11th Jan2016

ມ້າງຄະດີຢາເສບຕິດລາຍໃຫຍ່ ພ້ອມຂອງກາງ 96.000ເມັດ

by somchan

ໃນວັນທີ 7 ມັງກອນ 2016ນີ້ ເຈົ້າໜ້າທີ່ຕຳຫຼວດສະກັດກັ້ນ ແລະ ຕ້ານຢາເສບຕິດໄດ້ມ້າງຄະດີຄ້າຂາຍຢາເສບຕິດ ຢູ່ເຂດບ້ານນາສາງໄພ ເມືອງໄຊເຊດຖາ ນະຄອນຫຼວງວຽງຈັນສາມາດກັກຕົວຜູ້ກະທຳຜິດໄດ້ 4ຄົນ, ພ້ອມຂອງກາງຢາເສບຕິດປະເພດຢາບ້າ 48 ມັດເທົ່າກັບ 96.000ເມັດ, ໂທລະສັບ 4 ໜ່ວຍ ແລະ ລົດໃຫຍ່ 1ຄັນ.IMG_0504(CUT)

ເຈົ້າໜ້າທີ່ຕຳຫຼວດສະກັດກັ້ນ ແລະ ຕ້ານຢາເສບຕິດໃຫ້ຮູ້ວ່າ: ໄດ້ຮັບແຈ້ງຄວາມຈາກແຫຼ່ງຂ່າວວ່າ: ມີກຸ່ມຄົນບໍ່ດີຈຳນວນໜື່ງ ເຄື່ອນໄຫວຄ້າຂາຍຢາເສບຕິດຢູ່ເຂດບ້ານນາສາງໄພ ທາງພາກສ່ວນກ່ຽວຂ້ອງຈຶ່ງໄດ້ແຕ່ງຕັ້ງພະນັກງານວິຊາສະເພາະລົງຕິດຕາມ, ຮອດເວລາ 12:50ໂມງ ຂອງວັນທີ 7 ມັງກອນ 2016 ເຫັນວ່າມີມູນຄວາມຈິງ ຈຶ່ງໄດ້ນຳກຳລັງເຂົ້າປິດລ້ອມເຮືອນເປົ້າໝາຍ,​ສາມາດກັກຕົວຜູ້ຖືກຫາໄດ້ 4 ຄົນຄື: ທ້າວໄຄເຮີ ອາຍຸ 32 ປີ ຢູ່ບ້ານແດນກາງ, ແລະ ທ້າວ ລາວນູທໍ່ ອາຍຸ 46ປີ, ທ້າວລາວຕົງເຮີ ອາຍຸ 31 ປີ ແລະທ້າວຄົວທໍ່ ຫຼືຕົງທໍ່ ອາຍຸ20ປີ, ທັງສາມຢູບ້ານຫ້ວຍຫົງ ເມືອງລອງ ແຂວງຫຼວງນ້ຳຫຼວງ ພ້ອມຢາບ້າຈຳນວນດັ່ງກ່າວ.

ຜ່ານການສືບສວນ-ສອບສວນໃນເບື້ອງຕົ້ນຂອງເຈົ້າໜ້າທີ່ ພວກກ່ຽວທັງສີ່ໃຫ້ການສາລະພາບວ່າ: ຢາເສບຕິດຈຳນວນດັ່ງກ່າວທີ່ເຈົ້າໜ້າທີ່ຍຶດມາໄດ້ນັ້ນແມ່ນຂອງພວກກ່ຽວແທ້, ທີ່ຮັບມາຈາກຊາຍບໍ່ຮູ້ຊື່ ທີ່ຢູ່ເມືອງລອງ ແຂວງຫຼວງນ້ຳທາ ພາຍຫຼັງໄດ້ຮັບຢາບ້າແລ້ວ ກໍນຳເອົາຢາບ້າມານະຄອນຫຼວງວຽງຈັນ ພໍມາຮອດກໍຖືກເຈົ້າໜ້າທີ່ກັກຕົວພ້ອມຂອງກາງ.

ປະຈຸບັນຄະດີດັ່ງກ່າວ, ເຈົ້າໜ້າທີ່ກຳລັງສືບສວນ-ສອບສວນຂະຫຍາຍຜົນຊອກຫາຜູ້ຮ່ວມຂະບວນການ ເພື່ອນຳຕົວມາດຳເນີນຄະດີຕາມລະບຽບກົດໝາຍ.

Off

Comments are closed.