09th May2022

ຫົວຫນ້າກອງບັນຊາການ ປກສ ແຂວງ ບໍລິຄໍາໄຊລົງຢ້ຽມຢາມພົບປະໂອ້ລົມ ແລະ ໃຫ້ທິດຊີ້ນໍາກໍາລັງ ປກສ ເມືອງທ່າພະບາດ.

by somda phoneor

ວັນທີ 5 ພຶດສະພາ 2012 ນີ້ ພັນເອກ ກົງຈັນ ໄຊປັນຍາ ກໍາມະການພັກແຂວງ ເລຂາຄະ ບໍລິຫານພັກ ຫົວຫນ້າກອງບັນຊາການ ປກສ ແຂວງ ບໍລິຄໍາໄຊ ພ້ອມດ້ວຍຄະນະໄດ້ລົງຢ້ຽມຢາມພົບປະໂອ້ລົມ ແລະ ໃຫ້ທິດຊີ້ນໍາກໍາລັງ ປກສ ເມືອງ ທ່າພະບາດ, ເປັນກຽດຕ້ອນຮັບໂດຍ ພັນໂທ ດວງໄຊ ຈັນທະວົງໃສ ກໍາມະການພັກເມືອງ ເລຂາຄະນະພັກຮາກຖານ ຫົວຫນ້າກອງບັນຊາການ ປກສ ເມືອງ ທ່າພະບາດ ພ້ອມດ້ວຍຄະນະ, ມີບັນດາພະນັກງານຫຼັກແຫຼ່ງຂັ້ນບັນຊານໍາພາເຂົ້າຮ່ວມ.

ພັນໂທ ດວງໄຊ ຈັນທະວັງໂສ ຫົວຫນ້າກອງບັນຊາການ ປກສ ເມືອງ ທ່າພະບາດ ໄດ້ລາຍງານສະພາບ ຂອງເມືອງໂດຍຫຍໍ້ໃຫ້ທ່ານປະທານໄດ້ຮັບຊາບ ໃນໄລຍະຜ່ານມາກໍາລັງປ້ອງກັນຄວາມສະຫງົບເມືອງ ທ່າພະບາດທີ່ ສາມາດຍາດມາໄດ້. ຄະນະພັກກອງບັນຊາການ ປກສ ເມືອງໄດ້ຍຶດຫມັ້ນຫຼັກການນໍາພາຂອງພັກ ແລະ ສຸມໃສ່ ຫຼັກການ 3 ທິດນໍາ ເພື່ອເປັນທິດທາງໃນການຈັດຕັ້ງຜັນຂະຫຍາຍ ບັນດາມາດຕະການທີ່ກໍານົດໄວ້ໃນວາຣະແຫ່ງຊາດ ກໍ່ຄື: ຄວາມເດັດຂາດ, ຄວາມໂປ່ງໃສ ແລະ ຄວາມເປັນມືອາຊີບ, ຂອງກໍາລັງປ້ອງກັນຄວາມສະຫງົບເມືອງ ທັງນີ້ກໍ່. ເພື່ອເປັນການປຸກລະດົມ, ຂົນຂວາຍ ທຸກກໍາລັງແຮງໃນທົ່ວສັງຄົມ ເຂົ້າໃນການແກ້ໄຂບັນຫາປະກົດການຫຍໍ້ທໍ້ທີ່ເກີດ ຂື້ນ, ບັນຫາຢາເສບຕິດ ທີ່ລະບາດເປັນວົງກວ້າງ ແລະ ຮຸນແຮງໃຫ້ຫຼຸດລົງ, ສ້າງໃຫ້ສັງຄົມມີຄວາມສະຫງົບປອດໄພ, ມີຄວາມເປັນລະບຽບຮຽບຮ້ອຍ, ເຮັດໃຫ້ທົ່ວເມືອງມີຄວາມສະຫງົບ ເພື່ອແນ່ໃສ່ສະກັດກັ້ນການແຜ່ລະບາດຂອງຢາ ເສບຕິດໃຫ້ຫຼຸດຫນ້ອຍຖອຍລົງເປັນກ້າວໆ. ຈາກນັ້ນ ພັນໂທ ພັດທະນາ ວົງຄໍາສີ ຮອງຫົວຫນ້າຫ້ອງຕໍາຫຼວດ ປກສ ແຂວງ ທັງເປັນຄະນະຮັບຜິດຊອບໂຄງການຈັດຕັ້ງປະຕິບັດວາລະແຫ່ງຊາດ ກໍ່ໄດ້ຂື້ນອະທິບາຍໃນການຈັດຕັ້ງປະຕິບັດວາລະແຫ່ງຊາດໂດຍອີງໃສ່ແຜນກໍານົດໂຄງການ ໃຫ້ບັນລຸຕາມເປົ້າຫມາຍທີ່ວາງໄວ້.

ພັນເອກ ກົງຈັນ ໄຊປັນຍາ ກໍາມະການພັກແຂວງ ເລຂາຄະບໍລິຫານງານພັກ ຫົວຫນ້າກອງ ບັນຊາການ ປກສ ແຂວງ ບໍລິຄໍາໄຊ ກໍ່ໄດ້ໃຫ້ກຽດໂອ້ລົມພ້ອມທັງເນັ້ນຫນັກໃຫ້ຄະນະພັກ-ຄະນະບັນຊາ ກໍາລັງ ປກສ ເມືອງ ທ່າພະບາດ ທຸກສະຫາຍ ຈົ່ງພ້ອມກັນຈັດຕັ້ງປະຕິບັດ 4 ແຜນງານໃຫຍ່ ແລະ 41 ໂຄງການຂອງກະຊວງ ປກສ ວາງອອກ ພ້ອມທັງຕິດພັນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ດ້ວຍ ຄວາມຮັບຜິດຊອບສູງ, ຖືເປັນບູລິມະສິດອັນດັບຫນຶ່ງໃນການແກ້ໄຂບັນຫາປະກົດການຫຍໍ້ທໍ້ໃນສັງຄົມ, ທ່ານຍັງ ຮຽກຮ້ອງມາຍັງຄະນະພັກຄະນະບັນຊາຕ້ອງມີຄວາມສາມັກຄີຢ່າງ ແຫນ້ນແຟ້ນພ້ອມກັນເຮັດວຽກງານສຶກສາອົບຮົມ ການເມືອງ-ແນວຄິດໃຫ້ແກ່ພະນັກງານ-ນັກຮົບໃຫ້ເປັນປົກກະຕິຕໍ່ເນື່ອງ, ໄກ້ສິດຕິດແທດ ຊີ້ນໍາບັນດາເລົ່າລົບວິຊາ ສະເພາະ, ປກສ ກຸ່ມບ້ານໃຫ້ຕັດສິນໃຈສູງໃນການປະຕິບັດວຽກງານຕ່າງໆ ມີຄວາມຊື່ສັດບໍລິສຸດ, ບໍ່ສວາຍໃຊ້ຫນ້າ ທີ່ຕໍາແຫນ່າ, ດໍາເນີນຄະດີຕໍ່ຜູ້ກະທໍາຜິດຢ່າງຖືກຕ້ອງ, ພາວະວິໄສ, ຍຸດຕິທໍາ, ສືບຕໍ່ປັບປຸງສ້າງຄອບຄົວ ແລະ ບ້ານ ປ້ອງກັນຄວາມສະຫງົບດີໃຫ້ໄດ້ຮ້ອຍສ່ວນຮ້ອຍ ເພື່ອເຮັດໃຫ້ພາຍໃນເມືອງທ່າພະບາດ ຮັບປະກັນໄດ້ຄວາມສະຫງົບ ແລະ ຄວາມເປັນລະບຽບຮຽບຮ້ອຍ, ກາຍເປັນເມືອງປອດຢາເສບຕິດຢ່າງສິ້ນເຊີງ.

Off

Comments are closed.