12th May2022

ກັກຕົວຜູ້ຖືກຫາ ພ້ອມຂອງກາງຢາບ້າ 7.637 ເມັດ.

by somchan

ໃນຄັ້ງວັນທີ 5 ເມສາ 2022 ເຈົ້າໜ້າທີ່ ຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ເມືອງທ່າໂທມ ແຂວງໄຊສົມບູນ ໄດ້ຮັບແຫຼ່ງຂ່າວຈາກພົນລະເມືອງດີວ່າ ມີການເຄື່ອນໄຫວຂອງກຸ່ມເປົ້າໝາຍຄ້າ-ຂາຍຢາເສບຕິດ (ປະເພດຢາບ້າ) ເຈົ້າໜ້າທີ່ໄດ້ວາງແຜນລົງຕິດຕາມເປົ້າໝາຍດັ່ງກ່າວ ຈຶ່ງພົບເຫັນທ້າວໜໍປໍຈັ້ງ ອາຍຸ 50 ປີ, ປະຊາຊົນບ້ານໄຊຈະເລີນ, ເມືອງທ່າໂທມ, ແຂວງໄຊສົມບູນ ກຳລັງຂັບຂີ່ລົດຈັກອອກມາຈາກຈຸດເປົ້າໝາຍ ເຈົ້າໜ້າທີ່ຈຶ່ງໄດ້ລັດກວດຄົ້ນຕົວຜູ້ກ່ຽວພົບເຫັນຢາບ້າທີ່ຊຸກເຊື່ອງໄວ້ໃນຂາໂສ້ງຈຳນວນ 40 ເມັດ ແລ້ວນຳຕົວຜູ້ກ່ຽວມາດຳເນີນການສືບສວນ-ສອບສວນ ຜ່ານການສືບສວນ-ສອບສວນ ຜູ້ກ່ຽວຮັບສາລະພາບວ່າ: ໃນໄລຍະຜ່ານມາຕົນໄດ້ເຄື່ອນໄຫວຄ້າ-ຂາຍຢາບ້າ ແລະ ຢາບ້າ ຈຳນວນ 40 ເມັດແມ່ນຂອງຜູ້ກ່ຽວແທ້, ຢາບ້າທີນຳມາຂາຍ ແລະ ເສບແຕ່ລະຄັ້ງແມ່ນຊື້ນຳທ້າວເຈ້ຍກົວຢ່າງ ອາຍຸ 55 ປີ, ປະຊາຊົນບ້ານພຽງສະຫວາດ ແລະ ທ້າວ ຈັນເຢີຢ່າງ ຢູ່ບ້ານໄຊຈະເລີນ, ເມືອງທ່າໂທມ, ແຂວງໄຊສົມບູນເປັນຈຳນວນຫຼາຍຄັ້ງ.

ພາຍຫຼັງທີ່ໄດ້ຮັບການຊັກທອດຂອງທ້າວໜໍປໍຈັ້ງ ຕົກມາຮອດວັນທີ 29 ເມສາ 2022 ເຈົ້າໜ້າທີ່ ປກສ ເມືອງໄດ້ສົມທົບກັບອົງການໄອຍະການປະຈຳເມືອງທ່າໂທມ ແລະ ອຳນາດການປົກຄອງບ້ານພຽງສະຫວາດ ລົງກວດຄົ້ນເຄຫາສະຖານ(ເຮືອນ) ຂອງທ້າວເຈ້ຍກົວຢ່າງ ຈິ່ງພົບເຫັນຢາບ້າຈຳນວນ 29 ຖົງເທົ່າກັບ 5.624 ເມັດ ແລະ ເຄື່ອງຂອງກາງທີ່ພົວພັນກັບຄະດີຈຳນວນໜຶ່ງ ເຈົ້າໜ້າທີ່ຈຶ່ງໄດ້ກັກຕົວທ້າວເຈ້ຍກົວຢ່າງ ອາຍຸ 55 ປີ, ແລະ ທ້າວ ກົວຢ່າງ ອາຍຸ 24 ປີ ຜູ້ເປັນລູກ. ໃນວັນດຽວກັນ ເຈົ້າໜ້າທີ່ໄດ້ສົມທົບກັບອົງການໄອຍະການ ແລະ ອຳນາດການປົກຄອງບ້ານໄຊຈະເລີນ ເພື່ອລົງກວດຄົ້ນເຮືອນຂອງທ້າວຈັນເຢີຢ່າງ ຜ່ານການກວດຄົ້ນພົບເຫັນຢາບ້າ ຈຳນວນ 10 ຖົງ ເທົ່າກັບ 2016 ເມັດພ້ອມເງິນສົດ 19.085.000 ກີບ ແລະ ເຄື່ອງຂອງກາງທີ່ພົວພັນກັບຄະດີຈຳນວນໜຶ່ງ ເຈົ້າໜ້າທີ່ຈິ່ງກັກຕົວນາງເກຍວ່າງ ອາຍຸ 42 ປີ (ເມຍຂອງທ້າວຈັນເຢີຢ່າງ) ສ່ວນທ້າວຈັນເຢີຢ່າງແມ່ນເອົາຕົວລົບໜີ. ຈາກນັ້ນ, ເຈົ້າໜ້າທີ່ຈິ່ງໄດ້ນຳຕົວພວກກ່ຽວມາດຳເນີນການສືບສວນ-ສອບສວນ. ຜ່ານການສືບສວນ-ສອບສວນພວກກ່ຽວທັງ 04 ຮັບສາລະພາບວ່າ: ໄລຍະຜ່ານມາໄດ້ເຄື່ອນໄຫວຄ້າ-ຂາຍຢາເສບຕິດ ແລະ  ຢາບ້າຈຳນວນດັ່ງກ່າວແມ່ນຂອງພວກກ່ຽວແທ້. ສ່ວນທ້າວຈັນເຢີຢ່າງທີ່ເອົາຕົວລົບໜີນັ້ນ ປັດຈຸບັນທາງເຈົ້າໜ້າທີ່ກຳລັງຊອກນຳຈັບຕົວມາດຳເນີນຕາມກົດໝາຍ.

 

 

Off

Comments are closed.