03rd Aug2022

ປກສ ກຸ່ມໂຄກສີວິໄລ ຈັບຕົວ ຜູ້ກໍ່ເຫດລັກຊັບປະເພດເຫຼັກເສັ້ນ

by somda phoneor

ທ້າວ ທອງ ອາຍຸ 30 ປີ ຢູ່ ບ້ານໂຄກສະອາດ ເມືອງໄຊທານີ ນະຄອນຫຼວງວຽງຈັນ ຖືກເຈົ້າໜ້າທີ່ ປກສ ກຸ່ມໂຄກສີວິໄລ ຈັບຕົວ ໃນວັນທີ 1 ສິງຫາ 2022, ຂໍ້ຫາລັກຊັບພົນລະເມືອງ (ລັກເຫຼັກ) ຈໍານວນ 15 ເສັ້ນ 130 ກິໂລກຣາມ ຂອງບໍລິສັດວາດສະໜາກໍ່ສ້າງ ຕັ້ງຢູ່ເຂດນິຄົມອຸດສະຫາກຳໂນນທອງ ເມືອງໄຊທານີ.

ພັຕ ລີວັງ ສັງພາສິດ ເຈົ້າໜ້າທີ່ ປກສ ກຸ່ມໂຄກສີວິໄລ ໃຫ້ຮູ້ວ່າ: ເວລາ 9: ໂມງ 30 ນາທີ ວັນທີ 1 ກໍລະກົດ 2022 ໄດ້ຮັບແຈ້ງຈາກພະນັກງານບໍລິສັດວາດສະໜາກໍ່ສ້າງ ວ່າ: ມີຄົນຮ້າຍລັກເຫຼັກ ຈຳນວນ 15 ເສັ້ນ ຂອງບໍລິສັດ ແລ້ວເອົາຕົວຫຼົບໜີ ພາຍຫຼັງໄດ້ຮັບແຈ້ງຈິ່ງໄດ້ລົງກວດກາຊັນນະສູດສະຖານທີ່ເກີດເຫດ ແລະ ປະສານໄປຍັງເຈົ້າຂອງຮັບຊື້-ຂາຍເຫຼັກເສດ ຢູ່ບ້ານໄຊສົມບູນ ເມືອງໄຊທານີ  ເພື່ອກວດຄົ້ນ ຈິ່ງພົບເຫັນເຫຼັກຈຳນວນດັ່ງກ່າວ ແລະ ຮູ້ຜູ້ກະທຳຜິດຈິ່ງໄດ້ເຂົ້າຈັບຕົວ ທ້າວ ທອງ ຢູ່ບ້ານໂຄກສະອາດ ເມືອງໄຊທານີ.

ສອບສວນເບື້ອງຕົ້ນ ຜູ້ກ່ຽວໃຫ້ການຮັບສາລະພາບວ່າ: ໄດ້ສົມຮູ້ຮ່ວມຄິດກັບໝູ່ລັກເອົາເຫຼັກເສັ້ນຢູ່ບໍລິສັດວາດສະໜາ ພາຍຫຼັງລັກແລ້ວໄດ້ພາກັນເອົາໄປຂາຍໃຫ້ຢູ່ຮ້ານຮັບ-ຊື້ເຫຼັກເສດ ຢູ່ເຂດບ້ານໄຊສົມບູນ ໄດ້ເງິນຈາກການຊື້ຂາຍໄດ້ນຳມາແບ່ງກັນໃຊ້ຈ່າຍ.

ປັດຈຸບັນ ເຈົ້າໜ້າທີ່ ປກສ ກຸ່ມໂຄກສີວິໄລ ສົ່ງມອບຕົວ ໃຫ້ກອງບັນຊາການ ປກສ ເມືອງໄຊທານີ ເພື່ອດຳເນີນຄະດີຕາມຂັ້ນຕອນຂອງກົດໝາຍ.

Comments are closed.