13th May2022

ແຂວງອຸດົມໄຊ ປະກາດແຕ່ງຕັ້ງຫົວໜ້າຫ້ອງການ ປກຊ-ປກສ

by Peaung Thanonkeo

ໃນຕອນເຊົ້າຂອງວັນທີ 13 ພຶດສະພາ 2022 ນີ້ ຢູ່ທີຫ້ອງປະຊຸມຫ້ອງວ່າການປົກຄອງແຂວງອຸດົມໄຊ ໄດ້ຈັດຕັ້ງພິທີປະກາດແຕ່ງຕັ້ງຫົວໜ້າຫ້ອງການປ້ອງກັນຊາດ – ປ້ອງກັນຄວາມສະຫງົບ ແຂວງອຸດົມໄຊ, ໂດຍການເປັນປະທານຂອງທ່ານ ບຸນຄົງ ຫຼ້າຈຽມພອນ ກຳມະການສຳຮອງ ສູນກາງພັກ ເລຂາພັກແຂວງ ເຈົ້າແຂວງ ປະທ່ານປ້ອງກັນຊາດ – ປ້ອງກັນຄວາມສະຫງົບແຂວງອຸດົມໄຊ, ມີກຳມະການ ປ້ອງກັນຊາດ – ປ້ອງກັນຄວາມສະຫງົບແຂວງ, ພະແນກການທີ່ກ່ຽວຂ້ອງອ້ອມຂ້າງແຂວງ, ເມືອງ, ຄະນະພັກ-ຄະນະບັນຊາສອງກອງບັນຊາການທະຫານ-ຕໍາຫຼວດ, ແຂກເຊີນເຂົ້າຮ່ວມ.

ພັນເອກ ທອງບຸນ ຂຸນລະພິດ ຮອງຫົວໜ້າ ຄະນະກຳມະການປ້ອງກັນຊາດ-ປ້ອງກັນຄວາມສະຫງົບສູນກາງ ໄດ້ຜ່ານຂໍ້ຕົກລົງຂອງຄະນະກໍາມະການປກຊ-ປກສ ສູນກາງ ວ່າດ້ວຍການແຕ່ງຕັ້ງຫົວໜ້າຫ້ອງການ ກຳມະການປ້ອງກັນຊາດ-ປ້ອງກັນຄວາມສະຫງົບແຂວງອຸດົມໄຊຜູ້ໃໝ່ ໂດຍ ຕົກລົງແຕ່ງຕັ້ງ  ພັນໂທ ວຽງໄຊ ຍົມມະລາ ຄະນະພັກກອງບັນຊາການ ຮອງຫົວໜ້າຫ້ອງເສນາທິການທະຫານແຂວງອຸດົມໄຊ ເປັນຫົວໜ້າຫ້ອງການຄະນະກຳມະການ ປກຊ – ປກສ ແຂວງອຸດົມໄຊຜູ້ໃໝ່ ແລະ ໄດ້ຍົກຍ້າຍ ພັນເອກ ວົງເພັດ ແກ້ວມະນີ ຫົວໜ້າຫ້ອງການ ປ້ອງກັນຊາດ – ປ້ອງກັນຄວາມສະຫງົບແຂວງອຸດົມໄຊຜູ້ເກົ່າ ໄປເປັນຫົວໜ້າຫ້ອງການສະຫະພັນນັກຮົບເກົ່າແຂວງອຸດົມໄຊ.

ໃນໂອກາດນີ້ ທ່ານ ບຸນຄົງ ຫຼ້າຈຽມພອນ,  ໄດ້ເນັ້ນໜັກໃຫ້ຜູ້ທີ່ຂື້ນຮັບໜ້າທີໃໝ່ ເອົາໃຈໃສ່ສຶກສາອົບຮົມການເມືອງນຳພາແນວຄິດ, ກຳແໜ້ນແນວທາງແຜນນະໂຍບາຍປ່ຽນແປງໃໝ່ຂອງພັກ, ຍົກສູງຄວາມຮັບຜິດຊອບຕໍ່ໜ້າທີ່ການເມືອງຂອງຕົນເຂົ້າໃນການຈັດຕັ້ງປະຕິບັດວຽກງານໃຫ້ຖືກຕ້ອງສອດຄ່ອງ ແລະ ເໝາະສົມກັບໜ້າທີ່ຕົວຈິງ, ເຮັດວຽກແບບລວມສູນປະຊາທິປະໄຕແບ່ງບຸກຄົນຮັບຜິດຊອບ, ມອບໝາຍໜ້າທີ່ໃຫ້ລະອຽດ, ເຄື່ອນໄຫວແກ້ໄຂບັນດາວຽກງານໃຫ້ໄດ້ຮັບໝາກຜົນດີຂື້ນກວ່າເກົ່າ.

Off

Comments are closed.