06th Jan2016

ມ້າງເປົ້າໝາຍຄ້າຂາຍຢາເສບຕິດລາຍໃຫຍ່ ຢາບ້າ 35.800 ເມັດ

by somchan

ໃນວັນທີ 3 ມັງກອນ 2016ນີ້ ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງບໍລິຄຳໄຊ ໄດ້ມ້າງເປົ້າໝາຍຄ້າຂາຍຢາເສບຕິດລາຍໃຫຍ່ ຢູ່ບ້ານນາຄຳ ເມືອງທ່າພະບາດແຂວງບໍລິຄຳໄຊ ຜ່ານການກວດຄົ້ນພົບເຫັນເຣໂຣອິນ 91 ແທ່ງ, ຢາບ້າ 16ມັດ ກັບ19ຖົງ, ເທົ່າກັບ 35.800ເມັດແລະ ສາມາດຈັບຕົວເປົ້າໝາຍ ຊື້-ຂາຍຢາເສບຕິດໄດ້ 5ຄົນ. ໃນນີ້ມີ ທ້າວສຸດໃຈວ່າງ ອາຍຸ 38ປີ ແລະທ້າວນື້ວື ອາຍຸ 41ປີ ທັງສອງຢູ່ບ້ານຫຼັກ 52 ເມືອງໂພນໂຮງ ແຂວງວຽງ, ທ້າວ ວາເຊັງວື ອາຍຸ 31ປີ ຢູ່ບ້ານໜອງປາ ເມືອງຄຳເກີດ, ທ້າວໄຊວ່າງ ອາຍຸ 38ປີ ສັນຊາດໄທ ແລະ ທ້າວຈ້າງທໍ່ ອາຍຸ 18ປີ ທັງສອງຢູ່ບ້ານນາໂທ ເມືອງວຽງທອງ ແຂວງບໍລິຄຳໄຊ. ນອກຈາກນີ້, ເຈົ້າໜ້າທີ່ຍັງຢຶດພາຫະນະທີ່ນຳໃຊ້ເຂົ້າໃນການເຄື່ອນໄຫວກະທຳຜິດໃນຄັ້ງນີ້, ມີລົດ 4ຄັນຄື: ລົດໂຕໂຍຕ້າ ຮາຍລັກລີໂວ້ ສີປອນ ບໍ່ມີປ້າຍທະບຽນ, ລົດເລັກຊັດ ສີດຳ ໝາຍເລກທະບຽນ ຫອ 9888 ກຳແພງນະຄອນ, ລົດເກັງອີແລນຕ້າສີຂາວໝາຍເລກທະບຽນ ກຍ 5789ກຳແພງນະຄອນ ແລະ ລົດຕູ້ສະຕາແລັກ ບໍ່ມີປ້າຍທະບຽນ. ເຈົ້າໜ້າທີ່ຍັງໃຫ້ຮູ້ຕື່ມອີກວ່າ: ຢາເສບຕິດຈຳນວນດັ່ງກ່າວແມ່ນກຽມຂາຍອອກໄປປະເທດທີສາມ.

ປັດຈຸບັນ, ຄະດີດັ່ງກ່າວພວມຢູ່ໃນຂັ້ນຕອນການສືບສວນ-ສອບສວນຂະຫຍາຍຜົນ ແລະຜູ້ຮ່ວມຂະບວນການ ມາດຳເນີນຄະດີຕາມລະບຽບກົດໝາຍ.

 

Off

Comments are closed.