26th Apr2022

ພິທີ ສະເຫຼີມສະຫຼອງວັນຊັບສິນທາງປັນຍາໂລກ

by Peaung Thanonkeo

ໃນວັນທີ 26 ເມສາ 2022, ກະຊວງອຸດສາຫະກຳ ແລະ ການຄ້າ ຮ່ວມກັບ ສູນກາງຊາວໜຸ່ມປະຊາຊົນປະຕິວັດລາວ ແລະ ມະຫາວິທະຍາໄລແຫ່ງຊາດ ໄດ້ຈັດພິທີ ສະເຫຼີມສະຫຼອງວັນຊັບສິນທາງປັນຍາໂລກ ວັນທີ 26 ເມສາ  ທີ່ ມະຫາວິທະຍາໄລແຫ່ງຊາດ ພາຍໃຕ້ຄໍາຂວັນ: “ຊັບສິນທາງປັນຍາ ແລະ ໄວໜຸ່ມ ສ້າງສັນສິ່ງໃໝ່ ເພື່ອອະນາຄົດທີ່ດີກວ່າ” ໂດຍການເປັນປະທານຂອງ  ປອ, ຄຳແພງ ໄຊສົມແພງ, ກໍາມະການສູນກາງພັກ, ລັດຖະມົນຕີກະຊວງອຸດສາຫະກຳ ແລະ ການຄ້າ, ມີທ່ານ ມອນໄຊ ລາວມົວຊົງ, ເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ຮສ ປອ ຮຸ່ງເພັດ ຈັນທະວົງ ຮອງອະທິການບໍດີ ມະຫາວິທະຍາໄລແຫ່ງຊາດ ແລະ ພະນັກງານຫຼັກແຫຼ່ງພາຍໃນກະຊວງ ອຸດສາຫະກຳ ແລະ ການຄ້າ, ສູນກາງຊາວໜຸ່ມປະຊາຊົນປະຕິວັດລາວ, ສະມາຄົມ ນັກທຸລະກິດ ໜຸ່ມ, ຄູອາຈານ ແລະ ນັກສຶກສາ ຂອງ ມະຫາວິທະຍາໄລແຫ່ງຊາດ ເຂົ້າຮ່ວມ .

ໃນໂອກາດດັ່ງກ່າວນີ້ ປອ ຄຳແພງ ໄຊສົມແພງ ໄດ້ກ່າວວ່າ:

 

ການສະເຫຼີມສະຫຼອງ ວັນດັ່ງກ່າວ ກໍ່ເພື່ອເປັນການເຜີຍແຜ່ ແລະ ສົ່ງເສີມໃຫ້ປະຊາຊົນລາວ ມີການ ສ້າງຜົນງານທາງດ້ານຊັບສິນທາງປັນຍາໃຫ້ຫຼາຍຂຶ້ນ, ທັງເປັນການກະຕຸກຊຸກຍູ້, ເສີມຂະຫຍາຍຫົວຄິດປະດິດສ້າງຫົວຄິດປະດິດແຕ່ງທາງດ້ານ ສິລະປະກຳ ແລະ ວັນນະກຳ, ການສ້າງເອກະລັກສະເພາະຂອງ ສິນຄ້າ ແລະ ການອອກແບບຜະລິດຕະພັນໃຫ້ໂດດເດັ່ນ, ການປັບປຸງພັນພືດໃໝ່ ໃຫ້ເໝາະສົມກັບຄວາມຕ້ອງການຂອງຜູ້ບໍລິໂພກ,ເພື່ອຍົກບົດບາດຄວາມສໍາຄັນ ແລະ ຄວາມສາມາດບົ່ມຊ້ອນອັນໃຫຍ່ຫຼວງ ຂອງໄວໜຸ່ມ ໂດຍສະເພາະ ໄວທີ່ພວມສຶກສາຮ່ຳຮຽນ ໃນຍຸກຂອງເສດຖະກິດດີຕອນ, ເຕັກໂນໂລຊີຂໍ້ມູນຂ່າວສານທີ່ພັດທະນາຢ່າງທັນສະໄຫມ ເຕົ້າໂຮມເປັນແຫຼ່ງລວມຂອງສະຕິປັນຍາ ແລະ ຄວາມຄິດສ້າງສັນ, ມຸມມອງໃໝ່, ຄວາມກະຕືລືລົ້ນໃນການຮຽນ, ທົດລອງການປະດິດສ້າງສິ່ງໃໝ່ໆ ເພື່ອກ້າວໄປສູ່ການສ້າງສັນນະວັດຕະກຳໃໝ່ໆໃຫ້ຫຼາຍຂຶ້ນເລື້ອຍໆ ໂດຍສະເພາະ ຢູ່ໃນຂັ້ນ ມະຫາວິທະຍາໄລ ໄວໜຸ່ມນັກສຶກສາ ແລະ ອາຈານ ໄດ້ມີການລິເລີ່ມບາດກ້າວພື້ນຖານຂອງການສ້າງສິ່ງປະດິດເຊັ່ນ: ສ້າງ ຫຸ່ນຍົນຈຳລອງໂປຼແກຼມຄອມພິວເຕີ, ພ້ອມນີ້ ກໍໄດ້ມີການສຶກສາຄົ້ນຄວ້າ ແລະ ເຜີຍແຜ່ຜົນການສຶກສາຄົ້ນຄວ້າດັ່ງກ່າວ ອອກສູ່ສັງຄົມ,ສຳລັບໄວໜຸ່ມຢູ່ໃນພາກທຸລະກິດ ກໍໄດ້ສ້າງສັນຜົນງານການອອກແບບແຟຊັ່ນ, ສ້າງສັນສິລະປະດົນດີ, ບົດເພງທີ່ມີ ຄວາມນິຍົມຊົມຊອບຢ່າງກວ້າງຂວາງທັງພາຍໃນ ແລະ ຕ່າງປະເທດ, ການຄົ້ນຄິດສ້າງໂປແກຣມຄອມພິລເດີ ແລະ ຊັບ ພລິເຄຊັນໃນໂທລະສັບມືຖື ເປັນຕົ້ນ: ແອັບບໍລິການລົດແທກຊີອອນໄລ ໂລກາ, ແຮນດີ ທີ່ເປັນແພຮດຟອມ ໃນການ ສົ່ງເສີມການສ້າງວຽກເຮັດງານທຳໃຫ້ແກ່ຄົນລາວ, ການຄ້າຂາຍ ແລະ ບໍລິການຕ່າງໆ ຜ່ານທາງອອນລາຍ ແລະ ອື່ນໆອີກ ຊຶ່ງເອື້ອອໍານວຍຄວາມສະດວກໃຫ້ແກ່ການດຳລົງຊີວິດຂອງສັງຄົມໃນຍຸກປະຈຸບັນ ແລະ ຊຸກຍູ້ໃຫ້ກັບການພັດທະນາ ເສດຖະກິດສັງຄົມຂອງ ສປປ ລາວ ໂດຍລວມ

ພາຍໃນງານ ບັນດາຜູ້ເຂົ້າຮ່ວມ ກໍ່ໄດ້ທ່ຽວຊົມ ຮ້ານວາງສະແດງສິນຄ້າ ແລະ ຜະລິດຕະພັນທີ່ຊາວຫນຸ່ມໄວຫນຸ່ມ ສະຖາບັນການສືກສາ ແລະ ບໍລິສັດຫ້າງຮ້ານ ຄົ້ນຄິດປະດິດຂື້ນ ເພື່ອຮັບໃຊ້ສັງຄົມ ແລະ ນຳມາສະແດງໃນຄັ້ງນີ້

Off

Comments are closed.