05th Jan2016

ກອງປະຊຸມການກະກຽມ ແລະ ການສະເຫຼີມສະຫຼອງວັນສ້າງກຳລັງ ປກສ 55ປີ

by somchan

ກະຊວງປ້ອງກັນຄວາມສະຫງົບຜ່ານແຜນການ ກະກຽມແລະສະເຫຼີມສະຫຼອງ ວັນສ້າງຕັ້ງກຳລັງປ້ອງກັນຄວາມສະຫງົບ ຄົບຮອບ 55ປີ ໃນວັນທີ 4 ມັງກອນ 2016ນີ້ ໂດຍການເຂົ້າຮ່ວມຂອງ ພົນຕີ ສົມແກ້ວ ສີລາວົງ ກຳມະການສູນກາງພັກ ລັດຖະມົນຕີວ່າການກະຊວງ ປກສ ພ້ອມດ້ວຍຄະນະພັກ-ຄະນະບັນຊາ ບັນດາກົມກອງອ້ອມຂ້າງກະຊວງເຂົ້າຮ່ວມ.

ພົຈວ ອາລູ ວາລີຊື່ ຄະນະພັກກະຊວງ ຫົວໜ້າກົມໃຫຍ່ການເມືອງປ້ອງກັນຄວາມສະຫງົບ ໄດ້ລາຍງານແຜນການກະກຽມ ແລະ ການດຳເນີນການສະເຫຼີມສະຫຼອງວັນສ້າງຕັ້ງກຳລັງປ້ອງກັນຄວາມສະຫງົບ ວັນທີ 5ເມສາ ຄົບຮອບ 55ປີ. ເຊິ່ງປະກອບດ້ວຍອານຸກຳມະການດ້ານເນື້ອໃນ, ອານຸກຳມະການພິທີການ, ອານຸກຳມະການຂະບວບການ, ອານຸກຳມະການດ້ານເສດຖະກິດ ແລະ ອື່ນໆ.

ສຳລັບບັນດາໜ້າວຽກທີ່ຈະສຸມໃສ່ແຕ່ລະອານຸກຳມະການແມ່ນ ການປຸກລະດົມຊຸກຍູ້ບັນດາເຫຼົ່າຮົບວິຊາສະເພາະ ອອກແຮງສ້າງຜົນງານຂ່ຳນັບຮັບຕ້ອນ ພ້ອມທັງສ້າງຂະບວນການແຂ່ງຂັນກິລາ ສິນລະປະ-ວັນນະຄະດີ, ການອອກແຮງງານອານະໄມ, ປະດັບປະດາ ສຳນັກງານ ຫ້ອງການ, ການປາຖະກະຖາໂຄສະນາເຜີຍແຜ່ມູນເຊື້ອ ການກຳເນີເຕີບໃຫຍ່ຂະຫຍາຍຕົວ ຕະຫຼອດເຖິງຜົນງານຂອງກຳລັງ ປກສ ທີ່ໄດ້ປະກອບສ່ວນເຂົ້າໃນພາລະກິດຕໍ່ສູ້ກູ້ຊາດ ແລະ ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດຈົນເຖິງປະຈຸບັນ. ນອກນີ້ຍັງຈະໄດ້ມີການຈັດຕັ້ງຊຸມນຸມໃຫຍ່ ເພື່ອສະເຫຼີມສະຫຼອງຢ່າງເປັນທາງການ.

ພົນຕີ ສົມແກ້ວ ສີລາວົງ ກຳມະການສູນກາງພັກ ລັດຖະມົນຕີວ່າການກະຊວງ ປກສ ຍັງໄດ້ເໜັ້ນໜັກໃຫ້ແຕ່ລະອານຸກຳມະການ ເອົາໃຈໃສ່ເຮັດໜ້າທີ່ວຽກງານຂອງຕົນດ້ວຍຄວາມຮັບຜິດຊອບສູງ ເພື່ອເຮັດໃຫ້ການສະເຫຼີມສະຫຼອງວັນສ້າງຕັ້ງກຳລັງ ປກສ ຄົບຮອບ 55ປີ ໄດ້ດຳເນີນໄປດ້ວຍບັນຍາກາດເບີກບານມ່ວນຊື່ນ, ຟົດຟື້ນ ແລະ ມີຜົນສຳເລັດ.

 

 

Off

Comments are closed.