02nd Aug2022

ໜ່ວຍສະຫະພັນແມ່ຍິງ ກົມສື່ມວນຊົນ ປກສ ເຊື່ອມຊຶມເອກະສານກຽມເປີດບັ້ນດຳເນີນຊິວິດການເມືອງ ປະຈຳປີ 2022.

by Peaung Thanonkeo

ໜ່ວຍສະຫະພັນແມ່ຍິງ ກົມສື່ມວນຊົນ ກົມໃຫຍ່ການເມືອງ ກະຊວງ ປກສ ໄດ້ເປີດກອງປະຊຸມເຜີຍແຜ່ເອກະສານກ່ຽວກັບການຈັດຕັ້ງປະຕິບັດຂໍ້ແຂ່ງຂັນ 3 ດີ ເພື່ອກຽມເປີດບັ້ນດຳເນີນຊີວິດການເມືອງຕີລາຄາແບ່ງປະເພດການຈັດຕັ້ງປະຕິບັດຂໍ້ແຂ່ງຂັນ 3 ດີຂອງສະຫະພັນແມ່ຍິງລາວ ປະຈຳປີ 2022 ໃນວັນທີ 2 ສິງຫາ 2022 ທີ່ຫ້ອງປະຊຸມຂອງກົມ, ເປັນປະທານໂດຍ ພັທ ນາງຄຳແສງ ທຳມະວົງ ຫົວໜ້າບັນນາທິການວາລະສານ ປະທານສະຫະພັນແມ່ຍິງກົມສື່ມວນຊົນ, ໂດຍມີຄະນະໜ່ວຍ, ຫົວໜ້າຈຸ, ຮອງຈຸ ແມ່ຍິງ ພາຍໃນກົມສື່ມວນຊົນເຂົ້າຮ່ວມ.

ພັທ ນາງ ວົງສະຫວ່າງ ວົງນະຈັນ ຮອງບັນນາທິການວິທະຍຸ ຮອງປະທານສະຫະພັນແມ່ຍິງກົມສື່ມວນຊົນ ໄດ້ຍົກໃຫ້ເຫັນເນື້ອໃນ ຄຳຂວັນ ແລະ ຂໍ້ແຂ່ງຂັນ 3 ດີ ຂອງສະຫະພັນແມ່ຍິງລາວ ໃນນີ້ ມີຄຳຂວັນວ່າ ” ພັດທະນາຄວາມສະເໝີພາບຍິງ-ຊາຍ ຕິດພັນກັບການພັດທະນາປະເທດຊາດ “. ສຳລັບຂໍ້ແຂ່ງຂັນ 3 ດີ ປະກອບມີ: ພົນລະເມືອງດີ, ພັດທະນາດີ ແລະ ສ້າງຄອບຄົວດີ; ພົນລະເມືອງ ແມ່ນຕ້ອງເປັນຜູ້ທີ່ມີນໍ້າໃຈຮັກຊາດ, ຮັກລະບອບປະຊາທິປະໄຕ ເຂົ້າຮ່ວມຢ່າງຕັ້ງໜ້າໃນການປົກປັກຮັກສາ ແລະ ສ້າງສາພັດທະນາປະເທດ, ມີແບບແຜນການດຳລົງຊີວິດທີ່ປອດໃສຂາວສະອາດ, ມີການພົວພັນກັບສັງຄົມສອດຄ່ອງກັບປະເພນີອັນດີງາມຂອງຊາດ ແລະ ປະຕິບັດລະບຽບກົດໝາຍ; ພັດທະນາດີ ແມ່ນພັດທະນາຕົນເອງໃຫ້ມີສຸຂະພາຍແຂງແຮງ, ມີຄວາມຫ້າວຫັ້ນໃນການປະຕິບັດໜ້າທີ່, ພັດທະນາດ້ານຈິດໃຈ ມີຄຸນທາດການເມືອງທີ່ໜັກແໜ້ນ, ມີຫົວຄິດປະດິດສ້າງ ເຮັດວຽກຢ່າງມີແບບແຜນ ແລະ ທັນສະໄໝ, ຍົກລະດັບຄວາມຮູ້ໃຫ້ສູງຂຶ້ນ, ພັດທະນາອົງການຈັດຕັ້ງສະຫະພັນແມ່ຍິງ ແລະ ພັດທະນາປະເທດຊາດ ໂດຍການເຂົ້າຮ່ວມປະຕິບັດ 2 ໜ້າທີ່ຍຸດທະສາດ ເປັນເຈົ້າການອະນຸລັກ, ສົ່ງເສີມມູນເຊື້ອວັດທະນາທຳອັນດີງາມຂອງຊາດ ແລະ ມູນເຊື້ອທີ່ເປັນເອກະລັກສະເພາະຂອງແມ່ຍິງລາວບັນດາເຜົ່າ; ການສ້າງຄອບຄົວດີ ແມ່ນຜົວ-ເມຍ ແລະ ສະມາຊິກໃນຄອບຄົວພ້ອມກັນສ້າງຄອບຄົວໃຫ້ມີຄວາມອົບອຸ່ນ, ມີຄວາມຖືກຕ້ອງປອງດອງ, ຕ້ານການໃຊ້ຄວາມຮຸນແຮງຕໍ່ແມ່ຍິງ ແລະ ເດັກໃນຄອບຄົວ, ສົ່ງເສີມຄວາມກ້າວໜ້າຂອງແມ່ຍິງ ແລະ ຄວາມສະເໝີພາບຍິງ-ຊາຍໃຫ້ດີຂຶ້ນ, ສ້າງເງື່ອນໄຂໃຫ້ສະມາຊິກໃນຄອບຄົວໄດ້ຮັບການສຶກສາ, ມີສຸຂະພາບທີ່ແຂງແຮງ.

ນອກນັ້ນ, ພັທ ນາງ ວົງສະຫວ່າງ ວົງນະຈັນ ຍັງໄດ້ເຜີຍແຜ່ບົດແນະນຳ ກ່ຽວກັບການຈັດຕັ້ງປະຕິບັດຂໍ້ແຂ່ງຂັນ 3 ດີ ຂອງສະຫະພັນແມ່ຍິງກະຊວງ ປກສ ແລະ ເອກະສານທີ່ກ່ຽວຂ້ອງອື່ນໆອີກຈຳນວນໜຶ່ງ ເພື່ອໃຫ້ບັນດາສະຫາຍຫົວໜ້າຈຸ-ຮອງຈຸ ນຳໄປເຜີຍແຜ່ໃຫ້ສະມາຊິກແມ່ຍິງພາຍໃນແຕ່ລະຈຸເຊື່ອມຊຶມ ແລະ ເຂົ້າໃຈຢ່າງເລິກເຊິ່ງ ເພື່ອພ້ອມກັນດຳເນີນຊີວິດການເມືອງຂອງແມ່ຍິງໃຫ້ບັນລຸຄາດໝາຍທີ່ວາງໄວ.

ພ້ອມນີ້ ພັທ ນາງ ຄຳແສງ ທຳມະວົງ ໃຫ້ຮູ້ວ່າ: ການເຜີຍແຜ່ເອກະສານຂອງແມ່ຍິງໃນຄັ້ງນີ້ແມ່ນເປັນການກະກຽມໃຫ້ແກ່ການເປີດບັ້ນດຳເນີນຊີວິດການເມືອງການຈັດຕັ້ງປະຕິບັດຂໍ້ແຂ່ງຂັນ 3 ດີ ປະຈຳປີ 2022 ຂອງໜ່ວຍສະຫະພັນແມ່ຍິງກົມສື່ມວນຊົນ ຕາມການແຈ້ງການຂອງສະຫະພັນແມ່ຍິງກົມໃຫຍ່ການເມືອງ ປກສ ເຊິ່ງຈະເປີດຂຶ້ນໃນໄວໆນີ້ ແລະ ໃຫ້ສຳເລັດຕາມເວລາທີ່ກຳນົດໄວ້. ສະນັ້ນ, ຈິ່ງຮຽກຮ້ອງມາຍັງສະມາຊິກແມ່ຍິງພາຍໃນກົມ ໂດຍສະເພາະຄະນະແມ່ຍິງ, ຄະນະຈຸ ຈົ່ງພ້ອມກັນຍົກສູງ ຄວາມຮັບຜິດຊອບ ແລະ ຈັດຕັ້ງປະຕິບັດໃຫ້ໄດ້ຕາມຄາດໝາຍສູ້ຊົນ; ພ້ອມກັນຕຳນິກໍ່ສ້າງກັນຢ່າງພາວະວິໃສ ແລະ ຮັກສາໄດ້ຄວາມສາມັກຄີພາຍໃນໃຫ້ແໜ້ນແຟ້ນ. ນອກນັ້ນ, ຄະນະຈຸແຕ່ລະຈຸ ໃຫ້ເອົາໃຈໃສ່ສຶກສາອົບຮົມການເມືອງແນວຄິດໃຫ້ສະມາຊິກແມ່ຍິງພາຍໃນຄວາມຮັບຜິດຊອບຂອງຕົນ, ຮ່ວມຊີວິດກັນຢ່າງເປັນປົກກະຕິ, ພັດທະນາຕົນເອງໃຫ້ທຽບເທົ່າກັບເພດຊາຍ.

Comments are closed.