11th May2022

ກະຊວງ ປກສ ລົງໂຄສະນາເຜີຍແຜ່ການຈັດຕັ້ງຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດແຕ່ ປີ 2021-2023

by somchan

ກະຊວງປ້ອງກັນຄວາມສະຫງົບລົງໂຄສະນາເຜີຍແຜ່ບັນດາເອກະສານກ່ຽວກັບການຈັດຕັ້ງຜັນຂະຫຍາຍວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດແຕ່ ປີ 2021-2023 ຢູ່ສະຫະພັນນັກຮົມເກົ່າແຫ່ງຊາດລາວ,ໃນວັນທີ 10 ພຶດສະພາ 2022ນີ້, ໂດຍການໃຫ້ກຽດເຜີຍແຜ່ ຂອງ ພົນໂທ ກົງທອງ ພົງວິຈິດ ກໍາມະການສູນກາງພັກ, ຮອງລັດຖະມົນຕີກະຊວງປ້ອງກັນຄວາມສະຫງົບ ໃຫ້ກຽດເຂົ້າຮ່ວມຮັບຟັງມີ ພົນໂທ ແສງນວນ ໄຊຍະລາດ ປະທານສະຫະພັນນັກຮົບເກົ່າແຫ່ງຊາດລາວ,ມີຄະນະພັກ,ພະນັກງານຫຼັກແຫຼ່ງ,ພັກນັກງານລັດຖະກອນກົມກອງອ້ອມຂ້າງສະຫະພັນນັກຮົບເກົ່າແຫ່ງຊາດລາວແລະຄະນະຮັບຜິດຊອບເຂົ້າຮ່ວມ.

ພົນໂທ ກົງທອງ ພົງວິຈິດ ກໍາມະການສູນກາງພັກ,ຮອງລັດຖະມົນຕີກະຊວງປ້ອງກັນຄວາມສະຫງົບໄດ້ກ່າວວ່າ:ວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ແມ່ນການສຸມທຸກກໍາລັງແຮງສັງລວມ ເຂົ້າໃສ່ ການແກ້ໄຂບັນຫາສໍາຄັນ,ຈໍາເປັນ ແລະ ຮີບດ່ວນຂອງຊາດ ທີ່ໄດ້ສະສົມມາຫຼາຍປີໃຫ້ຫຼຸດລົງຢ່າງຈະແຈ້ງ ໃນ ກໍານົດເວລາທີ່ແນ່ນອນ ໂດຍຖືເອົາການແກ້ໄຂບັນຫາດັ່ງກ່າວເປັນໜ້າທີ່,ພັນທະ ແລະ ຄວາມຮັບຜິດຊອບ ຂອງທຸກພາກສ່ວນໃນສັງຄົມແລະໃຫ້ຮັບປະກັນໄດ້ 3 ຫຼັກການພື້ນຖານຄື່:ເດັດຂາດ,ໂປ່ງໃສແລະຄວາມເປັນມືອາຊີບ,ເຊິ່ງຈຸດປະສົງຄາດໝາຍກໍ່ເພື່ອ ປຸກລະດົມ, ຂົນຂວາຍທຸກກໍາລັງແຮງສັງລວມ ເຂົ້າໃນການແກ້ໄຂບັນຫາຢາເສບຕິດ ທີ່ລະບາດເປັນວົງກວ້າງ ແລະ ຮຸນແຮງ ໃຫ້ຫຼຸດລົງຢ່າງຈະແຈ້ງ ໃນກໍານົດເວລາທີ່ແນ່ນອນເພື່ອແກ້ໄຂສາເຫດ ແລະ ເງື່ອນໄຂພາໃຫ້ເກີດບັນຫາຢາເສບຕິດ,  ສ້າງໃຫ້ສັງຄົມມີຄວາມສະຫງົບ, ມີຄວາມເປັນລະບຽບຮຽບຮ້ອຍ-ຄວາມປອດໄພ, ສ້າງເງື່ອນໄຂໃນການສ້າງສາພັດທະນາເສດຖະກິດ,ວັດທະນະທໍາ-ສັງຄົມ,ກ້າວໄປສູ່ສັງຄົມລາວປອດຢາເສບຕິດໃຫ້ໄດ້ໃນທີ່ສຸດ,ເພີ່ມທະວີການ ໂຄສະນາ-ສຶກສາອົບຮົມ, ເຜີຍແຜ່ລະບຽບກົດຫມາຍ ແລະ ຜົນຮ້າຍຈາກຢາເສບຕິດດ້ວຍຫຼາຍຮູບຫຼາຍສີຫຼາຍວິທີການ ຢ່າງກວ້າງຂວາງ ແລະ ທົ່ວທຸກແຂວງ, ທຸກເມືອງ ກວມເອົາ 80% ຂຶ້ນໄປຂອງຈໍານວນບ້ານເປົ້າຫມາຍທັງຫມົດຢູ່ແຕ່ລະເມືອງ ແລະ ສ້າງບ້ານ, ໂຮງຮຽນ, ສະຖານບັນ ການສຶກສາ, ສໍານັກງານ-ອົງການປອດຢາເສບຕິດ ໃຫ້ໄດ້ຫຼາຍຂຶ້ນ ແລະ ສ້າງຫຼັກສູດການຮຽນການສອນກ່ຽວກັບການປ້ອງກັນ, ສະກັດກັ້ນບັນຫາຢາເສບຕິດ, ຍົກສູງປະສິດທິພາບ ອົງການສືບສວນ-ສອບສວນ, ອົງການໄອຍະການປະຊາຊົນ, ອົງການສານປະຊາຊົນ, ອົງການປະຕິບັດຄໍາຕັດສິນຂອງສານ ແລະ ວຽກງານວິຊາສະເພາະກວດກາ, ຄວບຄຸມ, ສະ ກັດກັ້ນ ແລະ ແກ້ໄຂບັນຫາຢາເສບຕິດ ຢ່າງເປັນລະບົບ ແລະ ເຂັ້ມແຂງ.

ພ້ອມນີ້ຍັງໄດ້ເຜີຍແຜ່ຄໍາສັ່ງຂອງກົມການເມືອງສູນກາງພັກວ່າດ້ວຍເພີ່ມທະວີການນໍາພາ-ຊີ້ນຳຂອງຄະນະພັກແຕ່ລະຂັ້ນຕໍ່ການສະກັດກັ້ນແລະແກ້ໄຂບັນຫາຢາເສບຕິດ,ຄໍາສັ່ງກ່ຽວກັບການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ2021-2023ແລະມະຕິກອງປະຊຸມສະໄໝວິສາມັນເທື່ອທີ 1 ຂອງສະພາແຫ່ງຊາດຊຸດທີ 9 ວ່າດ້ວຍການຮັບຮອງເອົາວາລະຊາດແຫງວ່າດ້ວຍການແກ້ໄຂບັນຫາຢາເສບຕິດແຕ່ປີ 2021-2023ແລະເອກະສານສໍາຄັນອື່ນໆ.

 

Off

Comments are closed.