05th May2022

ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ຂອງສານປະຊາຊົນສູງສຸດ.

by somda phoneor

ຍ້ອນບັນຫາຢາເສບຕິດ ໄດ້ແຜ່ລະບາດຮ້າຍແຮງ ສົ່ງຜົນກະທົບຕໍ່ສຸຂະພາບ ແລະ ຊີວິດຂອງຊາວຫນຸ່ມຮຸ່ນສືບທອດ, ເປັນສາເຫດພາໃຫ້ເກີດປະກົດການຫຍໍ້ທໍ້ ແລະ ບັນຫາອາຊະຍາກໍາປະເພດຕ່າງໆ ເປັນການກົດຫນ່ວງຖ່ວງດຶງການພັດທະນາເສດຖະກິດ, ວັດທະນະທໍາ-ສັງຄົມ, ສົ່ງຜົນກະທົບຕໍ່ຄວາມຫມັ້ນຄົງທາງດ້ານການເມືອງ ແລະ ຄວາມເປັນລະບຽບຮຽບຮ້ອຍ-ປອດໄພຂອງສັງຄົມ.  ລັດຖະບານ ຈຶ່ງຖືເອົາການແກ້ໄຂບັນຫາຢາເສບຕິດ ເປັນວຽກງານບູລິມະສິດ, ຈໍາເປັນ, ຮີບດ່ວນ ເຊິ່ງໄດ້ຍົກໃຫ້ເປັນວາລະແຫ່ງຊາດ ເພື່ອສຸມທຸກກໍາລັງແຮງສັງລວມ ເຂົ້າໃສ່ການແກ້ໄຂບັນຫາສໍາຄັນ, ຈໍາເປັນ ແລະ ຮີບດ່ວນຂອງຊາດ ທີ່ໄດ້ສະສົມມາຫຼາຍປີ; ໂດຍສະເພາະແມ່ນບັນຫາຢາເສບຕິດ ຢູ່ໃນ ສປປ ລາວ ໃຫ້ຫຼຸດລົງຢ່າງຈະແຈ້ງ;  ພາຍໃນກໍານົດໄລຍະເວລາ ແຕ່ກາງປີ 2021 ຫາປີ 2023; ໂດຍຖືເອົາການແກ້ໄຂບັນຫາດັ່ງກ່າວເປັນຫນ້າທີ່, ພັນທະ ແລະ ຄວາມຮັບຜິດຊອບ ຂອງທຸກພາກສ່ວນໃນສັງຄົມ. ເຊິ່ງໃນນີ້ ສານປະຊາຊົນສູງສຸດ ໃນຖານະທີ່ເປັນອົງການຕຸລາການ ແລະ ເຮັດໜ້າທີ່ເປັນອົງການພິພາກສາ ຂອງ ສາທາລະນະລັດ ປະຊາທິປະໄຕ ປະຊາຊົນລາວ; ເພື່ອ​ດຳ​ເນີນ​ການ​ພິຈາລະ​ນາ​ຕັດສິນຄະດີ, ກວດກາຄຳຕັດສີນ ແລະ ຄຳພິພາກສາຂອງສານປະຊາຊົນຂັ້ນຕ່າງໆ ແລະ ສານທະຫານ ຕາມການກໍານົດຂອງລັດຖະທໍາມະນູນ. ກໍແມ່ນພາກສ່ວນໜຶ່ງທີ່ມີຄວາມຮັບຜິດຊອບໃນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ຕາມພາລະບົດບາດ, ສິດ ແລະ ໜ້າທີ່ຂອງຕົນ ຄື: ຄົ້ນຄວ້າສໍານວນຄະດີ ແລະ ການຕັດສິນພິພາກສາ ໃຫ້ມີຄວາມຖືກຕ້ອງ, ວ່ອງໄວ ແລະ ເປັນທໍາ; ສົ່ງຄໍາຕັດສິນຂອງສານທີ່ໃຊ້ໄດ້ຢ່າງເດັດຂາດ ໃຫ້ແກ່ຫນ່ວຍງານປະຕິບັດຄໍາຕັດສິນຂອງສານ  ກະຊວງຍຸຕິທໍາ ເພື່ອດໍາເນີນການຮິບຊັບສິນ ແລະ ປັບໃຫມ ກ່ຽວກັບຄະດີຢາເສບຕິດໃຫ້ຖືກຕ້ອງຕາມກົດຫມາຍ.

ສໍາລັບ ການປະກອບສ່ວນເຂົ້າໃນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ຂອງສານປະຊາຊົນສູງສຸດ ຕາມພາລະບົດບາດ, ສິດ ແລະ ໜ້າທີ່ຂອງຕົນ ໃນຕົວຈິງນັ້ນ; ທ່ານ ບຸນເຮັ່ງ ພິມມະນີວົງ ກໍາມະການຄະນະບໍລິຫານງານພັກ ສານປະຊາຊົນສູງສຸດ ຫົວໜ້າຄະນະສານອາຍາ ສານປະຊາຊົນສູງສຸດ ໄດ້ໃຫ້ສໍາພາດຕໍ່ສື່ມວນຊົນປ້ອງກັນຄວາມສະຫງົບ ເມື່ອບໍ່ດົນມານີ້ວ່າ:  ສໍາລັບອົງຄະນະພັກສານປະຊາຊົນສູງສຸດ ແມ່ນໄດ້ພ້ອມກັນຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ ຄັ້ງທີ IV ຂອງອົງຄະນະພັກຂັ້ນຂອງຕົນ, ເພື່ອຫັນເປັນແຜນດໍາເນີນງານລະອຽດ ແລະ ຈັດຕັ້ງຜັນຂະຫຍາຍ ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ເຊິ່ງນອນຢູ່ໃນຂອບເຂດສິດຂອງການດໍາເນີນຄະດີຕາມຂະບວນການຍຸຕິທໍາ;  ເນື່ອງຈາກ ບັນຫາຢາເສບຕິດ ແມ່ນປະກົດການຫຍໍ້ທໍ້ໃນສັງຄົມ ແລະ ເຊື່ອມໂຍງ ກັບອາດສະຍາກໍາຂ້າມຊາດ ເຊິ່ງໄດ້ກາຍເປັນບັນຫາລວມຂອງທຸກໆປະເທດໃນທົ່ວໂລກ ທີ່ຈະຕ້ອງໄດ້ເອົາໃຈໃສ່ ແລະ ຮ່ວມມືກັນຕ້ານ, ສະກັດກັ້ນ ແລະ ປາບປາມ ຢ່າງຈິ່ງຈັ່ງ; ປັດຈຸບັນ ສາມາດເວົ້າໄດ້ວ່າ ຢາເສບຕິດ ແມ່ນມີຄວາມເປັນອັນຕະລາຍຮ້າຍແຮງຕໍ່ສັງຄົມ, ເປັນໄພຄຸກຄາມ ແລະ ເປັນໄພຄົມຂູ່ ຕໍ່ລະບົບການພັດທະນາເສດຖະກິດ-ສັງຄົມ, ສະຖຽນລະພາບທາງດ້ານການເມືອງ ແລະ ຄວາມຫມັ້ນຄົງຂອງບັນດາປະເທດຕ່າງໆໃນທົ່ວໂລກ; ໂດຍສະເພາະ ສປປ  ລາວ ກໍເປັນປະເທດຫນຶ່ງ ທີ່ໄດ້ຮັບຜົນກະທົບຈາກບັນຫາຢາເສບຕິດນີ້ຫຼາຍພໍສົມຄວນ, ເນື່ອງຈາກວ່າ ສປປ ລາວ ເປັນປະເທດທີ່ມີຊາຍແດນຕິດກັບ 5 ປະເທດອ້ອມຂ້າງ ແລະ ເປັນປອນທີ່ມີຄວາມສ່ຽງສູງໃນການຂົນສົ່ງຢາເສບຕິດໄປຍັງປະເທດທີ 3. ຢາເສບຕິດ ແມ່ນບັນຫາທີ່ຂັດຂວາງ ແລະ ຖ່ວງດຶງການສ້າງສາພັດທະນາປະເທດຊາດ, ທັງມີຄວາມອັນຕະລາຍຢ່າງຮ້າຍແຮງຕໍ່ສັງຄົມ ແລະ ຕໍ່ພົນລະເມືອງລາວ. ສະນັ້ນ ພັກ-ລັດ ແມ່ນໃຫ້ຄວາມສໍາຄັນໃນການແກ້ໄຂ, ສະກັດກັ້ນ, ປ້ອງກັນຢ່າງຮອບດ້ານ ເພື່ອໃຫ້ບັນຫາດັ່ງກ່າວ ຫຼຸດລົງໄປເທື່ອລະກ້າວ; ດ້ວຍການນໍາໃຊ້ ມາດຕະການຈັດຕັ້ງປະຕິບັດຂອງແຕ່ລະຂະແຫນງການ-ຂົງເຂດຂັ້ນສູນກາງ ແລະ ທ້ອງຖິ່ນ; ພັກ-ລັດຖະບານ ໄດ້ເອົາໃຈໃສ່ຕໍ່ກັບສິ່ງທີ່ທ້າທາຍໃນການແກ້ໄຂຢາເສບຕິດ ເຊິ່ງແມ່ນຄວາມຈໍາເປັນພາວະວິໄສ ທີ່ບໍ່ອາດຈະປອຍປະລະເລີຍໄດ້ ຕ້ອງຖືເປັນວຽກງານທີ່ສໍາຄັນຂອງຊາດ, ມັນມີຄວາມຈໍາເປັນຮີບດ່ວນທີ່ຈະຕ້ອງໄດ້ແກ້ໄຂໃຫ້ທັນເວລາ ແລະ ເປັນຫນ້າທີ່ຄວາມຮັບຜິດຊອບຂອງທັງຫມົດ ທົ່ວພັກ, ລັດ, ກໍາລັງປະກອບອາວຸດ ແລະ ສັງຄົມ.

ໃສ່ສຽງ: ທ່ານ ບຸນເຮັ່ງ ( ສຽງປະກອບບົດ 01 ).

ຜ່ານການຈັດຕັ້ງປະຕິບັດພາລະບົດບາດຕົ້ນຕໍ່ຂອງສານປະຊາຊົນຕົວຈິງ ຕາມລັດຖະທໍາມະນູນ ແລະ ກົດຫມາຍ  ໃນການຕັດສິນ ຫຼື ພິພາກສາຄະດີ ກ່ຽວກັບຢາເສບຕິດ ເພື່ອໃຫ້ຄວາມເປັນທໍາແກ່ສັງຄົມ, ນໍາເອົາຜູ້ກະທໍາຜິດ ມາລົງໂທດ ແລະ ຫຼີກເວັ້ນການລົງໂທດຜູ້ທີ່ບໍ່ໄດ້ກະທໍາຜິດ; ສານປະຊາຊົນສູງສຸດ ໄດ້ເອົາໃຈໃສ່ຈັດຕັ້ງປະຕິບັດພາລະບົດບາດ ແລະ ຫນ້າທີ່ຄວາມຮັບຜິດຊອບຂອງຕົນຕາມກົດຫມາຍຢ່າງເຂັ້ມງວດ; ເຊິ່ງໃນໄລຍະ 3 ເດືອນຕົ້ນປີ 2022 ໄດ້ເອົາໃຈໃສ່ຊຸກຍູ້, ຕິດຕາມ, ກວດກາ ການແກ້ໄຂຄະດີກ່ຽວກັບຢາເສບຕິດຢູ່ສານຂັ້ນຕົ້ນ ລວມທັງຫມົດ ຈໍານວນ 664 ເລື່ອງ, ໃນນີ້ ມີຄະດີທີ່ໄດ້ຕັດສິນສໍາເລັດແລ້ວ ຈໍານວນ 574 ເລື່ອງ ເທົ່າກັບ 86,44 % ແລະ ຍັງສືບຕໍ່ ຈໍານວນ 90 ເລື່ອງ.

ໃສ່ສຽງ: ທ່ານ ບຸນເຮັ່ງ ( ສຽງປະກອບບົດ 02 ).

ທ່ານ ບຸນເຮັ່ງ ພິມມະນີວົງ ຍັງໄດ້ກ່າວອີກວ່າ:  ເພື່ອຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ແລະ ແຜນພັດທະນາລະບົບສານປະຊາຊົນ 5 ປີ ຄັ້ງທີ IV; ສານປະຊາຊົນສູງສຸດ ໄດ້ມີແຜນການໃນຕໍ່ຫນ້າຄື:  ປັບປຸງກົດຫມາຍ ແລະ ນິຕິກໍລຸ່ມກົດຫມາຍ ກ່ຽວກັບຢາເສບຕິດ ເພື່ອຮອງຮັບໃນການຈັດຕັ້ງວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ຂອງລັດຖະບານ ໄລຍະປີ 2021 ຫາ 2023. ອອກຄໍາແນະນໍາ ຂອງປະທານສານປະຊາຊົນສູງສຸດ ໃຫ້ເພີ່ມທະວີກຽວກັບການຕັດສີນ ແລະ ການພິພາກສາຄະດີຢາເສບຕິດ ໃຫ້ມີຄວາມວອງໄວ, ທັງຮັບປະກັນຄຸນນະພາບ; ສ້າງແຜນການແກ້ໄຂຄະດີອາຍາ ກ່ຽວກັບຢາເສບຕິດ ໃຫ້ໄດ້ 85% ຂອງຄະດີກ່ຽວກັບຢາເສບຕິດທີ່ເຂົ້າມາສານປະຊາຊົນທັງຫມົດ; ຍົກລະດັບຄວາມຮູ້, ຄວາມສາມາດຂອງບຸກຄະລາກອນ ໃນການປະຕິບັດຫນ້າທີ່ວຽກງານ; ໂດຍສະເພາະ ການຄົ້ນຄວ້າ, ການຕັດສີນ ແລະ ການພິພາກສາຄະດີຢາເສບຕິດ; ເກັບກໍາບັນຫາທີ່ຍຸ້ງຫຍາກ ແລະ ສະຖິຕິຄະດີອາຍາ ກ່ຽວກັບຢາເສບຕິດ ເພື່ອນໍາມາປັບປຸງແກ້ໄຂໃນຕໍ່ຫນ້າ ໃຫ້ທັນຕາມກໍານົດເວລາ; ເກັບກໍາຂຶ້ນບັນຊີຊັບສີນ, ພາຫະນະ ແລະ ເງິນ ຕາມຄໍາຕັດສີນ ຫຼື ຄໍາພິພາກສາຂອງສານ ທີ່ໃຊ້ໄດ້ຢ່າງເດັດຂາດແລ້ວ;  ລົງຕິດຕາມ, ຊຸກຍູ້ ແລະ ແນະນໍາການດໍາເນີນຄະດີອາຍາ ກ່ຽວກັບຢາເສບຕິດ ຢູ່ສານປະຊາຊົນທ້ອງຖິ່ນໃນຂອບເຂດທົ່ວປະເທດ; ແນໃສ່ເຮັດໃຫ້ການດໍາເນີນຄະດີມີຄວາມວ່ອງໄວ, ຮັບປະກັນຄວາມຖືກຕ້ອງທາງດ້ານກົດຫມາຍ ແລະ ຄວາມເປັນຈິງ, ປະສານສົມທົບກັບພາກສ່ວນທີ່ກ່ຽວຂ້ອງ ເພື່ອເຮັດໃຫ້ການດໍາເນີນຄະດີອາຍາ ກ່ຽວກັບຢາເສບຕິດ ໃຫ້ມີຄວາມຄົບຖ້ວນ, ຮອບດ້ານ ແລະ ພາວະວິໄວ ຕາມກົດຫມາຍ.

ເພື່ອເປັນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໃນຂອບເຂດທົ່ວປະເທດ ມີຜົນສໍາເລັດຕາມຄາດຫມາຍ. ທ່ານຫົວໜ້າຄະນະສານອາຍາ ສານປະຊາຊົນສູງສຸດ ຍັງໄດ້ຮຽກຮ້ອງມາຍັງ ການຈັດຕັ້ງພັກ-ລັດ, ການຈັດຕັ້ງສັງຄົມ ແລະ ປະຊາຊົນລາວທົ່ວປະເທດ ຈົ່ງໃຫ້ການຊ່ວຍເຫຼືອ, ໃຫ້ການຮ່ວມມື, ໃຫ້ການສະຫນັບສະຫນູນ ແລະ ເປັນຫູເປັນຕາຊ່ວຍລັດຖະບານ ໃນການຕ້ານ, ສະກັດກັ້ນ ແລະ ປາບປາມ ບັນຫາຢາເສບຕິດໃຫ້ຫມົດໄປຈາກ ສປປ ລາວ ແລະ ຊ່ວຍຕິດຕາມ, ລາຍງານການກະທໍາທີ່ບໍ່ຖືກຕ້ອງຕາມກົດຫມາຍຂອງບຸກຄົນ, ກຸ່ມຄົນ, ເຈົ້າຫນ້າທີ່ ແລະ ພະນັກງານ ທີ່ມີການພົວພັນກັບຢາເສບຕິດ ເພື່ອຈະໄດ້ແກ້ໄຂໃຫ້ທັນເວລາ.

 

 

 

Off

Comments are closed.