03rd Aug2022

ຊາວໜຸ່ມກອງບັນຊາການປ້ອງກັນເຄື່ອນທີ່ ສ້າງຂະບວນການອອກແຮງງານລວມ

by somda phoneor

ຊາວໜຸ່ມກອງບັນຊາການປ້ອງກັນເຄື່ອນທີ່ ກະຊວງ ປກສ ໄດ້ສ້າງຂະບວນການອອກແຮງງານລວມເພື່ອຕ້ອນຮັບວັນສໍາຄັນຂອງພັກຂອງຊາດ ໃນວັນທີ 3 ສິງຫາ 2022 ນໍາພາໂດຍ ພັທ ຫຼຽນທອງ ຄໍາສຸລິປັນຍາ ຮອງເລຂາຄະນະບໍລິຫານງານຊາວໜຸ່ມ ກອງບັນຊາການປ້ອງກັນເຄືອນທີ່, ມີຄະນະໜ່ວຍຊາວໜຸ່ມ, ຈຸຊາວໜຸ່ມ ພ້ອມດ້ວຍສະມາຊິກຊາວໜຸ່ມ ເຂົ້າຮ່ວມ.

ພັທ ຫຼຽນທອງ ຄໍາສຸລິປັນຍາ ກ່າວວ່າ: ການສ້າງຂະບວນການອອກແຮງງານລວມຄັ້ງນີ້, ຈະໄດ້ອະນາໄມຕາມສອງຝາກແຄມທາງເຂົ້າກອງບັນຊາການ ເຊິ່ງໄດ້ພ້ອມກັນຕັດຫຍ້າ, ຖາງຫຍ້າ, ຊ້ວນດິນ ແລະ ໃຊ້ລົດສີດນໍ້າລາງດິນອອກຈາກສອງຝາກທາງໃຫ້ມີຄວາມສະອາດຈົບງາມ, ເຮັດໃຫ້ການສັນຈອນໄປ-ມາ ຂອງພະນັກງານ-ນັກຮົບ ເວລາເຂົ້າ-ອອກ ກອງບັນຊາການມີຄວາມສະດວກສະບາຍຍິ່ງຂຶ້ນ.

ນອກຈາກນີ້, ກໍເພື່ອເປັນການຕ້ອນຮັບວັນສໍາຄັນຂອງພັກຂອງຊາດເປັນຕົ້ນ: ວັນລັດຖະທໍາມະນູນແຫ່ງ ສປປ ລາວ ຄົບຮອບ 31 ປີ (15 ສິງຫາ 1991-15 ສິງຫາ 2022), ວັນຍຶດອໍານາດ 23 ສິງຫາ 1945 ແລະ 23 ສິງຫາ 1975 ໃຫ້ເປັນຂະບວນຝົດຟື້ນ, ທັງເປັນການທໍາລາຍບ່ອນເພາະພັນຍຸງລາຍເພື່ອປ້ອງກັນພະຍາດໄຂ້ຍຸງໃນລະດູຝົນ, ພ້ອມນີ້, ກໍຍັງເປັນການຮັດແໜ້ນຄວາມສາມັກຄີລະຫວ່າງຄະນະບໍລິຫານງານຊາວໜຸ່ມ, ໜ່ວຍຊາວໜຸ່ມ ແລະ ສະມາຊິກຊາວໜຸ່ມ ພາຍໃນກອງບັນຊາການໃຫ້ມີຄວາມແໜ້ນແຟ້ນຂຶ້ນ.

Comments are closed.