກາດຟົດຟື້ນ.

ຈາກນັ້ນ. ທ່ານ ຫງວຽນ ຈ໋ອງ ເງ້ຍ ໄດ້ສະແດງຄວາມຂອບໃຈຕໍ່ການຕ້ອນຮັບຂອງ ທ່ານລັດຖະມົນຕີກະຊວງຖະແຫຼງຂ່າວ ວັດທະນະທໍາ ແລະ ທ່ອງທ່ຽວ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ພ້ອມທັງລາຍງານຈຸດປະສົງຂອງການຢ້ຽມຢາມ ແລະ ເຮັດວຽກຢູ່ ສປປ ລາວ ໂດຍສະເພາະແມ່ນການພົບປະແລກປ່ຽນບົດຮຽນ ທາງດ້ານວຽກງານຖະແຫຼງຂ່າວ ວັດທະນະທໍາ ແລະ ທ່ອງທ່ຽວ ຂອງທັງສອງປະເທດ ທີ່ມີມາແຕ່ດົນນານ ເພື່ອສືບຕໍ່ຮ່ວມມືໃຫ້ການຊ່ວຍເຫຼືອເຊີ່ງກັນ ແລະ ກັນ ໃຫ້ມີການເຕີບໃຫຍ່ຂະຫຍາຍຕົວຂື້ນໄປເລື້ອຍໆ.

Off

Comments are closed.