19th Jan2016

ສູນທອນທົດ ຂອງສະຫາຍ ຈູມມະລີ ໄຊຍະສອນ ເຂລາທິການໃຫຍ່ ຄະນະບໍລິຫານງານສູນກາງພັກ ກ່າວໄຂກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ 10 ຂອງພັກປະຊາຊົນ ປະຕິວັດລາວ

by somchan

ມື້ນີ້, ທ່າມກາງບັນຍາກາດທີ່ທົ່ວພັກ ທົ່ວກອງທັບ ແລະ ທົ່ວປວງຊົນລາວເຮົາ ພວມເບີກບານມ່ວນຊື່ນຜັນຂະຫຍາຍ ຜົນສຳເລັດຮອບດ້ານ ແລະມີຄວາມໝາຍໃນປີ 2015ທີ່ຜ່ານມາ, ພ້ອມທັງເຂົ້າຮ່ວມຂະບວນການ ຮັກຊາດ ແລະ ພັດທະນາ ໂດຍສຸມສະຕິປັນຍາກຳລັງວັງຊາ ເພື່ອຍາດເອົາໄຊຊະນະອັນໃຫຍ່ຫຼວງ ແລະ ໜັກແໜ້ນກວ່າເກົ່າ  ໃນພາລະກິດປົກປັກຮັກສາ ແລະ ສ້າງສາພັດທະນາປະເທດນັ້ນ ພວກເຮົາໄດ້ດຳເນີນກອງປະຊຸມໃຫຍ່ຜູ້ແທນທົ່ວປະເທດຄັ້ງທີ10 ຂອງພັກຢ່າງເປັນທາງການ.

ກອງປະຊຸມໃຫຍ່ຄັ້ງທີ 10 ຂອງພັກເຮົາ ໄຂຂຶ້ນໃນຄັ້ງນີ້ ແມ່ນເຫດການການເມືອງທີ່ມີຄວາມໝາຍສຳຄັນຢ່າງຍິ່ງ, ທັງເປັນບາດລ້ຽວປະຫວັດສາດໃນການກຳນົດທິດທາງ ໜ້າທີ່ ສຳລັບການພັດທະນາປະເທດຊາດຂອງພວກເຮົາ ເພື່ອກ້າວໄປສູ່ຈຸດໝາຍທີ່ວາງໄວ້ດ້ວຍຖ່ວງທ່າໃຫມ່.

ໃນນາມຄະນະບໍລິຫານງານສູນກາງພັກ ແລະ ຄະນະປະທານກອງປະຊຸມໃຫຍ່, ຂ້າພະເຈົ້າ, ຂໍສະແດງຄວາມຂ່ຳນັບຊົມເຊີຍບັນດາສະຫາຍຜູ້ແທນ, ເຊິ່ງເປັນຕົວແທນໃຫ້ແກ່ສະມາຊິກພັກສອງແສນຫ້າໜື່ນກວ່າສະຫາຍ ໃນຂົງເຂດວຽກງານ ແລະ ທຸກທ້ອງຖິ່ນ ໃນທົ່ວປະເທດຢ່າງສຸດອົກສຸດໃຈ.

ໃນວາລະທີ່ມີຄວາມໝາຍສຳຄັນນີ້ ກອງປະຊຸມໃຫຍ່ຂອງພວກເຮົາ ຍິ່ງມີຄວາມອາໄລຮັກ ຄະນຶງເຖິງປະທານໄກສອນ ພົມວິຫານ ຜູ້ນຳທີ່ແສນເຄົາລົບຮັກຂອງພວກເຮົາ,ຜູ້ລິເລີ່ມນຳພາພັກເຮົາດຳເນີນພາລະກິດປ່ຽນແປງໃຫມ່, ອາໄລຮັກເຖິງບັນດາສະຫາຍ ພະນັກງານການນຳຂອງພັກ ແລະ ລັດເຮົາ ທີ່ໄດ້ລ່ວງລັບໄປໃນລະຫວ່າງສອງກອງປະຊຸມໃຫຍ່ຂອງພັກເຮົາ ພ້ອມກັນນີ້, ພວກເຮົາກໍຂໍສະແດງຄວາມໄວ້ອາໄລຫາ ແລະ ຈາລຶກບຸນຄຸນ ບັນດາສະຫາຍພະນັກງານ, ສະມາຊິກພັກ ແລະ ນັກປະຕິວັດທີ່ໄດ້ເສຍສະຫຼະຊີວິດ ເພື່ອພາລະກິດປະຕິວັດຂອງປະເທດຊາດເຮົາ. ຂ້າພະເຈົ້າ ຂໍສະເໜີສະຫາຍທັງຫຼາຍຈົ່ງພ້ອມກັນລຸກຂຶ້ນກົ້ນຫົວໄວ້ອາໄລ ເຖິງບັນດາສະຫາຍດັ່ງກ່າວ 1 ນາທີ.

ສະຫາຍທີ່ຮັກແພງທັງຫຼາຍ.

ການສະຖາປະນາລະບອບປະຊາທິປະໄຕປະຊາຊົນ ຢູ່ປະເທດເຮົາ ມາເຖິງປະຈຸບັນ ໄດ້ຢ່ວງຂ້າມປີທີ 40 ແລະ ພາລະກິດປ່ຽນແປງໃໝ່ກໍໄດ້ດຳເນີນມາເປັນເວລາ 30ປີແລ້ວ. ຜ່ານໄລຍະດັ່ງກ່າວມີຫຼາຍບັນຫາສຳຄັນ ທີ່ພັກເຮົາຕ້ອງໄດ້ສະຫຼຸບ ແລະ ຕີລາຄາໃຫ້ຖືກຕ້ອງ ເລິກເຊິງ ແລະ ແນໃສ່ເສີມຂະຫຍາຍຜົນສຳເລັດ ແລະ ດ້ານຕັ້ງໜ້າ, ຈຳກັດແກ້ໄຂຂໍ້ຄົງຂ້າງ ເພື່ອຕໍ່ນຳພາເອົາພາລະກິດປະຕິວັດຂອງພວກເຮົາກ້າວຂຶ້ນຈຸດໝາຍສັງຄົມນິຍົມຢ່າງໜັກແໜ້ນ.

ບົນຈິດໃຈດັ່ງກ່າວ ຄະນະບໍລິຫານງານສູນກາງພັກສະໄໝທີ 9 ໄດ້ອອກມະຕິກ່ຽວກັບກະກຽມກອງປະຊຸມໃຫຍ່ຄັ້ງທີ 10ຂອງພັກ, ເຊິງເລີ່ມແຕ່ນັ້ນເປັນຕົ້ນມາ, ການກະກຽມດ້ານຕ່າງໆໃຫ້ແກ່ກອງປະຊຸມໃຫຍ່ຂອງພັກເຮົາ ກໍໄດ້ດຳເນີນຢ່າງຖີ່ຖ້ວນ, ຕໍ່ເນື່ອງມາເປັນລຳດັບ. ພວກເຮົາໄດ້ປຸກລະດົມສ້າງຂະບວນການໃນທຸກຂົງເຂດວຽກງານ ໂດຍການເຂົ້າຮ່ວມຢ່າງກວ້າງຂວາງຂອງສະມາຊິກພັກ, ໄດ້ເອົາການກະກຽມກອງປະຊຸມໃຫຍ່ຕິດພັນກັບການສະເຫຼີມສະຫຼອງວັນບຸນປະຫວັດສາດອັນສຳຄັນຂອງພັກ ແລະ ຂອງຊາດ ຢ່າງມີເນື້ອໃນອັນເລີກເຊິ່ງ.

ອັນພົ້ນເດັ່ນແມ່ນ ພວກເຮົາໄດ້ເອົາຂະບວນການກະກຽມກອງປະຊຸມໃຫຍ່ຄັ້ງທີ 10ຂອງພັກນີ້ ຕິດພັນກັບການປັບປຸງປົວແປງພັກ ໂດຍຜ່ານບັ້ນດຳເນີນຊີວິດການເມືອງ ກະກຽມກອງປະຊຸມໃຫຍ່ສາມຂັ້ນ ຢ່າງທົ່ວເຖີງ, ເລິກເຊິ່ງ ແລະ ເຮັດເປັນຫຼາຍບາດກ້າວ. ຜ່ານຂະບວນການເລົ່ານັ້ນ ໄດ້ເຮັດໃຫ້ພັກເຮົາມີການປັບປຸງບູລະນະທາງດ້ານການເມືອງແນວຄິດ ແລະການຈັດຕັ້ງຕື່ມອີກບາດກ້າວໜຶ່ງ ແລະ ສະມາຊິກພັກຂອງພວກເຮົາ ກໍໄດ້ຮັບການບຳລຸງຍົກລະດັບທາງດ້ານຄວາມຮັບຮູ້, ທັດສະນະຫຼັກໝັ້ນ ແລະ ການປ່ຽນແປງຕົນເອງໃຫ້ກ້າວໜ້າກວ່າເກົ່າ.

ພ້ອມກັນນັ້ນ, ເວລາກະກຽມຕົວຈິງ ຍັງໄດ້ຈັດຕັ້ງນຳເອົາຮ່າງລາຍງານການເມືອງ, ຮ່າງວິໄສທັດ, ແຜນຍຸດທະສາດ 10ປີ ແລະ ທິດທາງແຜນການພັດທະນາເສດຖະກິດ-ສັງຄົມ 5 ປີ ຄັ້ງທີ 8 (2016-2020), ແລະ ຮ່າງກົດລະບຽບສະບັບປັບປຸງ ລົງທາບທາມຄວາມເຫັນຂອງຄະນະພັກ, ກໍຄືຖັນແຖວຂອງສະມາຊິກພັກ ແລະ ມະຫາຊົນຢ່າງກວ້າງຂວາງ ດ້ວຍຮູບການອັນເໝາະສົມ. ອັນໄດ້ສ້າງໂອກາດໃຫ້ສະມາຊິກພັກ ກໍຄືມະຫາຊົນ ໄດ້ເຊີດຊູຈິດໃຈເປັນເຈົ້າຂອງປະເທດຊາດ ແລະ ເສີມຂະຫຍາຍປະຊາທິປະໄຕຢ່າງເປັນຮູບປະທຳຕົວຈິງ, ປະກອບຄຳຄິດຄຳເຫັນ ກ່ຽວກັບບັນຫາສຳຄັນຕ່າງໆ ທີ່ສ່ອງແສງຖືກຕ້ອງກັບສະພາວະຄວາມເປັນຈິງຂອງປະເທດຊາດ; ຖືກກັບເຈດຈຳນົງ, ຄວາມມຸ່ງມາດປາດຖະໜາ ແລະ ຜົນປະໂຫຍດຂອງປະຊາຊົນບັນດາເຜົ່າ, ບັນດາຊັ້ນຄົນໃນທົ່ວສັງຄົມ, ເຮັດໃຫ້ແນວທາງການເມືອງ ແລະ ແນວທາງການຈັດຕັ້ງຂອງພັກ ກາຍເປັນຜະລິດຕະພັນແຫ່ງສະຕິປັນຍາລວມຂອງທົ່ວພັກ, ທົ່ວປວງຊົນເຮົາ.

ສາມາດເວົ້າໄດ້ວ່າການກະກຽມກອງປະຊຸມໃຫຍ່ຂອງພັກເຮົາ ໄດ້ກາຍເປັນຂະບວນການອັນກວ້າງຂວາງຂອງມະຫາຊົນ; ເປັນການປະກອບສ່ວນອັນສຳຄັນ ເຮັດໃຫ້ການຈັດຕັ້ງຜັນຂະຫຍາຍແນວທາງປ່ຽນແປງໃຫມ່ໄດ້ດຳເນີນໄປຢ່າງເລິກເຊິງຮອບດ້ານ ແລະ ມີຜົນສຳເລັດຕື່ມອີກຫຼາຍປະການ.

ກອງປະຊຸມໃຫຍ່ຂອງພວກເຮົາ ຂໍສະແດງຄວາມຊົມເຊີຍຜົນງານດັ່ງກ່າວຂອງທົ່ວພັກ, ທົ່ວປວງຊົນເຮົາ ຢ່າງສຸດອົກສຸດໃຈ ມານະໂອກາດນີ້ດ້ວຍ.

ບັນດາສະຫາຍທີ່ຮັກແພງ,

ກອງປະຊຸມໃຫຍ່ຂອງພວກເຮົາໃນຄັ້ງນີ້, ດຳເນີນໄປໃນສະພາບແວດລ້ອມສາກົນ ທີ່ມີການຜັນແປໄປຢ່າງສະຫຼັບຊັບຊ້ອນ, ເຮັດໃຫ້ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດຂອງພວກເຮົາ ຕ້ອງໄດ້ປະສົບກັບການທົດສອບທ້າທາຍຫຼາຍປະການ.

ອີງໃສ່ພຶດຕິກຳທີ່ຜ່ານມາ ແລະ ບັນດາຫຼັກການແຫ່ງການປ່ຽນແປງໃຫມ່ ທີ່ພັກເຮົາໄດ້ວາງອອກນັ້ນ ກອງປະຊຸມໃຫຍ່ຂອງພວກເຮົາ ຈະຕ້ອງໄດ້ສັງເກດຕີລາຄາການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ 9 ຂອງພັກ ຕິດພັນກັບການສະຫຼຸບຕີລາຄາການປ່ຽນແປງໃຫມ່ໃນໄລຍະ 30ຜ່ານມາ, ຖອດຖອນເອົາບົດຮຽນທີ່ເປັນປະໂຫຍດ ແລະ ຕົກລົງ ແນວທາງທິດທາງ ໜ້າທີ່ລວມ ກໍຄືທິດທາງ ພັດທະນາເສດຖະກິດ-ສັງຄົມຂອງຊາດ ເພື່ອຊຸກຍູ້ພາລະກິດປ່ຽນແປງໃໝ່ ໃຫ້ກ້າວຂຶ້ນຢ່າງໜັກແໜ້ນຕໍ່ໄປ; ສືບຕໍ່ບູລະນະລະບອບປະຊາທິປະໄຕປະຊາຊົນ, ສ້າງບັນດາປະຖົມໄຈໃຫ້ແກ່ການກ້າວຂຶ້ນສັງຄົມນິຍົມເທື່ອລະກ້າວ.

ກອງປະຊຸມໃຫຍ່ຂອງພວກເຮົາຄັ້ງນີ້ ຍັງຈະໄດ້ພິຈາລະນາ ຮັບຮອງເອົາຮ່າງກົດລະບຽບປ່ຽນແປງຂອງພັກ ແນໃສ່ສ້າງພັກເຮົາ ໃຫ້ນັບມື້ເຕີບໃຫຍ່ ເຂັ້ມແຂງ ໜັກແໜ້ນກ້າວຂຶ້ນ ເຮັດຫຼອນພາລະກຳປະຫວັດສາດຂອງຕົນໃນໄລຍະໃຫມ່.

ໜ້າທີ່ສຳຄັນອັນໜຶ່ງຂອງກອງປະຊຸມໃຫຍ່ ແມ່ນການເລືອກຕັ້ງຄະນະບໍລິຫານງານສູນກາງພັກສະໄໝທີ 10 ທີ່ທັງສະແດງເຖິງຄວາມສາມັກຄີເປັນຈິດໜຶ່ງໃຈດຽວຂອງພັກ, ຮັບປະກັນລັກສະນະສືບທອດ ແລະ ເຮັດໃຫ້ຖັນແຖວການນຳນັບມື້ນັບໜຸ່ມແໜ້ນ ປະກອບດ້ວຍບັນດາສະຫາຍທີ່ມີຄຸນທາດການເມືອງໜັກແໜ້ນ ມີຄຸນສົມບັດສິນທຳອັນຜ່ອງໄສ, ມີຄວາມຮູ້ຄວາມສາມາດ ແລະ ມີຄວາມຮັບຜິດຊອບສູງ ເພື່ອແບກຫາບພາລະໜ້າທີ່ອັນໜັກໜ່ວງທີ່ພັກ ແລະ ປະເທດຊາດມອບໝາຍໃຫ້. ທິດທາງໜ້າທີ່ຕ່າງໆທີ່ກ່າວມານັ້ນ ລ້ວນແລ້ວແຕ່ເປັນບັນຫາໃຫຍ່ ແລະ ສຳຄັນທີ່ພົວພັນເຖິງຊະຕະກຳຂອງປະເທດຊາດ ແລະ ຂອງປະຊາຊົນບັນດາເຜົ່າ ຂ້າພະເຈົ້າ, ຫວັງວ່າບັນດາສະຫາຍຜູ້ແທນຈະເຊີດຊູຄວາມຮັບຜິດຊອບ, ເສີມຂະຫຍາຍປະຊາທິປະໄຕທຢ່າງແຂງແຮງ, ສຸມຈິດສຸມໃຈ ສະຕິປັນຍາແລະ ກຳລັງແຮງເຂົ້າໃສ່ການຄົ້ນຄ້ວາຄິດຫງຳ ແລະ ປະກອບຄວາມເຫັນຢ່າງມີຄຸນນະພາບສູງ, ຕົກລົງບັນຫາຕ່າງໆຢ່າງຖືກຕ້ອງ, ເຮັດໃຫ້ກອງປະຊຸມພວກເຮົາບັນລຸຜົນສຳເລັດຢ່າງສະງ່າງາມ.

ໃນນາມຄະນະປະທານ, ຂ້າພະເຈົ້າ ຂໍປະກາດໄຂກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ 10 ຂອງພັກປະຊາຊົນປະຕິວັດລາວ ຢ່າງເປັນທາງການນັບແຕ່ເວລານີ້ເປັນຕົ້ນໄປ.

Off

Comments are closed.