26th Apr2022

ກຽມຄວາມພ້ອມ ສະຫລຸບຕີລາຄາວຽກງານ ກໍ່ສ້າງຮາກຖານການເມືືອງ ພັດທະນາຊົນນະບົດ, ການແຂງຂັນ-ຍ້ອງຍໍຮັກຊາດ ແລະ ພັດທະນາ

by Peaung Thanonkeo

ກອງປະຊຸມປຶກສາຫາລື ກຽມຄວາມພ້ອມຈັດກອງປະຊຸມສະຫລຸບຕີລາຄາວຽກງານກໍ່ສ້າງຮາກຖານການເມືືອງ, ພັດທະນາຊົນນະບົດ, ການແຂ່ງຂັນ-ຍ້ອງຍໍຮັກຊາດ ແລະ ພັດທະນາໃນໄລຍະຜ່ານມາ ແລະ ທິດທາງຕໍ່ໜ້າ ຈັດ​ຂຶ້ນ​ໃນ​ວັນ​ທີ 25 ​ເມສາ 2022 ນີ້ ພາຍໃຕ້ການເປັນປະທານຂອງ ທ່ານ ບຸນທອງ ຈິດມະນີ ກຳມະການກົມການເມືອງສູນກາງພັກ,ຜູ້ປະຈໍາການຄະນະເລຂາທິການສູນກາງພັກ,ຮອງປະທານປະເທດແຫ່ງ ສປປລາວ,ຫົວໜ້າຄະນະຮັບຜິດຊອບກະກຽມດຳເນີນການສະຫລຸບວຽການງານກໍ່ສ້າງຮາກຖານການເມືອງແລະພັດທະນາຊົນນະບົດ,ການແຂ່ງຂັນ-ຍ້ອງຍໍຮັກຊາດແລະພັດທະນາໂດຍມີຄະນະຮັບຜິດຊອບແລະພາກສ່ວນຊ່ວຍວຽກເຂົ້າຮ່ວມ.
ກອງປະຊຸມໄດ້ຮັບຟັງການລາຍງານຮ່າງຄໍາສັ່ງແນະນໍາຂອງຄະນະເລຂາທິການສູນກາງພັກກ່ຽວກັບການກະກຽມດຳເນີນກອງປະຊຸມດັ່ງກ່າວ,ຮ່າງມະຕິຕົກລົງວ່າດ້ວຍການແບ່ງຄວາມຮັບຜິດຊອບພາຍໃນຄະນະຊີ້ນຳການກະກຽມ,ຮ່າງແຜນດໍາເນີນງານການກະກຽມດໍາເນີນກອງປະຊຸມສະຫລຸບຕີລາຄາ ວຽກງານກໍ່ສ້າງຮາກຖານການເມືອງ,ພັດທະນາຊົນນະບົດ,ການແຂ່ງຂັນຍ້ອງຍໍ-ຮັກຊາດແລະ ພັດທະນາໄລຍະ5ປີຜ່ານມາແລະທິດທາງໃນຕໍ່ໜ້າພ້ອມທັງວຽກງານປິ່ນອ້ອມອື່ນໆ.
ໃນໂອກາດນີ້ ທ່ານ ບຸນທອງ ຈິດມະນີໄດ້ໃຫ້ທິດຊີ້ນຳກ່ຽວກັບ ການກະກຽມກອງປະຊຸມສະຫລຸບຕີລາຄາວຽກງານກໍ່ສ້າງຮາກຖານການເມືອງ,ພັດທະນາຊົນນະບົດ,ການແຂງຂັນຍ້ອງຍໍ-ຮັກຊາດແລະ ພັດທະນາໃນໄລຍະຜ່ານມາ ແລະ ທິດທາງຕໍ່ໜ້າ ໂດຍໄດ້ເນັ້ນໜັກໃຫ້ຄະນະຮັບຜິດຊອບແຕ່ລະພາກສ່ວນ ແຕ່ງຕັ້ງກອງເລຂາຊ່ວຍວຽກຂອງຕົນໃນການກະກຽມ  ແລະດໍາເນີນກອງປະຊຸມໃຫ້ມີເນື້ອໃນຄົບຖ້ວນ, ເລິກເຊິ່ງ ແລະ ມີປະສິດທິຜົນ, ໃຫ້ສ່ອງແສງໄດ້ສະພາວະຄວາມເປັນຈິງຢູ່ແຕ່ລະບ່ອນ, ພ້ອມທັງການສ້າງແຜນເຄື່ອນໄຫວ,ກໍານົດລະບອບຕິດຕາມ,ກວດກາ,ຊຸກຍູ້,ສະຫລຸບລາຍງານ ແລະ ເງື່ອນໄຂອື່ນໆ ແຕ່ນີ້ຮອດມື້ກອງປະຊຸມ,ກວດກາຄືນການຈັດຕັ້ງຜັນຂະຫຍາຍບັນດາມະຕິ,ຄໍາສັ່ງຂອງພັກ-ລັດໃນຂົງເຂດວຽກງານກໍ່ສ້າງຮາກຖານການເມືອງ,ພັດທະນາຊົນນະບົດ ວຽກງານ 3 ສ້າງ ແລະ ການປະຕິບັດຂໍ້ແຂ່ງຂັນຮັກຊາດ ແລະ ພັດທະນາ ໂດຍມອບໃຫ້ແຕ່ລະພາກ ສ່ວນຄື: ຫ້ອງວ່າການສູນກາງພັກ ໃຫ້ຮີບຮ້ອນອອກຮ່າງຄຳສັ່ງແນະນຳ ຂອງຄະນະເລຂາທິການສູນກາງພັກ ເພື່ອເປັນບ່ອນອີງ ແລະ ສ້າງຄວາມເປັນເອກະພາບໃນການຈັດຕັ້ງປະຕິບັດໃຫ້ແກ່ບັນດາອົງຄະນະພັກຢູ່ສູນກາງ ແລະ ທ້ອງຖິ່ນໄດ້ກະກຽມຄວາມ ພ້ອມເປັນຕົ້ນກະກຽມເອກະສານສະຫລຸບຕີລາຄາ ແລະ ບົດປະກອບຄຳເຫັນຕ່າງໆ ທີ່ຈະນຳມາຜ່ານໃນກອງປະຊຸມ ໂດຍມີການປະສານສົມທົບກັບກະຊວງກະສິກຳປ່າໄມ້,ກະຊວງປ້ອງກັນປະເທດແລະກະຊວງປ້ອງກັນຄວາມສະຫງົບ,ພ້ອມທັງເປັນເຈົ້າການສ້າງແຜນການເຄື່ອນໄຫວລົງຕິດຕາມເກັບກຳຂໍ້ມູນ ແລະ ແຜນການເຄື່ອນໄຫວທາບທາມເນື້ອໃນຢູ່ທ້ອງຖິ່ນ, ຫ້ອງວ່າການສຳນັກງານນາຍົກລັດຖະມົນຕີ ແລະ ກະຊວງພາຍໃນ ສຸມໃສ່ການກະກຽມເນື້ອໃນການສະຫລຸບຂະບວນການແຂ່ງຂັນຮັກຊາດ-ພັດທະນາ ໃນຂອບເຂດທົ່ວປະເທດ ປີ 2016-2020 ແລະ ທິດທາງແຜນການປີ 2021-2025,ກະຊວງພາຍໃນສະຫລຸບຕີລາຄາການຈັດຕັ້ງຜັນຂະຫຍາຍມະຕິເລກທີ076/ກມສພ,ໂດຍລົງເລິກການປັບປຸງລະບົບການຄຸ້ມຄອງບໍລິຫານຂັ້ນບ້ານ,ກະຊວງກະສິກຳ-ປ່າໄມ້ໃຫ້ສະຫລຸບຕີລາຄາການຈັດຕັ້ງຜັນຂະຫຍາຍຄໍາສັ່ງເລກທີ 097/ກມສພໂດຍເນັ້ນໃສ່ການຈັດຕັ້ງປະຕິບັດວຽກງານພັດທະນາຊົນນະບົດລົງເລິກວຽກງານການສ້າງບ້ານພັດທະນາ ​ແລະ ກະຊວງປ້ອງກັນປະເທດ,ກະຊວງປ້ອງກັນຄວາມສະຫງົບໃຫ້ກະກຽມບົດປະກອບຄວາມເຫັນກ່ຽວກັບການຕີລາຄາການຈັດຕັ້ງປະຕິບັດວຽກງານກໍ່ສ້າງຮາກຖານການເມືອງ,ພ້ອມທັງຮັບປະກັນວຽກງານປ້ອງກັນຄວາມສະຫງົບ,ຄວາມປອດໄພໃຫ້ແກ່ການດຳເນີນກອງປະຊຸມ, ສະຖານ ທີ່ພັກເຊົາຂອງຜູ້ແທນ ແລະ ອື່ນໆ.

ພ້ອມ​ນີ້ໃຫ້ບັນດາສະຫາຍໃນຄະນະຮັບຜິດຊອບຊີ້ນຳຕ້ອງໄດ້ເຊີດຊູຄວາມຮັບຜິດຊອບ,ສຸມສະຕິປັນຍາເຂົ້າໃນການນໍາພາ-ຊີ້ນໍາໃຫ້ມີຄວາມເປັນເອກະພາບກັນ,ເຮັດແນວໃດໃຫ້ບັນລຸຕາມຈຸດປະສົງ ແລະລະດັບຄາດໝາຍທີ່ວາງໄວ້ໂດຍສະເພາະແມ່ນເຮັດໃຫ້ກອງປະຊຸມທີ່ຈະຈັດຂຶ້ນໃນຕໍ່ໜ້ານີ້ສາມາດສະຫລຸບຕີລາຄາສະພາບຜ່ານມາ ແລະ ຄົ້ນຄິດຫາທາງອອກຊ່ວຍກັນຕໍ່ບັນຫາທີ່ຍັງຄົງຄ້າງ,ເຫັນແຈ້ງ ຫລາຍບັນຫາ ແລະ ວິທີການເຮັດຕົວຈິງ ເພື່ອແກ້ໄຂສິ່ງທີ່ຍັງບໍ່ໄປບໍ່ມາ,ຫາທາງອອກແກ້ໄຂບັນຫາຊ່ວຍຮາກຖານ ກໍຄື ການພັດທະນາໃຫ້ໄປຕາມທິດທາງທີ່ພັກເຮົາໄດ້ວາງໄວ້.

 

Off

Comments are closed.