29th Jun2022

ທ່ານ ອາຊາງ ລາວລີ ເຄື່ອນໄຫວພົບ ປະ-ຢ້ຽມຢາມ ປະຊາຊົນບ້ານນານໍ້າ ເມືອງບຸນໃຕ້

by somchan

ໃນວັນທີ 27 ມິຖຸນາ 2022 ນີ້, ທ່ານ ອາຊາງ ລາວລີ ອະດີດກຳມະການ ກົມການເມືອງສູນກາງພັກ, ອະດີດຮອງນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍຄະນະ ໄດ້ເຄື່ອນໄຫວຢ້ຽມ ຢາມ ແລະ ພົບປະໂອ້ລົມ ພໍ່ແມ່ປະຊາຊົນບ້ານນານໍ້າ ເມືອງບຸນໃຕ້, ແຂວງຜົ້ງສາລີ.ໃຫ້ກຽດຕ້ອນຮັບໂດຍທ່ານ ສັນຕິ ແກ້ວຍະສານ ກຳມະການປະຈຳພັກແຂວງ, ຫົວໜ້າຄະນະຈັດຕັ້ງແຂວງ,ມີທ່ານເຈົ້າເມືອງໆບຸນໃຕ້ ພ້ອມດ້ວຍການນຳຂັ້ນ ແຂວງ-ຂັ້ນເມືອງ ຕະຫລອດຮອດ ພໍ່ແມ່ປະຊາຊົນ ພາຍໃນບ້ານນານໍ້າ.

ໃນໂອກາດນີ້, ທ່ານ ຄຳແພງ ລາວມາ ນາຍບ້ານໆນານໍ້າ ໄດ້ລາຍງານກ່ຽວກັບ ການຈັດຕັ້ງປະຕິ ບັດແຜນພັດທະນາ ເສດຖະກິດສັງຄົມຂອງບ້ານ ໃນໄລຍະຜ່ານມາ ເຊິ່ງທ່ານໄດ້ຍົກໃຫ້ເຫັນ ຂໍ້ສະດວກ ແລະ ຂໍ້ຫຍຸ້ງຍາກ ໃນການຊີ້ນຳໆພາປະຊາຊົນ. ບ້ານນານໍ້າ ເຊິ່ງຫ່າງຈາກເທດສະບານ ເມືອງບຸນໃຕ້ 60 ກ່ວາກິໂລແມັດ,ມີ 74 ຫລັງຄາເຮືອນ, 101 ຄອບ ຄົວ, ມີພົນລະເມືອງ ທັງໝົດ 487 ຄົນ,ຍິງ 297 ຄົນ ເຊິ່ງເປັນຊົນເຜົ່າອາຄາ,ອາຊີບຕົ້ນຕໍຂອງປະຊາ ຊົນແມ່ນເຮັດໄຮ່,ລ້ຽງສັດນ້ອຍສັດໃຫຍ່ ແລະ ປູກພືດທັນຍາຫານ,ສ່ວນອາຊີບເສີມແມ່ນ ປູກສາລີ,ໝາກເດືອ,ຊາ ແລະ ເຄື່ອງຫັດຖະກຳຊົນເຜົ່າເປັນສິ້ນຄ້າເຊິ່ງສາມາດສ້າງລາຍຮັບໃຫ້ແກ່ປະຊາຊົນພາຍໃນບ້ານ 2,5 ຕື້ກ່ວາກີບ,ສະເລ່ຍໃສ່ຄອບຄົວໜື່ງໄດ້ 25 ລ້ານກ່ວາກີບຕໍ່ປີພ້ອມກັນນັ້ນ ທ່ານຍັງໄດ້ສະເໜີຊ່ວຍສ້າງ ຫ້ອງການບ້ານ 1 ຫລັງ,ຊ່ວຍປູຢາງແຕ່ແຍກບ້ານສຳພັນໄຊ ຫາ ບ້ານນານໍ້າລວມໄລຍະທາງ 20 ກິໂລແມັດ.

ໃນໂອກາດນີ້,ທ່ານ ອາຊາງ ລາວລີ ໄດ້ສະແດງ ຄວາມຍ້ອງຍໍຊົມເຊີຍມາຍັງອົງການຈັດຕັ້ງບ້ານ ແລະ ພໍ່ແມ່ປະຊາຊົນພາຍໃນບ້ານ ທີ່ມີຜົນງານໄດ້ພ້ອມກັນພັດທະນາ ສ້າງສາບ້ານຂອງຕົນໃນໄລຍະທີ່ຜ່ານມາ,ພ້ອມກັນນັ້ນ ທ່ານຍັງໄດ້ຮຽກຮ້ອງໃຫ້ປະຊາຊົນພາຍໃນບ້ານຈົ່ງພ້ອມກັນເຕົ້າໂຮມຄວາມສາມັກຄີໃຫ້ເປັນປຶກແຜ່ນ,ເອົາໃຈໃສ່ສ້າງສາພັດທະນາເສດຖະກິດຂອງບ້ານກໍຄືຂອງຄອບຄົວໃຫ້ດີຂຶ້ນ ໂດຍການປູກ-ການລ້ຽງ ແບບທຳມະຊາດໃຫ້ຫລາຍຂຶ້ນ, ສືບຕໍ່ອານຸລັກຮັກສາຮີດຄອງປະເພນີອັນດີງາມຂອງບ້ານ,ຍົກສູງວຽກງານປ້ອງກັນ ຊາດ-ປ້ອງກັນຄວາມສະຫງົບ ຢ່າງເປັນປົກກະຕິ, ຕ້ານ ແລະ ສະກັດກັ້ນບັນຫາສິ່ງເສບຕິດ,ຂີ້ລັກງັດແງະອັນສ້າງຄວາມວຸ້ນວາຍ ແລະ ບໍ່ສະຫງົບໃຫ້ແກ່ບ້ານ,ສືບຕໍ່ສ້າງອາຊີບທີ່ຖາວອນໃຫ້ຫລາຍຂຶ້ນເພື່ອເຮັດໃຫ້ຫລຸດພົ້ນອອກຈາກຄວາມທຸກຍາກເທື່ອລະກ້າວ.

ໂອກາດທີ່ ທ່ານ ອາຊາງ ລາວລີ ເຄື່ອນໄຫວຢ້ຽມຢາມ ແລະ ເຮັດວຽກຢູ່ບ້ານນານໍ້າ ໃນຄັ້ງນີ້ຍັງໄດ້ນຳເອົາໂທລະໂຄ່ງຈຳນວນ1 ຊຸດມອບໃຫ້ກັບບ້ານຕື່ມອີກ.

 

Off

Comments are closed.