05th Aug2022

ທ່ານຮອງລັດຖະມົນຕີ ກະຊວງ ປກສ ເຄື່ອນໄຫວຕິດຕາມ ແລະ ຊຸກຍູ້ ສູນການຜະລິດກະສິກຳ ດອນກໍມີ້

by Peaung Thanonkeo

ໃນວັນທີ 4 ສິງຫາ 2022  ພົທ ກົງທອງ ພົງວິຈິດ ຮອງລັດຖະມົນຕີກະຊວງ ປກສ ພ້ອມດ້ວຍຄະນະນຳ ກົມໃຫຍ່ພະລາທິການ, ຄະນະນຳກອງບັນຊາການ ປກສ ແຂວງ ໄຊສົມບູນ ໄດ້ເຄື່ອນໄຫວຕິດຕາມ ຊຸກຍູ້  ແລະ ໃຫ້ທິດຊີ້ນຳ ພະນັກງານນຳພາບັນຊາ ນາຍ ແລະ ພົນຕຳຫຼວດ ທີ່ຮັບຜິດຊອບສູນການຜະລິດກະສິກຳ ດອນກໍມີ້ ບ້ານນໍ້າຍອນ ເມືອງອານຸວົງ ແຂວງໄຊສົມບູນ.

ໂອກາດນີ້ ພຈົວ ໜູຈອນ ກ້ອນທອງດຳ ຮອງຫົວໜ້າກົມໃຫຍ່ພະລາທິການ ປກສ ໄດ້ລາຍງານກ່ຽວກັບການພັດທະນາ ດອນກໍມີ້ ເຊິ່ງດອນດັ່ງກ່າວມີເນື້ອທີ່ທັງໝົດ 480 ເຮັກຕ້າ ເປັນດອນກາງນໍ້າ ເປັນເນີນຊັນ-ລຸບ ສະຫຼັບຊັບຊ້ອນ ມີປ່າໄມນ້ອຍປົກຫຸ້ມ ແລະ ຢູ່ຫ່າງໄກຈາກຊຸມຊົນ. ເນື່ອງໃນໂອກາດ ຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ປີ 2021-2023 ການນຳແຂວງໄຊສົມບູນຈຶ່ງໄດ້ຕົກລົງເຫັນດີມອບ ດອນກໍມີ້ ໃຫ້ກະຊວງປ້ອງກັນຄວາມສະຫງົບ ເພື່ອນຳໃຊ້ເຂົ້າໃນການສ້າງສູນບຳບັດຜູ້ຕິດຢາເສບຕິດ ແລະ ສ້າງເປັນສູນກະສິກຳຕົວແບບຂອງກຳລັງປ້ອງກັນຄວາມສະຫງົບ. ດັ່ງນັ້ນ, ກະຊວງປ້ອງກັນຄວາມສະຫງົບຈຶ່ງໄດ້ຊີ້ນຳໃຫ້ກົມໃຫຍ່ພະລາທິການ ສົມທົບກັບກອງບັນຊາການ ປກສ ແຂວງໄຊສົມບູນ ພັດທະນາດອນດັ່ງກ່າວ ເຮັດການຜະລິດກະສິກໍາ ດ້ວຍການປູກ ແລະ ການລ້ຽງຄື: ລ້ຽວງົວ, ຄວາຍ, ແບ້, ຫມູ, ລ້ຽງປາ… ປູກຫຍ້າເປັນອາຫານສັດ, ປູກຕົ້ນໄມ້ໃຫ້ຫມາກ, ຕົ້ນໄມ້ອຸດສາຫະກໍາ ແລະ ອື່ນໆ ເພື່ອເປັນການ ສ້າງການພະລາທິການກັບທີ່ ຕາມທິດເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ຮັບປະກັນການຕອບສະໜອງສະບຽງອາຫານ ໃຫ້ກໍາລັງປ້ອງກັນຄວາມສະຫງົບ ແລະ ຜະລິດໃຫ້ກາຍເປັນສິນຄ້າ ສະຫນອງໃຫ້ສັງຄົມ ເພື່ອສ້າງແຫຼ່ງລາຍຮັບໃຫ້ກະຊວງປ້ອງກັນຄວາມສະຫງົບ ກໍ່ຄືກອງບັນຊາການ ປກສ ແຂວງ ໄຊສົມບູນ, ນັບຕັ້ງແຕ່ການລົງຈັດຕັ້ງປະຕິບັດບຸກເບີກດອນກໍມີ້ ໃນເດືອນຕຸລາ 2021 ມາເຖິງປະຈຸບັນ ໄດ້ສໍາເລັດການກໍ່ສ້າງເຮືອນພັກພະນັກງານ, ສ້າງເຮືອນໃຫ້ພາກສ່ວນດັດສ້າງ 2 ຫຼັງ ສາມາດບັນຈຸໄດ້ 40 ຄົນ, ສ້າງເຮືອນຄົວລວມພະນັກງານ ໄດ້ 1 ຫຼັງ, ສາງເກັບມ້ຽນເຄື່ອງ 1 ຫຼັງ, ຄອກງົວ-ຄວາຍ 3 ຫຼັງ, ບ່ອນເກັບມ້ຽນເຟືອງມີ 3 ຫຼັງ, ເຮັດຮົ້ວລັດງົວ-ຄວາຍ ໄດ້ 1,500 ແມັດ ແລະ ເຮັດຮົ້ວອ້ອມຫໍພັກ 80 ແມັດ, ສໍາເລັດການບຸກເບີກການປູກຫຍ້າ 27 ເຮັກຕາ ປູກແລ້ວ 23 ເຮັກຕາ, ສໍາເລັດການບຸກເບີກເນື້ອທີ່ປູກເຂົ້າ 2 ເຮັກຕາ, ເຮັດຮົ້ວອ້ອມຫໍພັກ 80 ແມັດ. ປະຈຸບັນມີງົວ ຈໍານວນ 40 ໂຕ ແລະ ຄວາຍ ຈໍານວນ 32 ໂຕ ສຳລັບງົບປະມານທີ່ນຳໃຊ້ເຂົ້າໃນການພັດທະນາການຜະລິດກະສິກຳຢູ່ດອນກໍມີ້ ແມ່ນງົບຂອງກະຊວງປ້ອງກັນຄວາມສະຫງົບ ແລະ ການສະໜັບສະໜູນຈາກບັນດາຫົວ    ໜ່ວຍທຸລະກິດຕ່າງໆ.

ໃນໂອກາດດັ່ງກ່າວ  ພົທ ກົງທອງ ພົງວິຈິດ ຮອງລັດຖະມົນຕີກະຊວງ ປກສ ກໍ່ໄດ້ສະແດງຄວາມຍ້ອງຍໍຊົມເຊີຍຕໍ່ ຄະນະພັກ-ຄະນະນຳ ກົມໃຫຍ່ພະລາທິການ ແລະ ກອງບັນຊາການ ປກສ ແຂວງສົມບູນ ພ້ອມດ້ວຍຄະນະຮັບຜິດຊອບທຸກສະຫາຍທີ່ໄດ້ເອົາໃຈໃສ່ປະຕິບັດໜ້າທີ່ ຕາມການມອບໝາຍຂອງຂັ້ນເທິງຢ່າງເຂັ້ມງວດ ແລະ ມີຜົນສຳເລັດໃນເບື້ອງຕົ້ນ ເຖິງວ່າຍັງອີກຫຼາຍໜ້າວຽກທີ່ຕ້ອງໄດ້ສືບຕໍ່ຈັດຕັ້ງປະຕິບັດ ແຕ່ຖືວ່າສາມາດສ້າງພື້ນຖານໄດ້ດີສົມຄວນ ພ້ອມນີ້, ທ່ານຍັງໄດ້ໃຫ້ທິດຊີ້ນຳແກ່ຄະນະຮັບຜິດຊອບແຕ່ລະຂັ້ນຈົ່ງສືບຕໍ່ສ້າງບົດໂຄງການຢ່າງລະອຽດມີການການກຳນົດແຜນວຽກ, ແຜນຄົນ, ແຜນງົບປະມານ ມີຂັ້ນຕອນຈັດຕັ້ງປະຕິບັດ ມີການກວດກາ, ການປະເມີນຜົນ, ທອດຖອນບົດຮຽນ ແລະ ປັບປຸງແກ້ໄຂໃຫ້ດີຂຶ້ນເລື້ອຍໆ ນອກຈາກໂຄງການກະສິກຳແລ້ວ ຕ້ອງວາງແຜນເຖິງວຽກງານບໍລິການ, ການທ່ອງທ່ຽວຕິດພັນກັບການອະນຸລັກສິ່ງແວດລ້ອມແບບຢືນຍົງ. ທັງໝົດນັ້ນ, ກໍ່ເພື່ອນໍາໃຊ້ທ່າແຮງທີ່ມີສ້າງການພະລາທິການກັບທີ່ ຕາມທິດເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງເທື່ອລະກ້າວ, ແລະ ໃນໂອກາດນີ້ທ່ານຮອງລັດຖະມົນຕີ ກະຊວງ ປກສ ຍັງໄດ້ມອບເຄື່ອງບໍລິໂພກ ແລະ ເງີນຈຳນວນໜຶ່ງເພື່ອຊຸກຍູ້ໃຫ້ນາຍ ແລະ ພົນຕຳຫຼວດ ທີ່ປະຈຳຢູ່ດອນກໍມີ້ໄດ້ນຳໃຊ້ເຂົ້າໃນການແກ້ໄຂຊີວິດການເປັນຢູ່.

 

 

Comments are closed.