19th Jan2016

ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ 10 ຂອງພັກໄຂຂຶ້ນຢ່າງສະງ່າຜ່າເຜີຍ

by somchan

ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 10 ຂອງພັກປະຊາຊົນປະຕິວັດລາວ ໄຂຂຶ້ນຢ່າງສະງ່າຜ່າເຜີຍ ໃນວັນທີ່18 ມັງກອນ 2016 ພາຍໃຕ້ຄຳຂວັວນ ‘ຍົກສູງຄວາມສາມາດນຳພາ ແລະ ລັກສະນະນຳພາຂອງພັກ,ເພີ່ມທະວີມະຫາສາມັກຄີທົ່ວປວງຊົນທັງຊາດ,ຢຶດໝັ້ນແນວທາງປ່ຽນແປງໃຫມ່ຮອບດ້ານ ແລະ ມີຫຼັກການ, ປົກປັກຮັກສາ ແລະ ພັດທະນາປະເທດຊາດຕາມທິດທີ່ຍືນຍົງ ສູ່ຈຸດໝາຍສັງຄົມນິຍົມ ຢ່າງໜັກແໜ້ນ’ ໂດຍສະຫາຍຈູມມະລີ ໄຊຍະສອນ ເລຂາທິການໃຫຍ່ຄະນະບໍລິຫານງານສູນກາງພັກ, ກົມການເມືອງສູນກາງພັກ, ຄະນະເລຂາທິການສູນກາງພັກ,ກຳມະການສູນກາງພັກ ພ້ອມດ້ວຍບັນດາສະມາຊິກພັກສົມບູນ ຈຳນວນ 680ກວ່າສະຫາຍ ທີ່ຕົວແທນໃຫ້ບັນດາສະມາຊິກພັກທົ່ວປະເທດ ຈຳນວນ 250.000ກວ່າສະຫາຍ.

ສະຫາຍຈູມມະລີກ່າວສູນທອນທົດໄຂກອງປະຊຸມຢ່າງເປັນທາງການ ເຊິ່ງມີບາງຕອນສຳຄັນວ່າ: ກອງປະຊຸມໃຫຍ່ຄັ້ງທີ 10ຂອງພັກໄຂຂຶ້ນໃນຄັ້ງນີ້ ແມ່ນເຫດການການເມືອງທີ່ມີຄວາມສຳຄັນຢ່າງຍິ່ງ, ທັງເປັນບາດລ້ຽວປະຫວັດສາດ ໃນການກຳນົດທິດທາງໜ້າທີ່ ສຳລັບການພັດທະນາປະເທດຊາດ ເພື່ອກ້າວໄປສູ່ຈຸດໝາຍທີ່ວາງໄວ້ດ້ວຍທ່ວງທ່າໃຫມ່. ການສະຖາປະນາລະບອບປະຊາທິປະໄຕ ປະຊາຊົນ ຂອງປະເທດເຮົາ ມາເຖິງປະຈຸບັນ ໄດ້ກ້າວຂ້າມປີທີ 40 ແລະ ພາລະກິດປ່ຽນແປງໃໝ່ກໍໄດ້ດຳເນີນມາເປັນເວລາ 30ປີແລ້ວ. ຜ່ານໄລຍະດັ່ງກ່າວມີຫຼາຍບັນຫາສຳຄັນ ທີ່ພັກເຮົາຕ້ອງໄດ້ສະຫຼຸບ ແລະ ຕີລາຄາໃຫ້ຖືກຕ້ອງ ເລິກເຊິງແນໃສ່ເສີມຂະຫຍາຍຜົນສຳເລັດ ແລະ ດ້ານຕັ້ງໜ້າ, ຈຳກັດແກ້ໄຂຂໍ້ຄົງຂ້າງ ເພື່ອສືບຕໍ່ນຳເອົາພາລະກິດປະຕິວັດຂອງພວກເຮົາກ້າວຂຶ້ນຈຸດໝາຍສັງຄົມນິຍົມຢ່າງໜັກແໜ້ນ. ບົນຈິດໃຈດັ່ງກ່າວ ຄະນະບໍລິຫານງານສູນກາງພັກ ສະໄໝທີ 9 ໄດ້ອອກມະຕິກ່ຽວກັບກະກຽມກອງປະຊຸມໃຫຍ່ຄັ້ງທີ 10ຂອງພັກ, ເຊິງໄດ້ປຸກລະດົມສ້າງຂະບວນການໃນທຸກຂົງເຂດວຽກງານ ໂດຍການເຂົ້າຮ່ວມຢ່າງກວ້າງຂວາງຂອງສະມາຊິກພັກ, ຕິດພັນກັບການສະເຫຼີມສະຫຼອງວັນສຳຄັນທາງປະຫວັດສາດຂອງພັກ ຂອງຊາດ ຢ່າງມີເນື້ອໃນອັນເລີກເຊິ່ງ.

ອັນພົ້ນເດັ່ນ ໃນ ຂະບວນການກະກຽມແກ່ກອງປະຊຸມໃຫຍ່ຄັ້ງນີ້ ແມ່ນຕິດພັນກັບການປັບປຸງປົວແປງພັກ ໂດຍຜ່ານບັ້ນດຳເນີນຊີວິດການເມືອງ ແລະ ດຳເນີນກອງປະຊຸມໃຫຍ່ສາມຂັ້ນ ຢ່າງທົ່ວເຖີງ. ຜ່ານຂະບວນການເລົ່ານັ້ນ ເຮັດໃຫ້ພັກເຮົາມີການປັບປຸງບູລະນະທາງດ້ານການເມືອງ-ແນວຄິດ ແລະການຈັດຕັ້ງຕື່ມອີກບາດກ້າວໜຶ່ງ, ສະມາຊິກພັກ ກໍໄດ້ຮັບການບຳລຸງຍົກລະດັບທາງດ້ານຄວາມຮັບຮູ້, ທັດສະນະຫຼັກໝັ້ນ ການປ່ຽນແປງຕົນເອງໃຫ້ກ້າວໜ້າກວ່າເກົ່າ. ພ້ອມກັນນັ້ນ ຍັງໄດ້ນໍາເອົາຮ່າງລາຍງານການເມືອງ, ຮ່າງວິໄສທັດ, ແຜນຍຸດທະສາດ 10ປີ ແລະ ທິດທາງແຜນການພັດທະນາເສດຖະກິດ-ສັງຄົມ 5 ປີ ຄັ້ງທີ 8 (2016-2020), ສະມາຊິກພັກ ກໍຄືມະຫາຊົນ ໄດ້ເຊີດຊູຈິດໃຈເປັນເຈົ້າຂອງປະເທດຊາດ ແລະ ເສີມຂະຫຍາຍປະຊາທິປະໄຕຢ່າງເປັນຮູບປະທຳຕົວຈິງ, ປະກອບຄວາມຄິດເຫັນກ່ຽວກັບບັນຫາສຳຄັນຕ່າງໆ ທີ່ສ່ອງແສງຖືກຕ້ອງກັບສະພາວະຄວາມເປັນຈິງຂອງປະເທດຊາດ; ຖືກກັບເຈດຈຳນົງ, ຄວາມມຸ້ງມາດປາດຖະໜາ ແລະ ຜົນປະໂຫຍດຂອງປະຊາຊົນບັນດາເຜົ່າ ເຮັດໃຫ້ແນວທາງການເມືອງ ແລະການຈັດຕັ້ງຂອງພັກ ກາຍເປັນຜະລິດຕະພັນແຫ່ງສະຕິປັນຍາລວມຂອງທົ່ວພັກ, ທົ່ວປວງຊົນ.

ໜ້າທີ່ສຳຄັນອັນໜຶ່ງກອງປະຊຸມໃຫຍ່ຄັ້ງນີ້ ແມ່ນການເລືອກຕັ້ງຄະນະບໍລິຫານງານສູນກາງພັກສະໄໝທີ 10 ທັງສະແດງເຖິງຄວາມສາມັກຄີເປັນຈິດໜຶ່ງໃຈດຽວຂອງພັກ, ທັງຮັບປະກັນລັກສະນະສືບທອດ ແລະ ເຮັດໃຫ້ຖັນແຖວການນຳນັບມື້ນັບໜຸ່ມແໜ້ນ, ປະກອບດ້ວຍບັນດາສະຫາຍທີ່ມີຄຸນທາດການເມືອງໜັກແໜ້ນ ມີຄຸນສົມບັດສິນທຳອັນຜ່ອງໄສ, ມີຄວາມຮູ້ຄວາມສາມາດ ມີຄວາມຮັບຜິດຊອບສູງ ເພື່ອແບກຫາບພາລະໜ້າທີ່ອັນໜັກໜ່ວງທີ່ພັກ ແລະ ປະເທດຊາດມອບໝາຍໃຫ້.

 

Off

Comments are closed.