13th May2022

ພິທີປະກາດ ບ້ານສາມກາງ ເມືອງແບງ ແຂວງອຸດົມໄຊ ເປັນບ້ານປ້ອງກັນຊາດເຂັ້ມແຂງ

by Peaung Thanonkeo

ພິທີປະກາດຮັບຮອງເອົາ ບ້ານສາມກາງ ເມືອງແບງ ແຂວງອຸດົມໄຊ ເປັນບ້ານປ້ອງກັນຊາດເຂັ້ມແຂງບ້ານທີ 3 ຂອງເມືອງ, ໄດ້ຈັດຂຶ້ນໃນວັນທີ 12 ພຶດສະພາ 2022 ນີ້ ຢູ່ສະໂມສອນຂອງບ້ານດັ່ງກ່າວໂດຍໃຫ້ກຽດເຂົ້າຮ່ວມຂອງ ທ່ານ ສົມຄິດ ກັນສະນິດ ກຳມະການພັກແຂວງ ເລຂາພັກເມືອງ ເຈົ້າເມືອງໆເເບງ ປະທານປ້ອງກັນຊາດ-ປ້ອງກັນຄວາມສະຫງົບຂັ້ນເມືອງ, ມີ  ພັນໂທ ບຸນເລື່ອນ ວັນນະສອນ ກຳມະການພັກເມືອງ ຫົວໜ້າການທະຫານກອງບັນຊາການທະຫານເມືອງແບງມີ ສະຫາຍ ຊັ້ນ ເຮືອງເພັດໄຊ ເລຂາພັກບ້ານ ນາຍບ້ານບ້ານສາມກາງ, ມີຄະນະພັກ-ຄະນະບັນຊາ 2 ກອງບັນຊາການທະຫານຕຳຫຼວດ, ພະແນກການກ່ຽວຂ້ອງ ອຳນາດການປົກຄອງບ້ານ,ປະຊາຊົນ ແລະ ແຂກຖືກເຊີນເຂົ້າຮ່ວມ.

ພັນໂທ ໄມ່ແພງ ພູມປະເສີດ ຫົວໜ້າການເມືອງ ກອງບັນຊາການທະຫານເມືອງແບງ ໄດ້ຜ່ານບົດສະຫຼຸບຕີລາຄາຜົນສຳເລັດການຈັດຕັ້ງປະຕິບັດສ້າງຄອບຄົວ ແລະ ບ້ານປ້ອງກັນຊາດເຂັ້ມແຂງໃນໄລຍະຜ່ານມາ ເຊິ່ງໄດ້ຮັບຜົນສຳເລັດຕາມລະດັບຄາດໝາຍທີ່ວາງໄວ້ ບ້ານສາມກາງ ປະກອບ ມີ 301 ຄອບຄົວ, ມີພົນລະເມືອງທັງໝົດ 1,042 ຄົນ,ຍິງ 541 ຄົນ, ຜ່ານການປະເມີນກວດກາຕົວຈິງສາມາດຮັບຮອງເອົາຄອບຄົວປ້ອງກັນຊາດເຂັ້ມແຂງໄດ້199 ຄອບຄົວ ເທົ່າກັບ 90%, ຈາກນັ້ນ ກໍໄດ້ຜ່ານຂໍ້ຕົກລົງຂອງກອງບັນຊາການທະຫານແຂວງອຸດົມໄຊ ແລະ ຂໍ້ຕົກລົງຂອງກອງບັນຊາການທະຫານເມືອງ ວ່າດ້ວຍການຢັ້ງຢືນ ແລະ ຮັບຮອງເອົາບ້ານສາມກາງ ເປັນບ້ານປ້ອງກັນຊາດເຂັ້ມແຂງ, ພ້ອມທັງມອບໃບຢັ້ງຢືນຄອບຄົວ ແລະບ້ານປ້ອງກັນຊາດເຂັ້ມແຂງໃຫ້ບ້ານດັ່ງກ່າວ.

ທ່ານ ສົມຄິດ ກັນສະນິດ ກຳມະການພັກແຂວງ ເລຂາພັກເມືອງ ເຈົ້າເມືອງໆເເບ່ງ ປະທານປ້ອງກັນຊາດ-ປ້ອງກັນຄວາມສະຫງົບຂັ້ນເມືອງ, ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຜົນສຳເລັດທີ່ບັນດາສະຫາຍຍາດມາໄດ້, ພ້ອມທັງເນັ້ນໜັກໃຫ້ເອົາໃຈໃສ່ເພີ່ມທະວີສຶກສາອົບຮົມການເມືອງນໍາພາແນວຄິດໃຫ້ພໍ່ແມ່ປະຊາຊົນພາຍໃນບ້ານເຮັດໃຫ້ເຂົາເຈົ້າມີຄວາມຕື່ນຕົວສູງໃນການປະຕິບັດຕາມແນວທາງນະໂຍບາຍຂອງພັກ, ກົດໝາຍຂອງລັດ, ເສີມຂະຫຍາຍສິດເປັນເຈົ້າ ຮັກບ້ານເກີດເມືອງນອນຂອງຕົນ, ເອົາໃຈໃສ່ຊຸກຍູ້ການຜະລິດແບບທຳມະຊາດໄປສູ່ການຜະລິດເປັນສີນຄ້າ ແລະ ບໍລິການ ເຮັດໃຫ້ຊີວິດການເປັນຢູ່ຂອງປະຊາຊົນຫຼຸດພົ້ນອອກຈາກຄວາມທຸກຍາກໃຫ້ໄດ້, ປັບປຸງກຳລັງກອງຫຼອນໃຫ້ມີຄວາມເຂັ້ມແຂງໃນທຸກດ້ານເປັນເສນາທິການໃນການເຄື່ອນໄຫວຕ້ານ ແລະແກ້ໄຂປະກົດການຫຍໍ້ທໍ້ຕ່າງໆ ສາມາດປົກປັກຮັກສາເຂດນໍ້າແດນດີນ, ເຮັດໃຫ້ບ້ານມີຄວາມສະຫງົບ, ສັງຄົມມີຄວາມເປັນລະບຽບຮຽບຮ້ອຍຂື້ນເປັນກ້າວໆ.

Off

Comments are closed.