29th Jun2022

ກອງປະຊຸມສະພາວິທະຍາສາດ ຮັບຮອງ ສະຫລຸບເຫດການປະຫວັດສາດ ການສະກັດກັ້ນ ແລະ ແກ້ໄຂການປຸ້ນສະດົມຢູ່ດ່ານວັງເຕົ່າ.

by somchan

ໃນວັນທີ 29 ມີຖຸນາ 2022ນີ້ ກົມຄົ້ນຄວ້າວິທະຍາສາດ – ປະຫວັດສາດ ກະຊວງ ປກສ ຈັດກອງປະຊຸມສະພາວິທະຍາສາດ ຮັບຮອງ ສະຫລຸບເຫດການປະຫວັດສາດ ການສະກັດກັ້ນ ແລະ ແກ້ໄຂການປຸ້ນສະດົມ ຢູ່ດ່ານວັງເຕົ່າ ເມືອງໂພນທອງແຂວງຈຳປາສັກ ປີ 2000 ໂດຍການເຂົ້າຮ່ວມຂອງ ພົຈວ ສະແຫວງ ພົມມະລີ ຫົວຫນ້າກົມຄົ້ນຄວ້າວິທະຍາສາດ – ປະຫວັດສາດ ມີບັນດາຄະນະພັກ, ກຳມາການວິທະຍາສາດ,ກອງເລຂາສະພາວິທະຍາສາດ, ຄະນະຮັບຜິດຊອບເນື້ອໃນເຂົ້າຮ່ວມ.

ພົຈວ ສະແຫວງ ພົມມະລີ ຫົວຫນ້າກົມຄົ້ນຄວ້າວິທະຍາສາດ-ປະຫວັດສາດ ໄດ້ກ່າວຕໍ່ກອງປະຊຸມວ່າໃນຄັ້ງນີ້ວ່າ:

ການສະຫຼຸບເຫດການ “ການສະກັດກັ້ນ ແລະ ແກ້ໄຂການປຸ້ນສະດົມຢູ່ດ່ານສາກົນວັງເຕົ່າ ປີ 2000″ ເປັນເຫດການໜຶ່ງທີ່ມີຄວາມໝາຍສໍາຄັນທາງດ້ານປະຫວັດສາດ ຂອງກໍາລັງປ້ອງກັນຄວາມສະຫງົບ, ເປັນເຫດການທຳອິດທີ່ມີການພົວພັນຂໍຕົວຜູ້ຮ້າຍຂ້າມແດນຈາກຕ່າງປະເທດ, ໃນການສະກັດກັ້ນ, ແກ້ໄຂເຫດການ ມີການປະສານສົມທົບກັບຫຼາຍພາກສ່ວນເຂົ້າຮ່ວມໃນຄັ້ງນີ້, ພາຍໄຕ້ການນໍາພາ, ຊີ້ນຳໂດຍກົງ ຂອງ ພັກ-ລັດຖະບານ, ມີບັນດາກະຊວງ, ບັນດາອົງການຈັດຕັ້ງທີ່ກ່ຽວຂ້ອງຂັ້ນສູນກາງ ແລະ ທ້ອງຖິ່ນເຂົ້າຮ່ວມ.

ໄລຍະຜ່ານມາ ກົມຄົ້ນຄວ້າວິທະຍາສາດ ແລະ ປະຫວັດສາດ ປກສ ໄດ້ສົມທົບກັບກອງບັນຊາການປ້ອງກັນຄວາມສະຫງົບ ແຂວງຈຳປາສັກ ແລະ ບັນດາພາກສ່ວນທີ່ກ່ຽວຂ້ອງມີຄວາມ ພະຍາຍາມເກັບກຳທ້ອນໂຮມຂໍ້ມູນຕ່າງໆ ທີ່ກ່ຽວຂ້ອງເຫດການ ຢູ່ອ້ອມຂ້າງສູນກາງ ແລະ ທ້ອງຖິ່ນ ຢ່າງຕັ້ງ ເພາະວ່າເຫດການດັ່ງກ່າວໄດ້ເກີດຂຶ້ນຢູ່ຕ່າງແຂວງ ແລະ ເກີດຂຶ້ນເປັນເວລາດົນນານ ພໍສົມຄວນ ໄດ້ຊອກຮູ້ເກັບກຳຂໍ້ມູນຈາກ ພາກສວ່ນທີ່ກ່ຽວຂ້ອງຢູ່ອ້ອມຂ້າງກະຊວງແລະຢູ່ທ້ອງຖິ່ນ ຄົ້ນຄວ້າທ້ອນໂຮມເອກະສານ, ຂໍ້ມູນຫຼັກຖານ, ສຳນວນຄະດີ, ບັນດາຮູບພາບຂອງກາງຄະດີທີ່ກ່ຽວຂ້ອງ ແລະ ອື່ນໆ. ພ້ອມທັງເຄື່ອນໄຫວສຳພາດພະນັກງານບຳນານ ອາດິດຄະນະຊີ້ນຳແກ້ໄຂເຫດການວັງເຕົ່າ ປີ 2000, ອາດີດພະນັກງານແກ້ໄຂເຫດການຕົວຈິງ ພາກສະໜາມ ແລະ ຜູ້ທີ່ຢູ່ໃນເຫດການຕົວຈິງທີ່ຖືກຈັບເປັນຕົວປະກັນ ພາຍຫລັງການເກັບກຳຂໍ້ມູນແລ້ວກໍ່ໄດ້ມີການຮຽບຮຽງແລະພິມເປັນປື້ມ ພ້ອມທັງຈັດກອງປະຊຸມປະກອບແນວຄຳຄິດຄຳເຫັນໃສ່ຮ່າງປຶ້ມ ສະຫຼຸບເຫດການປະຫວັດສາດ “ການສະກັດກັ້ນ ແລະ ແກ້ໄຂການປຸ້ນສະດົມຢູ່ດ່ານສາກົນວັງເຕົ່າ ເມືອງໂພນທອງ ແຂວງຈຳປາສັກ ປີ 2000 ໂດຍລວມແລ້ວກອງປະຊຸມແມ່ນເຫັນດີເປັນເອກະພາບຕາມໂຄງປະກອບຂອງປຶ້ມມີ: ຂະໜາດ ຂອງປື້ມ, ຮູພາບ ສີສັນ ໜ້າປົກນອກຂອງປຶ້ມ, ສາລະບານ, ຄຳນຳ ອື່ນໆ ປື້ມດັ່ງກ່າວແບ່ງອອກ ເປັນ 3 ພາກ ລວມມີຈຳນວນ 89 ໜ້າ, ມີເນື້ອໃນ, ຄຳສັບ, ຮູບພາບເຫດການ ທີ່ເກີດຂື້ນຈີງ ທັງນີ້ເພື່ອເປັນການຮັກສາຂໍ້ມູນ, ບົດຮຽນອັນລໍ້າຄ່າດັ່ງກ່າວໄວ້ ໃນປຶ້ມສະຫຼຸບເຫດການປະຫວັດສາດ ເຫຼັ້ມນີ້ໃຫ້ຍາວນານ, ເພື່ອໃຫ້ກຳລັງປ້ອງກັນຄວາມສະຫງົບ ຮຸ່ນສືບທອດ ໄດ້ສຶກສາຄົ້ນຄວ້າຮ່ຳຮຽນ ແລະ ເປັນຕົວແບບໃນວຽກງານວິທະຍາສາດ ແລະ ປະຫວັດສາດ ປກສ, ໂດຍຫັນຈາກພຶດຕິກໍາຕົວຈິງ ມາ ເປັນທິດສະດີ ແລະ ເປັນບົດຮຽນໃຫ້ແກ່ການຄົ້ນຄວ້າຫົວຂໍ້ອື່ນໆ ຕໍ່ໄປ, ເປັນການໂຄສະນາເຜີຍແຜ່ຜົນງານມູນເຊື້ອ ວິລະກຳ ຂອງກຳລັງປະກອບອາວຸດ ກໍຄືກຳລັງ ປ້ອງກັນຄວາມສະຫງົບປະຊາຊົນ.

Off

Comments are closed.