11th May2022

ການຈັດຕັ້ງປະຕິບັດວ່າລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດໄລຍະທີ1 ຢູ່ 3 ແຂວງພາກເໜືອ.

by somchan

ກອງປະຊຸມສະຫຼຸບຖອດຖອນບົດຮຽນການຈັດຕັ້ງປະຕິບັດວ່າລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດໄລຍະທີ1 ແລະ ວາງທິດທາງແຜນການໄລຍະທີ2 ຢູ່ 3 ແຂວງພາກເໜືອ ໄດ້ຈັດຂື້ນໃນທ້າຍອາທິດທີ່ຜ່ານມາ ທີ່ກອງບັນຊາການປ້ອງກັນຄວາມສະຫງົບ ແຂວງໄຊຍະບູລີ ເປັນກຽດເຂົ້າຮ່ວມເປັນປະທານໂດຍທ່ານ ພົຕ ວັນທອງ ກອງມະນີ ກໍາມະການສູນກາງພັກ, ຮອງລັດຖະມົນຕີ, ຫົວໜ້າກົມໃຫຍ່ການເມືອງ ກະຊວງປ້ອງກັນຄວາມສະຫງົບ, ມີບັນດາຄະນະພັກ, ຄະນະນໍາກະຊວງ, ກົມໃຫຍ່, ຫົວໜ້າກອງບັນຊາການ ປກສ ແຂວງ 3 ແຂວງ ຄື: ແຂວງ ໄຊຍະບູລີ, ຫຼວງພະບາງ ແລະ ກອງບັນຊາການ ປກສ ແຂວງວຽງຈັນ, ພ້ອມດ້ວຍນາຍຕໍາຫຼວດ ຈາກກອງບັນຊາການ ປກສ ແຂວງ, ກອງບັນຊາການ ປກສ ເມືອງ 11 ຕົວເມືອງອ້ອມຂ້າງແຂວງໄຊຍະບູລີເຂົ້າຮ່ວມ.

ພັອ ປອ ບົວພັນ ຟອງມະນີ ຮອງຫົວຫນ້າກົມໃຫຍ່, ຫົວໜ້າກົມຕໍາຫຼວດສະກັດກັ້ນ ແລະ ຕ້ານຢາເສບຕິດ ກົມໃຫຍ່ຕຳຫຼວດກະຊວງປ້ອງກັນຄວາມສະຫງົບ, ທັງເປັນອານຸກໍາມະການກອງເລຂາການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ກໍໄດ້ຂື້ນຜ່ານບົດສະຫຼຸບການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ (2021-2023) (ໄລຍະທີ1 ແຕ່ເດືອນ ກໍລະກົດ 2021 ຫາ ເດືອນມີນາ 2022) ໃນນີ້, ຕະຫຼອດໄລຍະຜ່ານມາ ເຈົ້າໜ້າທີ່ກຳລັງປ້ອງກັນຄວາມສະຫງົບ ຂັ້ນສູນກາງ ແລະ ທ້ອງຖິ່ນ ໄດ້ຍົກສູງຄວາມຮັບຜິດຊອບຂອງຕົນໃນການເຄື່ອນໄຫວວຽກງານວິຊາສະເພາະດ້ວຍຄວາມຈູງຈ້າວຫ້າວຫັນ ແລະ ສາມາດແກ້ໄຂມ້າງລາຍຄະດີຢາເສບຕິດ ໃນຂອບເຂດທົ່ວປະເທດ ນັບແຕ່ ເດືອນກໍລະກົດ 2021 ຫາ ເດືອນພຶດສະພາ2022 ມີທັງໝົດ 3.815 ເລື່ອງ, ຈັບຜູ້ຖືກຫາໄດ້ 5.395 ຄົນ, ຍິງ 547 ຄົນ, ຕ່າງປະເທດ 122 ຄົນ, ຍິງ 08 ຄົນ, ໄດ້ຍຶດຂອງກາງຢາເສບຕິດ: ປະເພດຢາບ້າ 176.473.522 ເມັດ, ຢາໄອສ໌ 3.709,83 ກິໂລກຣາມ, ເຮໂຣອິນ 170,85 ກິໂລກຣາມ, ໂຄເຄນ 1,20 ກຣາມ, ຢາຝິ່ນ 6 ກິໂລກຣາມ, ກັນຊາ 6.539,46 ກິໂລກຣາມ, ຢາອີ 0,08 ກິໂລກຣາມ, ແປ້ງຝຸ່ນປະສົມຢາເສບຕິດ 13.344,86 ກິໂລກຣາມ, ເຄຕາມິນ 3 ກິໂລກຣາມ, ແປ້ງຝຸ່ນຄ້າຍຄືເຄຕາມິນ 27,4 ກຣາມ, ຄາເຟອິນ 168 ກຣາມ, ນ້ຳຢາເຄມີ 10 ກິໂລກຣາມ, ຍຶດລົດໃຫຍ່ 135 ຄັນ, ລົດຈັກ 686 ຄັນ. ຄຽງຄູ່ກັບຜົນງານທີ່ກ່າວມາຂ້າງເທິງນັ້ນ ຄະນະຮັບຜິດຊອບກຽ່ວກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ກໍຍັງໄດ້ເອົາໃຈໃສ່ເຮັດວຽກງານລົງໂຄສະນາເຜີຍແຜ່ບັນດາເອກະສານ, ນິຕິກຳຕ່າງໆ ທີ່ກ່ຽວຂ້ອງກັບວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ໃຫ້ແກ່ຄະນະພັກ-ຄະນະນຳອົງການປົກຄອງແຂວງ 3 ແຂວງ ຈົນສຳເລັດ. ຜ່ານການລົງໂຄສະນາເຜີຍແຜ່ເອກະສານດັ່ງກ່າວເຫັນໄດ້ວ່າຜູ້ທີ່ເຂົ້າຮ່ວມຮັບຟັງມີຄວາມຮັບຮູ້, ເຂົ້າໃຈ ແລະ ເຫັນໄດ້ເຖີງຄວາມຈໍາເປັນຮີບດ່ວນໃນການແກ້ໄຂບັນຫາຢາເສບຕິດ, ສ້າງໄດ້ແຜນຈັດຕັ້ງຜັນຂະຫຍາຍຢູ່ຂັ້ນທ້ອງຖີ່ນ ແລະ ຂະແຫນງການຂອງຕົນ.

ພ້ອມດຽວກັນນັ້ນ ກອງປະຊຸມຍັງໄດ້ຮັບຟັງການປະກອບຄຳເຫັນຂອງບັນດາກອງບັນຊາການ ປກສ ແຂວງ 3 ແຂວງ ໃນການປະຕິບັດຫນ້າທີ່ວິຊາສະເພາະໃນໄລຍະຜ່ານມາ ຢ່າງກົງໄປ-ກົງມາ  ເພື່ອເປັນການຖອດຖອນບົດຮຽນ ບັນດາຈຸດອ່ອນ, ຂໍ້ຄົງຄ້າງ ເພື່ອນຳມາຄົ້ນຄວ້າວາງທິດທາງແຜນ ການໃນການປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ໃນໄລຍະທີ 2 ໃຫ້ມີຄວາມວ່ອງໄວ ທັນສະໄໝ ແລະ ປະສິດຕິພາບດີຂຶ້ນກວ່າເກົ່າ.

ໂອກາດນີ້ ພົຕ ວັນທອງ ກອງມະນີ ໄດ້ຍ້ອງຍໍຊົມເຊີຍຕໍ່ຄະນະພັກ-ຄະນະບັນຊາ ທັງ 3 ແຂວງ ທີ່ຍາມໃດກໍໄດ້ມີຄວາມເອົາໃຈໃສ່ຊີ້ນຳ-ນຳພາໃນການຫັນເອົາເນື້ອໃນຂອງວາລະແຫ່ງຊາດມາເປັນແຜນວຽກອັນລະອຽດ ແລະໄດ້ແຕ່ງຕັ້ງຄະນະຮັບຜິດຊອບສະເພາະ ເພື່ອຈັດຕັ້ງປະຕິບັດເຮັດໃຫ້ວຽກງານດັ່ງກ່າວ ມີການເຄື່ອນໄຫວທີ່ຖືກຕ້ອງ, ຮັບປະກັນໄດ້ຄວາມສະຫງົບ, ຄວາມເປັນລະບຽບຮຽບຮ້ອຍ. ພ້ອມນີ້ທ່ານຍັງໄດ້ເນັ້ນຫນັກໃຫ້ ບັນດາຄະນະພັກ, ຄະນະບັນຊາແຕ່ລະຂັ້ນ ສືບຕໍ່ເອົາໃຈໃສ່ເຮັດວຽກໂຄສະນາສືກສາອົບຮົມວຽກງານການເມືອງແນວຄິດ, ເຜີຍແຜ່ເຊື່ອມຊຶມບັນດາມະຕິ, ຄຳສັ່ງ ແລະ ແຈ້ງການ ໃຫ້ແກ່ພະນັກງານ-ນັກຮົບ, ພໍ່ແມ່ປະຊາຊົນ ທີ່ຢູ່ໃນຄວາມຮັບຜິດຊອບຂອງຕົນໄດ້ຮັບຮູ້ແລະເຂົ້າໃຈຢ່າງເລິກເຊີ່ງ ຕໍ່ແນວທາງນະໂຍບາຍຂອງພັກ-ລັດ, ເພື່ອສ້າງທັດສະນະແນວຄິດທີ່ໜັກແໜ້ນ, ຍົກສູງຄວາມເປັນເຈົ້າການ, ມີຄວາມຊື່ສັດບໍລິສຸດຕໍ່ຕົນເອງ ແລະ ຕໍ່ປະເທດຊາດ, ມີຄວາມຮັບຜິດຊອບສູງຕໍ່ຫນ້າວຽກງານທີ່ໄດ້ຮັບການມອບໝາຍ, ປຸກລະດົມປະຊາຊົນ ໃຫ້ມີສ່ວນຮ່ວມໃນການປະກອບສ່ວນເຂົ້າໃນວຽກງານປ້ອງກັນຊາດ-ປ້ອງກັນຄວາມສະຫງົບ ເພື່ອຕ້ານ ແລະ ສະກັດກັ້ນປະກົດການຫຍໍ້ທໍ້ຕ່າງໆ ທີ່ຈະເກີດຂື້ນເວົ້າລວມ ເວົ້າສະເພາະກໍ່ຄືບັນຫາຢາເສບຕິດ ເຮັດແນວໃດເພື່ອໃຫ້ມັນຫຼຸດຫນ້ອຍຖອຍລົງ ເຮັດໃຫ້ສັງຄົມມີຄວາມສະຫງົບ, ຄວາມເປັນລະບຽບ ຮຽບຮ້ອຍ.

ນອກນີ້ ພົຕ ວັນທອງ ກອງມະນີ ກໍາມະການສູນກາງພັກ, ຮອງລັດຖະມົນຕີ, ຫົວໜ້າກົມໃຫຍ່ການເມືອງ ກະຊວງປ້ອງກັນຄວາມສະຫງົບ ພ້ອມຄະນະ ກໍຍັງໄດ້ເຄື່ອນໄຫວຢຽ້ມຢ້າມ, ຊີ້ນໍາວຽກງານວິຊາສະເພາະ ຢູ່ຄ້າຍຄຸມຂັງດັດສ້າງ ແລະ ໂຮງຮຽນ ປກສ ຊັ້ນຕົ້ນເລກ2 ແຂວງໄຊຍະບູລີ ຕື່ມອີກ.

ນອກນີ້ ກອງບັນຊາການ ປກສ ເມືອງຊຳເໜືອ ໄດ້ຈັດກອງປະຊຸມ ການຈັດຕັ້ງປະຕິບັດ ວຽກງານວາລະແຫ່ງຊາດ ການແກ້ໄຂບັນຫາຢາເສບຕິດ ປະຈຳ ໄຕມາດ I   ແລະ ວາງທິດທາງແຜນການ ປະຈໍາ ໄຕມາດ II ປີ 2022 ຢູ່ທີ່ສະໂມສອນກອງບັນຊາການ ປກສ ເມືອງຊຳເໜືອ ໂດຍການເປັນປະທານຂອງ ພັທ ໄມສິງ ຄຳສຸບັດ ຄະນະປະຈຳພັກເມືອງ ຫົວໜ້າກອງບັນຊາການ ປກສ ເມືອງຊຳເໜືອ,ໃຫ້ກຽດເຂົ້າຮ່ວມຂອງທ່ານ ທອນສຸກ ເພັດວິນຍານ ຮອງເລຂາພັກ ເມືອງຊຳເໜືອ,ມີຄະນະພັກ-ຄະນະບັນຊາ, ບັນດາຫົວໜ້າຫ້ອງການ ອ້ອມຂ້າງເມືອງ ຕະຫຼອດຮອດພະນັກງານ-ນັກຮົບ ປກສ ເມືອງຊຳເໜືອເຂົ້າຮ່ວມ.

ພັທ ໄມບຸນ ພົມມະຈັນ ຮອງຫົວໜ້າກອງບັນຊາການ ປກສ ເມືອງຊຳເໜືອ ໄດ້ຜ່ານບົດສະຫຼຸບ ການຈັດຕັ້ງປະຕິບັດ ວຽກງານວາລະແຫ່ງຊາດ ການແກ້ໄຂບັນຫາຢາເສບຕິດ ປະຈຳ ໄຕມາດ I   ແລະ ວາງທິດທາງແຜນການ ປະຈໍາ ໄຕມາ II ປີ 2022 ໃນ 03 ເດືອນຜ່ານມາ. ສາມາດມ້າງຄະດີຢາເສບຕິດ ໄດ້ທັງໝົດ 7 ເລື່ອງ,  ກັກຕົວຕ້ອງຫາ 7 ຄົນ, ຍິງ 1 ຄົນ, ຢຶດຂອງກາງປະເພດ ຢາບ້າ ໄດ້ຈຳນວນ 20,561ເມັດ,ຢາຝິ່ນຈຳນວນ 1,1 ກິໂລກະຣາມ,ປືນແກັບ 3 ກະບອກ,ໂທລະສັບ 6 ໜ່ວຍ, ເງີນກີບ 8,080,000 ກີບ,ລົດຈັກ 1 ຄັນ,ລົດໃຫ່ຍ 1 ຄັນ, ໄດ້ສຸ່ມໃສ່ສຶກສາອົບຮົມ ແລະ ນຳຕົວຜູ້ທີ່ຕິດຢາເສບຕິດ ເຂົ້າໄປບໍາບັດຢູ່ສູນ ຈຳນວນ 6 ຄົນ, ສົມທົບກັບ ປກສ ກຸ່ມບ້ານ ປະເມີນບ້ານປອດຢາເສບຕິດ ຮອບວຽນ 1,2,3 ໄດ້ 6 ບ້ານ. ສົມທົບກັບກຳລັງ ປກຊ ເມືອງ, ປກສ ກຸ່ມບ້ານ ແລະ ອຳນາດການປົກຄອງບ້ານລົງກວດກາທຳລາຍສວນຝິ່ນມີ ກຸ່ມຫ້ວຍມ້າ 2 ບ້ານ ຄື: ບ້ານຫ້ວຍມ້າ ແລະ ບ້ານກໍໄຮ ມີເນື້ອທີ່ທັງໝົດ 24 ເຮັກຕາ,ກຸ່ມຫົວຊຽງມີ 1 ບ້ານຄື: ບ້ານຄັງ, ມີເນື້ອທີ່ທັງໝົດ 26 ເຮັກຕາ,ລວມເນື້ອທີ່ທັງໝົດ 50 ເຮັກຕາ.ໃນຕອນທ້າຍກອງປະຊຸມ ທ່ານ ທອນສຸກ ເພັດວິນຍານ ຮອງເລຂາພັກ ເມືອງຊຳເໜືອ ໜັ້ນໜັກໃຫ້ຄະນະນຳແຕ່ລະຂັ້ນຕ້ອງເປັນເຈົ້າການເອົາໃຈໃສ່ໃນການສຶກສາອົບຮົມການເມືອງແນວຄິດ ເພື່ອເຮັດໃຫ້ພະນັກງານ-ນັກຮົບ,ພໍ່ແມ່ປະຊາຊົນບັນດາເຜົ່າຮັບຮູ້ເຖີງຜົນຮ້າຍຂອງຢາເສບຕິດ,ຮຽກຮ້ອງໃຫ້ທຸກພາກສ່ວນຕ້ອງເປັນເຈົ້າການຊ່ວຍກັນຮ່ວມມືກັບເຈົ້າໜ້າທີ່ ເພື່ອພ້ອມກັນແກ້ໄຂບັນຫາຢາເສບຕິດໃຫ້ລຸດໜ້ອຍຖອຍລົງ ເພື່ອເຮັດໃຫ້ສັງຄົມມີຄວາມສະຫງົບປອດໄພ.

 

Off

Comments are closed.