29th Jun2022

ແຂວງຈຳປາສັກ-ແຂວງອຸບົນຣາຊະທານີ ເພີ່ມທະວີການຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນ.

by somda phoneor

ກອງປະຊຸມຄະນະກຳມະການຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນ ລາວ-ໄທ ລະຫວ່າງ ແຂວງຈຳປາສັກ ສປປ ລາວ ກັບ ແຂວງອຸບົນຣາຊະທານີ ຣາຊະອານາຈັກໄທ ຄັ້ງທີ 14 ໄດ້ມີຂຶ້ນໃນວັນທີ 28 ມິຖຸນາ 2022 ທີ່ ໂຮງແຮມຈຳປາສັກແກຣນ ນະຄອນປາກເຊ, ແຂວງຈໍາປາສັກ ໂດຍການເປັນປະ ທານຮ່ວມຂອງ ທ່ານ ວິໄລວົງ ບຸດດາຄໍາ ເຈົ້າແຂວງຈໍາປາສັກ ແລະ ທ່ານ ພົງຣັດ ພິຣົມຣັດ ຜູ້ວ່າຣາຊະການແຂວງອຸບົນຣາຊະທານີ, ມີ ທ່ານຮອງເຈົ້າແຂວງຈຳປາສັກ, ທ່ານຮອງຜູ້ວ່າຣາຊະການແຂວງອຸບົນຣາຊະທານີ,ຄະນະກໍາມະການຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນ ຂອງ ສອງຝ່າຍ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ກອງປະຊຸມ ຄັ້ງນີ້,ສອງຝ່າຍໄດ້ປຶກສາຫາລືແລກປ່ຽນຄວາມຄິດເຫັນການຈັດຕັ້ງປະຕິບັດບົດບັນທຶກກອງປະຊຸມຄະນະກຳມະການຮ່ວມມື ຮັກສາຄວາມສະຫງົບຮຽບຮ້ອຍຕາມຊາຍແດນ ລາວ-ໄທ ລະຫວ່າງ ແຂວງຈຳປາສັກ ກັບແຂວງ ອຸບົນຣາຊະທານີ ຄັ້ງທີ 13 ເມື່ອເດືອນຕຸລາ 2019 ທີ່ແຂວງອຸບົນຣາຊະທານີ ເຊິ່ງທັງສອງຝ່າຍເຫັນວ່າກົນໄກການຮ່ວມມືດັ່ງກ່າວ ເປັນສັນຍາລັກແຫ່ງ ການຮ່ວມມືທີ່ໃກ້ຊິດ ລະຫວ່າງສອງແຂວງ ແລະ ຍັງສະແດງໃຫ້ເຫັນ ເຖິງການຮ່ວມມືທີ່ ແໜ້ນແຟ້ນ ແລະ ຄວາມພະຍາຍາມ ໃນການແກ້ໄຂບັນຫາຕ່າງໆ ທີ່ເກີດຂຶ້ນຕາມບໍລິເວນຊາແດນ,ລວມທັງການຮ່ວມມືທາງດ້ານເສດຖະກິດ-ສັງຄົມລະຫວ່າງສອງທ້ອງຖິ່ນນັບມື້ດີຂຶ້ນ.ສອງຝ່າຍ ສະໜັບສະໜູນ ແລະ ປະຕິບັດແຜນງານບົນພື້ນຖານຂໍ້ຕົກລົງ ວ່າດ້ວຍການຮ່ວມມື ດ້ານຄວາມໝັ້ນຄົງບໍລິເວນຊາຍແດນ ລະຫວ່າງ ສອງປະເທດ ເພື່ອເພີ່ມຄວາມໄວ້ເນື້ອເຊື່ອໃຈ

ເຊິ່ງກັນ ແລະ ກັນ ຂອງປະຊາຊົນ ສອງຝ່າຍ ເຮັດໃຫ້ຊາຍແດນລະຫວ່າງປະເທດ ເປັນຊາຍແດນແຫ່ງສັນຕິພາບ,ມິດຕະພາບ ແລະ ການຮ່ວມມືພັດທະນາ ໃຫ້ມີຄວາມສະຫງົບ ໝັ້ນຄົງຕະຫລອດໄປ. ຜູ້ແທນສອງຝ່າຍໄດ້ຄົ້ນຄວ້າກຳນົດກົນໄກ ແລະ ຂອບການຮ່ວມມື ຕາມເນື້ອໃນຂອງບົດບັນທຶກ ກອງປະຊຸມຄະນະກຳມະການຮ່ວມມື ຮັກສາຄວາມສະຫງົບຮຽບຮ້ອຍ ຕາມຊາຍແດນ ລາວ-ໄທ ຄັ້ງທີ 14 ນີ້ ເພື່ອສືບຕໍ່ເພີ່ມທະວີການພົວພັນຮ່ວມມື ໃນຫລາຍດ້ານ ເຊັ່ນ:  ການຮັກສາຄວາມສະຫງົບຮຽບຮ້ອຍຕາມຊາຍແດນ,ການຮ່ວມມືໃນການ ຮັກສາເສັ້ນຊາຍແດນ ລາວ-ໄທ,ການຮັກສາປ້ອງກັນຕະຝັ່ງເຈື່ອນ ແລະ ການແກ້ໄຂບັນຫາ ຕາມລໍາແມ່ນ້ຳຂອງ,ການອໍານວຍຄວາມສະດວກ ແລະ ຮັກສາຄວາມປອດໄພ ໃນການເຂົ້າ-ອອກຕາມ ບໍລິເວນຈຸດຜ່ານແດນ,ການປ້ອງກັນ ແລະ ປາບປາມຢາເສບຕິດ,ກໍລະນີບຸກຄົນຂອງແຕ່ລະຝ່າຍຖືກຈັບ ກຸມຄຸມຂັງ,ດ້ານການຕໍ່ຕ້ານການຄ້າມະນຸດ,ການພັດທະນາສີມືແຮງງານ ແລະ ການພັດທະນາຊັບພະຍາກອນມະນຸດ,ລວມທັງດ້ານເສດຖະກິດ,ການປ້ອງກັນການ ລັກລອບຊື້-ຂາຍສັດປ່າ ແລະ ເຄື່ອງປ່າຂອງດົງ ທີ່ຜິດກົດໝາຍ,ດ້ານສາທາລະນະສຸກ ແລະ ການຮ່ວມມືດ້ານການສົ່ງເສີມ ແລະ ພັດທະນາທຸລະກິດຂະໜາດນ້ອຍ ແລະ ກາງ ຫຼື  SMES.

ນອກນັ້ນ,ຄະນະຜູ້ແທນສອງຝ່າຍ ຍັງໄດ້ສະແດງຄວາມຍິນດີ ຕໍ່ການເດີນທາງຢ້ຽມຢາມ ຣາຊະອານາຈັກໄທ ຢ່າງເປັນທາງການ ຂອງ ທ່ານ ພັນຄໍາ ວິພາວັນ ນາຍົກລັດຖະມົນຕີ ແຫ່ງ ສປປ ລາວ  ໃນໂອກາດ ທີ່ທັງສອງຝ່າຍເຫັນດີ ຍົກລະດັບການພົວພັນ ລາວ-ໄທ ເປັນຄູ່ຮ່ວມມືຍຸດທະສາດ ເພື່ອການຈະ ເລີນເຕີບໂຕ ແລະ ການພັດທະນາແບບຍືນຍົງ,ຍິນດີ ຕໍ່ຜົນສໍາເລັດການຈັດກອງປະຊຸມຄະນະກໍາມາທິການຮ່ວມວ່າດ້ວຍການຮ່ວມມື ລາວ-ໄທ ຄັ້ງທີ 22 ໃນລະຫວ່າງວັນທີ 03-04 ພະຈິກ 2021 ທີ່ບາງກອກ,ຣາຊະອານາຈັກໄທ ເຊິ່ງທັງສອງຝ່າຍໄດ້ຮ່ວມມືກັນຈັດຕັ້ງຜັນຂະຫຍາຍຜົນຂອງກອງປະຊຸມດັ່ງກ່າວໃຫ້ເປັນຮູບປະທໍາເພື່ອນໍາເອົາຜົນປະໂຫຍດຕົວຈິງ ແລະ ຄວາມຈະເລີນວັດທະນາສູ່ປະຊາຊົນສອງຊາດ ທັງເປັນການປະກອບສ່ວນອັນສໍາຄັນເຂົ້າໃນການສືບຕໍ່ສ້າງພື້ນຖານອັນໜັກແໜ້ນເພື່ອກ້າວໄປສູ່ການຍົກລະດັບການພົວພັນຮ່ວມມືໃຫ້ເປັນ “ຄູ່ຮ່ວມມືຍຸດທະສາດ ເພື່ອການຈະເລີນເຕີບໂຕ ແລະ ການພັດທະນາແບບຍືນຍົງ” ໃນອະນາຄົດ,ຮ່ວມຍິນດີຕໍ່ຜົນສໍາເລັດການຈັດກິດຈະກໍາຕ່າງໆເພື່ອສະເຫລີມສະຫລອງວັນສ້າງຕັ້ງສາຍພົວພັນທາງການທູດລະຫວ່າງ ສອງປະເທດ ຄົບຮອບ 70 ປີ ດ້ວຍຜົນສໍາເລັດຢ່າງຈົບງາມໃນເດືອນທັນວາ 2021 ຜ່ານມາ.

Off

Comments are closed.