09th May2022

ປະທານສະພາແຫ່ງຊາດ ເຄື່ອນໄຫວ ຢ້ຽມຢາມ ແລະ ເຮັດວຽກ ຢູ່ແຂວງສາລະວັນ.

by somda phoneor

ໃນວັນທີ 6 ພຶດສະພາ 2022ນີ້  ທ່ານ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ໄດ້ລົງເຄື່ອນໄຫວ ແລະ ເຮັດວຽກ ຮ່ວມກັບຄະນະພັກແຂວງ,ຄະນະປະຈໍາສະພາ ປະຊາຊົນແຂວງ,ອົງການປົກຄອງ ແຂວງສາລະວັນ ເພື່ອຮັບຟັງການລາຍງານ ການພັດທະນາ ເສດຖະກິດ-ສັງຄົມ,ການຈັດຕັ້ງປະຕິບັດ 2 ວາລະແຫ່ງຊາດ ແລະ ວຽກງານສຳ ຄັນອື່ນໆ.

ໂອກາດດັ່ງກ່າວ ທ່ານ ໄຊສົມພອນ ພົມວິຫານ ໄດ້ມີບາງຄຳຄິດເຫັນຊີ້ນຳ ໃຫ້ຄະນະພັກແຂວງ,ສະພາປະຊາຊົນແຂວງ, ອົງການປົກຄອງແຂວງ ເພີ່ມທະວີຄວາມເອົາໃຈໃສ່ ຮັກສາຄວາມສະຫງົບ ໃຫ້ແກ່ແຂວງຂອງຕົນ,ຈັດຕັ້ງຜັນຂະຫຍາຍແນວທາງ ປ້ອງກັນຊາດ-ປ້ອງກັນ ຄວາມສະຫງົບ ທົ່ວປວງຊົນຮອບດ້ານ ຢ່າງທົ່ວເຖິງ ແລະ ເລິກເຊິ່ງ, ສ້າງ ແລະ ປັບປຸງຕາໜ່າງ ປ້ອງກັນຊາດ-ປ້ອງກັນ ຄວາມສະຫງົບ ຢູ່ທ້ອງຖິ່ນຮາກຖານ ໃຫ້ເຂັ້ມແຂງ, ໜັກແໜ້ນ, ສະກັດກັ້ນ ອາຊະຍາກໍາຕ່າງໆ ຢ່າງທັນການ, ເດັດຂາດ ແລະ ເຂັ້ມງວດ,ເອົາໃຈໃສ່ການຄຸ້ມຄອງຄົນຕ່າງປະເທດໃຫ້ເຂັ້ມງວດຕາມກົດໝາຍ, ເພີ່ມທະວີການນໍາພາ ຂະແໜງການທີ່ ກ່ຽວຂ້ອງຂອງແຂວງ ຄົ້ນຄວ້າວາງແຜນ ແລະ ຈັດແບ່ງເຂດ ການຜະລິດກະສິກໍາ ເປັນສິນຄ້າ ໃຫ້ມີຄວາມເໝາະສົມ,ທັງຄົ້ນຄວ້າກໍານົດ ທ່າແຮງບົ່ມຊ້ອນ ທາງດ້ານການ ຜະລິດກະສິກໍາ ຂອງແຂວງ ເພື່ອສຸມທຶນຮອນ,ເຕັກນິກວິຊາການ ເຂົ້າໃສ່ການຜະລິດ ເປັນສິນຄ້າຂອງປະຊາຊົນເປັນຕົ້ນການປູກເຂົ້າ,ກາເຟ,ໝາກແໜ່ງ,ໄມ້ໃຫ້ໝາກ,ການປູກໄມ້ອຸດສາຫະກໍາ,ການປູກຜັກປອດສານພິດ,ການປຸງແຕ່ງ ຜະລິດຕະພັນກະສິກໍາ,ການຫຸ້ມຫໍ່,ການລ້ຽງສັດໃຫຍ່ ເປັນສິນຄ້າເພື່ອສ້າງອາຊີບ ແລະ ລາຍຮັບອັນໝັ້ນຄົງ ໃຫ້ພໍ່ແມ່ປະຊາຊົນ, ສ້າງຄອບຄົວຕົວແບບຂອງການຜະລິດໃຫ້ເພີ່ມຂຶ້ນ, ສົ່ງເສີມການຜະລິດ ກະສິກໍາເປັນກຸ່ມ, ເປັນຟາມ ເພື່ອຂະຫຍາຍຖານ ການຜະລິດໃຫ້ເຕີບໃຫຍ່ ແລະ ມີຜົນຜະລິດຈໍານວນຫລາຍ,ມີທ່າແຮງໃນການເຂົ້າເຖິງແຫລ່ງທຶນ ແລະ ການເຂົ້າເຖິງຕະຫລາດ ທີ່ມີປະສິດທິພາບ.

ສິ່ງສຳຄັນ ແຂວງສາລະວັນຈະຕ້ອງໄດ້ເອົາໃຈໃສ່ນໍາພາ ໃນການປົກປັກຮັກສາ ແລະ ພັດທະນາແຫລ່ງທ່ອງທ່ຽວ ໃຫ້ມີຄວາມຍືນຍົງ,ເອົາໃຈໃສ່ຊຸກຍູ້ສົ່ງເສີມ ການຜະລິດເປັນສິນຄ້າ ຂອງປະຊາຊົນ ຕິດພັນກັບການ ທ່ອງທ່ຽວໃຫ້ມີຄວາມກົມກຽວ ແລະ ຊຸກຍູ້ສົ່ງເສີມເຊິ່ງກັນ ແລະ ກັນ, ພ້ອມກັນ ພັດທະນາຢ່າງບໍ່ຢຸດຢັ້ງ,ເອົາໃຈໃສ່ການພັດທະນາຊັບພະຍາກອນມະນຸດໃຫ້ສອດຄ່ອງກັບຄວາມຮຽກຮ້ອງຕ້ອງການ ຂອງການພັດທະນາ, ສາມາດສ້າງວຽກເຮັດງານທໍາໃຫ້ແກ່ຊາວໜຸ່ມ ທີ່ເປັນກໍາລັງແຮງງານ, ເອົາໃຈໃສ່ການສຶກສາອົບຮົມ ແລະ ຮຽນຮູ້ມູນເຊື້ອ ຄວາມສາມັກຄີປອງດອງ, ນໍ້າໃຈຮັກຊາດ ແລະ ເສຍສະຫລະ ເພື່ອຜົນປະໂຫຍດສ່ວນລວມ, ສ້າງສະຕິເຄົາລົບກົດໝາຍ, ການປະຕິບັດພັນທະຂອງປະຊາຊົນ.

ນອກຈາກນີ້,ໃຫ້ແຂວງປຸກລະດົມ,ຂົນຂວາຍຊາວໜຸ່ມຫັນມາເປັນເຈົ້າຂອງກິດຈະການຂະໜາດນ້ອຍ,ຂະໜາດກາງເຮັດການຜະລິດກະສິກໍາ, ປັບປຸງລະບົບກົງຈັກການຈັດຕັ້ງ ແລະ ການເຄື່ອນໄຫວຂອງອົງການອໍານາດລັດຢູ່ແຂວງ ໃຫ້ມີປະສິດທິພາບ,ແກ້ໄຂສະພາບການຊໍ້າຊ້ອນ ດ້ານພາລະບົດບາດໃຫ້ຈະແຈ້ງ ແລະ ຮັດກຸມ, ເຮັດໃຫ້ກົງຈັກກະທັດຮັດເປັນລະບົບໂລ່ງລ່ຽນ, ສະກັດກັ້ນການນໍາໃຊ້ສິດ,ອໍານາດໃນທາງທີ່ບໍ່ຖືກກົດໝາຍຂອງເຈົ້າໜ້າທີ່ຂອງລັດທຸກຂັ້ນ, ສ້າງເງື່ອນໄຂອໍານວຍຄວາມສະດວກ ໃຫ້ແກ່ປະຊາຊົນ ສາມາດເຂົ້າເຖິງ ຂະບວນການຍຸຕິທໍາ ເຮັດໃຫ້ຄວາມເຊື່ອໝັ້ນ ຂອງປະຊາຊົນ ຕໍ່ພັກ-ລັດດີ ຂຶ້ນເລື່ອຍໆ, ສ້າງເງື່ອນໄຂໃຫ້ອົງການແນວລາວສ້າງຊາດ, ອົງການຈັດຕັ້ງມະຫາຊົນ ໄດ້ເຄື່ອນໄຫວປະຕິບັດໜ້າທີ່ວຽກງານຂອງຕົນ ຕາມກົດໝາຍກໍານົດຢ່າງມີປະສິດທິພາບ ເພື່ອສຶກສາອົບຮົມບັນດາຊັ້ນຄົນໃຫ້ມີຄວາມສາມັກຄີປອງດອງ, ຕື່ນຕົວ ແລະ ເປັນເຈົ້າການເຂົ້າຮ່ວມພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ.

Off

Comments are closed.