03rd Jun2022

ແຂວງຫົວພັນ ຈັດພິທີປູກຕົ້ນໄມ້ໃນໂອກາດວັນປູກຕົ້ນໄມ້ແຫ່ງຊາດ ຢູ່ທີ່ສວນສາທາ ຫົວພັນ-ກວາງນິງ

by Peaung Thanonkeo

ວັນທີ 1 ມີຖຸນາ ຂອງທຸກໆ ປີ, ພັກ ແລະ ລັດຖະບານໄດ້ກໍານົດເອົາວັນ ດັ່ງກ່າວ ເປັນວັນປູກຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນ ເພື່ອເປັນການປູກຈິດສຳນຶກ ໃຫ້ແກ່ເດັກນ້ອຍເຍົາວະຊົນ ແລະ ອະນຸຊົນ ກໍ່ຄືພະນັກງານທະຫານຕຳຫຼວດ, ປະຊາຊົນ ແລະ ນັກທຸລະກິດ ທຸກພາກສ່ວນທົ່ວ-ສັງຄົມ ໄດ້ເຫັນເຖິງຄວາມສຳຄັນຂອງປ່າໄມ້ ພ້ອມທັງມີການປົກ ປັກຮັກສາປ່າໄມ້ ແລະ ປູກໄມ້ທົດແທນໃຫ້ມີຄວາມຍືນຍົງ, ວັນທີ 1 ມີຖຸນາ 2022 ແຂວງຫົວພັນຈິ່ງ ໄດ້ຈັດພິທີປູກຕົ້ນໄມ້ໃນໂອກາດວັນປູກຕົ້ນໄມ້ແຫ່ງຊາດ ຢູ່ທີ່ສວນສາທາ ຫົວພັນ-ກວາງນິງ ໂດຍການເຂົ້າຮ່ວມຂອງ ທ່ານ ນາງ. ອຳໄພວອນ ລ້ອມບຸນແພງ ກຳມະການ ສຳຮອງສູນກາງພັກ ຮອງເລຂາພັກແຂວງ ປະທານ ສະພາປະຊາຊົນແຂວງ, ທ່ານ ພຸດພັນແກ້ວ ວົງ ໄຊ ຮອງເຈົ້າແຂວງ ຫົວພັນ ມີພະແນກການທີ່ກ່ຽວຂ້ອງອ້ອມຂ້າງແຂວງ, ອົງການຈັດຕັ້ງບ້ານເຂົ້າຮ່ວມ.

ຕົ້ນໄມ້ທີ່ນຳມາປູກໃນຄັ້ງນີ້, ແມ່ນເປັນຕົ້ນໄມ້ ດອກຄາຍປ່າ ຈໍານວນ 1,178 ຕົ້ນ ແລະ ປູກຢູ່ໃນ 3 ຈຸດຂອງເມືອງຊຳເໜືອຄື: ເສັ້ນທາງ ຕັດໃໝ່ບ້ານນາວຽງໄປບ້ານໂພນ ສາຍທາງເທດສະບານເມືອງ ຕາມເສັ້ນທາງເລກ6A ແລະ ຕາມເສັ້ນທາງໄປຜ່າທີ. ເພື່ອເປັນການປະດັບໃຫ້ຕົວເມືອງມີຄວາມສວຍສົດງົດງາມ ແລະ ໃນໂອກາດດຽວກັນນີ້ ຄ້າຍຄຸມຄັງດັດສ້າງ ປກສ ແຂວງຫົວພັນ ນຳໂດຍ ພັທ ວົງພັນ ແກ້ວເພັງຄໍາ ຫົວໜ້າຄ້າຍຄຸມດັງ-ດັດສ້າງ ພ້ອມດ້ວຍຄະນະ ແລະ ຊາວໜຸ່ມ, ແມ່ຍິງ ກໍ່ໄດ້ພ້ອມກັນປູກຕົ້ນໄມ້ ຢູ່ທີ່ສູນດັດສ້າງບ້ານເມືອງງາ ເມືອງວຽງ ໄຊ ແຂວງຫົວພັນ ທັ້ງນີ້ກໍ່ເພື່ອເປັນການປົກປັກຮັກສາ ແລະ ຟື້ນຟູປ່າໄມ້ໃຫ້ຂຽວງາມ ແລະ ຍືນຍົງ, ເພື່ອເປັນການດຶງດູດເອົານັກທ່ອງທ່ຽວໃຫ້ມາທ່ຽວຊົມທຳມະຊາດຢູ່ ແຂວງຫົວພັນນັບມືຫຼາຍຂື້ນ.

Off

Comments are closed.