04th Aug2022

ກອງປະຊຸມສະຫຼຸບວຽກງານ 6 ເດືອນຕົ້ນປີ ແລະ ທິດທາງ 6 ເດືອນທ້າຍປີ 2022 ຂອງວິທະຍາຄານສັນຕິບານປະຊາຊົນ

by Peaung Thanonkeo

ວິທະຍາຄານສັນຕິບານປະຊາຊົນ ກະຊວງປ້ອງກັນຄວາມສະຫົງບ ໄດ້ຈັດກອງປະຊຸມສະຫຼຸບວຽກງານ 6 ເດືອນ ຕົ້ນປີ ແລະ ວາງທິດທາງແຜນການ 6 ເດືອນທ້າຍປີ 2022 ໃນວັນທີ 4 ສິງຫານີ້ ໂດຍການເປັນປະທານຂອງ ພົຈວ ປອ ວັນສົມ ສີສົມບັດ ຫົວໜ້າອຳນວຍການ ວິທະຍາຄານສັນຕິບານປະຊາຊົນ, ມີຄະນະອຳນວຍການ, ຫ້ອງ, ພະແນກ, ຄູອາຈານ ແລະ ນັກສຶກສາເຂົ້າຮ່ວມ

ພັອ ເຫວີຍສຸກ ພົມມະຈັນ ຫົວໜ້າຫ້ອງການ ວິທະຍາຄານສັນຕິບານປະຊາຊົນ ໄດ້ຜ່ານບົດສະຫຼຸບການຈັດຕັ້ງປະຕິບັດວຽກງານໃນ 6 ເດືອນຜ່ານມາ ຄະນະພັກ, ຄະນະອຳນວຍການວິທະຍາຄານໄດ້ເອົາໃຈໃສ່ເຮັດວຽກງານການເມືອງນຳພາແນວຄິດໃຫ້ພະນັກງານ ຄູ-ອາຈານ ແລະ ນັກສຶກສາເຮັດວຽກງານປ້ອງກັນຄວາມສະຫົງບຢ່າງເປັນປົກກະຕິ ນອກນັ້ນ ໄດ້ເອົາໃຈໃສ່ຄຸ້ມຄອງ, ປ້ອງກັນກວດກາການເຄື່ອນໄຫວ, ການພົວພັນຂອງພະນັກງານ, ຄູອາຈານ ແລະ ນັກສຶກສາເຊີ່ງສະແດງອອກພາຍໃນກົມກອງມີຄວາມສະຫົງບໂດຍພື້ນຖານ, ພະນັກງານ, ຄູອາຈານ ແລະ ນັກສຶກສາມີຄຸນທາດການເມືອງໜັກແໜ້ນ, ມີຄວາມອຸ່ນອ່ຽນທຸ່ນທ່ຽງຕັ້ງໜ້າປະຕິບັດໜ້າທີ່ການເມືອງທີ່ໄດ້ຮັບມອບໝາຍໄປພ້ອມດຽວກັນນັ້ນກໍ່ໄດ້ປຸກລະດົມ, ຄົ້ນຄ້ວາຮ່ຳຮຽນບັນດາມະຕິຄຳສັ່ງ, ກົດລະບຽບຂອງວິທະຍາຄານສັນຕິບານປະຊາຊົນວາງອອກ ປະສານສົມທົບແໜ້ນກັບບັນດາກົມກອງ ແລະ 7 ບ້ານອ້ອມຂ້າງ ກວດກາເວນຍາມເປັນປະຈຳ, ຈັດຕັ້ງລະບອບປະຈຳການກຽມພ້ອມສູ້ຮົບຕະຫຼອດ 24 ຊົ່ວໂມງ. ເອົາໃຈໃສ່ປັບປຸງທາງດ້ານລະບຽບ, ແບບແຜນການເຄື່ອນໄຫວຂອງນັກສຶກສາດ້ວຍການຄຸ້ມຄອງ 3 ຂັ້ນ ແລະ ຖືເອົາການເຄື່ອນໄຫວປະຕິບັດ 5 ຫຼັກມູນຂອງກະຊວງສຶກສາທິການ ແລະ ກິລາວາງອອກເປັນການຝຶກຝົນຫຼໍ່ຫຼອມ ສົມຄູ່ກັບການປະຕິບັດແນວທາງ, ນະໂຍບາຍ, ມະຕິ, ຄຳສັ່ງ, ຂໍ້ກຳນົດ, ກົດລະບຽບ ແລະ ກົດໝາຍຂອງລັດ ກໍຄືຂອງກຳລັງປ້ອງກັນຄວາມສະຫົງບ, ໄດ້ຖືເອົາວຽກງານການສິດສອນຂອງຄູ-ອາຈານເປັນວຽກງານຕົ້ນຕໍໃນການປະຕິບັດໂຄງການ-ຫຼັກສູດໄປຄຽງຄູ່ກັບການຄົ້ນຄ້ວາຕຳລາຮຽນ, ແຕ່ງ ແລະ ກວດແກ້ຮຽບຮຽງບົດສອນ ປະສານສົມທົບກັບກົມວິຊາສະເພາະ, ກອງບັນຊາການ ປກສ ທ້ອງຖິ່ນແລກປ່ຽນທາງດ້ານທິດສະດີ, ຂໍ້ມູນພຶດຕິກຳຕົວຈິງເພື່ອປັບປຸງ ແລະ ພັດທະນາບົດສອນໃຫ້ມີບາດກ້າວອັນໃໝ່ ແລະ ຖືກຕ້ອງກັບສະພາບການໃນປັດຈຸບັນ, ໄລຍະ 6 ເດືອນຜ່ານມາຄູ-ອານຈານໄດ້ຂຶ້ນຫ້ອງສິດສອນນັກສຶກສາທຸກຮຸ່ນ ທຸກລະບົບໄດ້ 4.339 ຊົ່ວໂມງ, ປັບປຸງບົດສອນໄດ້ 20 ບົດ, ໄດ້ຄຸ້ມຄອງໂຄງການ ແລະ ປະຕິບັດຫຼັກສູດການຮຽນ-ການສອນຂອງລະບົບສຶກສາລະດັບປະລິນຍາຕີສຳເລັດຕາມແຜນການທີ່ວາງໄວ້ ແລະ ວຽກງານອື່ນໆ ສຳລັບທິດທາງແຜນການໃນຕໍ່ໜ້າ ສູ້ຊົນປະຕິບັດ 4 ຄາດໝາຍ ແລະ 4 ແຜນງານໃຫຍ່ຂອງກະຊວງປກສ ວາງອອກ ປົກປັກຮັກສາໃຫ້ ວິທະຍາຄານສັນຕິບານປະຊາຊົນໃຫ້ມີຄວາມສະຫົງບປອດໄພ, ປັບປຸງ ແລະ ກໍ່ສ້າງກຳລັງປ້ອງກັນຄວາມສະຫົງບປະຊາຊົນຕາມໂຄງການຫຼັກສູດທີ່ໄດ້ກຳນົດໄວ້, ສືບຕໍ່ປັບປຸງວຽກງານພະລາທິການໃຫ້ສາມາດຕອບສະໜອງໄດ້ຕາມຄວາມຮຽກຮ້ອງຕ້ອງການຂອງວຽກງານໃນໄລຍະໃໝ່ ແລະ ສືບຕໍ່ວຽກງານພົວພັນຮ່ວມກັບພາຍໃນ ແລະ ຕ່າງປະເທດ

Comments are closed.