04th Aug2022

ພິທີປະກາດຍົກຍ້າຍ, ແຕ່ງຕັ້ງຫົວໜ້າກອງບັນຊາການ ປກສ ນະຄອນຫຼວງວຽງຈັນ

by somda phoneor

ໃນວັນທີ 4 ສິງຫາ 2022 ນີ້ ທີ່ກອງບັນຊາການປ້ອງກັນຄວາມສະຫົງບ ນະຄອນຫຼວງວຽງຈັນ ໄດ້ ປະກາດຍົກຍ້າຍ, ແຕ່ງຕັ້ງຫົວໜ້າກອງບັນຊາການປ້ອງກັນຄວາມສະຫົງບນະຄອນຫຼວງວຽງຈັນ, ໂດຍການເປັນກຽດເຂົ້າຮ່ວມຂອງ ພົອ ວິໄລ ຫຼ້າຄຳຟອງ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫົງບ, ມີຄະນະນຳກະຊວງ, ກົມໃຫຍ່, ຄະນະກອງບັນຊາການ ປກສ ນະຄອນຫຼວງວຽງຈັນ, ຄະນະພັກ-ຄະນະບັນຊາ, ພະນັກງານຫຼັກແຫຼ່ງ ອ້ອມຂ້າງ ກອງບັນຊາການ ປກສ ນະຄອນຫຼວງວຽງຈັນເຂົ້າຮ່ວມ.

ພົຈວ ຄອນສະຫັວນ ສົມພາໄຊ ຮອງຫົວໜ້າກົມໃຫຍ່ການເມືອງປ້ອງກັນຄວາມສະຫົງບ ຫົວໜ້າກົມຈັດຕັ້ງພະນັກງານ ໄດ້ຜ່ານຄຳສັ່ງຂອງນາຍົກລັດຖະມົນຕີ ວ່າດ້ວຍການຍົກຍ້າຍນາຍຕຳຫຼວດໄປຮັບໜ້າທີ່ໃໝ່ ໃນນີ້ໄດ້ຍົກຍ້າຍ ພັອ ສຸກພະຈັນ ບຸດດາຄຳ ຫົວໜ້າກອງບັນຊາການປ້ອງກັນຄວາມສະຫົງບ ນະຄອນຫຼວງວຽງຈັນ ໄປຮັບໜ້າທີ່ໃໝ່ຢູ່ກົມໃຫຍ່ຕຳຫຼວດ ແລະ ຍົກຍ້າຍ ພັອ ບົວພັນ ຟອງມະນີ ຮອງຫົວໜ້າກົມໃຫຍ່ຕຳຫຼວດ, ຫົວໜ້າກົມຕຳຫຼວດສະກັດກັ້ນ ແລະ ຕ້ານຢາເສບຕິດ ໄປຮັບໜ້າທີ່ໃໝ່ຢູ່ ກອງບັນຊາການປ້ອງກັນຄວາມສະຫົງບນະຄອນຫຼວງວຽງຈັນ, ພ້ອມດຽວກັນນີ້ ກໍ່ໄດ້ຜ່ານດຳລັດຂອງນາຍົກລັດຖະມົນຕີ ວ່າດ້ວຍການແຕ່ງຕັ້ງ ຫົວໜ້າກອງບັນຊາການປ້ອງກັນຄວາມສະຫົງບນະຄອນຫຼວງວຽງຈັນ ໃນນີ້ໄດ້ແຕ່ງຕັ້ງ ພັອ ພົວພັນ ຟອງມະນີ ເປັນຫົວໜ້າກອງບັນຊາການປ້ອງກັນຄວາມສະຫົງບນະຄອນຫຼວງວຽງຈັນ.

ໂອກາດດັ່ງກ່າວ ພົອ ວິໄລ ຫຼ້າຄໍາຟອງ ກໍາມະການກົມການເມືອງສູນກາງພັກ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫົງບ ໄດ້ມີຄຳເຫັນໂອ້ລົມ ແລະ ໃຫ້ທິດຊີ້ນຳ ເຊີ່ງທ່ານກ່າວວ່າ: ການຍົກຍ້າຍ ແລະ ແຕ່ງຕັ້ງຄັ້ງນີ້ຍ້ອນຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່, ສະນັ້ນຜູ້ທີ່ໄດ້ຖຶກຍົກຍ້າຍ ແລະ ແຕ່ງຕັ້ງ ຕ້ອງໄດ້ຮັບຮູ້ແລະເຂົ້າໃຈຕໍ່ແນວທາງຂອງພັກ-ລັດ, ຕໍ່ກັບຜູ້ທີ່ໄດ້ຖຶກແຕ່ງຕັ້ງຕ້ອງເພີ່ມທະວີຄວາມຮັບຜິດຊອບຂອງຕົນໃຫ້ສູງ, ບັນຫາສຳຄັນແມ່ນຄວາມສາມັກຄີພາຍໃນ ເພື່ອພ້ອມກັນຈັດຕັ້ງປະຕິບັດວຽກງານໃຫ້ມີປະສິທິຜົນ ໂດຍສະເພາະແມ່ນການແກ້ໄຂບັນຫາປະກົດການຫຍໍ້ທໍ້ຕ່າງໆ ພາຍໃນນະຄອນຫຼວງວຽງຈັນ.

Comments are closed.