05th Aug2022

ເຫດລົດໃຫຍ່ຕໍາກັບລົດຈັກເສຍຊີວິດ ແລ້ວເອົາຕົວຫຼົບໜີ

by Peaung Thanonkeo

ໃນວັນທີ 3 ສິງຫາ 2022 ຜ່ານມານີ້ ພະແນກຕໍາຫຼວດຈະລະຈອນ ຫ້ອງຕໍາຫຼວດ ປກສ ແຂວງວຽງຈັນ ໄດ້ມາຊີ້ແຈງຕໍ່ກັບເຫດການເກີດອຸປະຕິເຫດລົດໃຫຍ່ຕຳລົດຈັກ ແລ້ວຜູ້ຂັບຂີ່ລົດໃຫຍ່ ເອົາຕົວຫຼົບໜີ ເຮັດໃຫ້ມີຜູ້ເສຍຊິວິດ 1 ຄົນ ທີ່ບ້ານໂນນສະຫວ່າງ ເມືອງວຽງຄໍາ ແຂວງວຽງຈັນ ຕໍ່ກັບເຫດການດັ່ງກ່າວ ພັທ ພູວັນນີ ຫຼິ້ນວັນນະລາດ ຫົວໜ້າພະແນກຕຳຫຼວດຈະລາຈອນ ຫ້ອງຕຳຫຼວດ ກອງບັນຊາການ ປກສ ແຂວງວຽງຈັນ ໄດ້ໃຫ້ຮູ້ວ່າ:

ເຫດການດັ່ງກ່າວແມ່ນເກີດຂື້ນໃນ ເວລາ 20 ໂມງ 30 ນາທີ ຂອງວັນທີ 10 ກໍລະກົດ 2022 ສະຖານທີ່ເກີດເຫດແມ່ນຢູ່ຂອບເຂດ ບ້ານໂນນສະຫວ່າງ, ເມືອງວຽງຄຳ, ແຂວງວຽງຈັນ ພາຍຫຼັງເຈົ້າໜ້າທີ່ພະແນກຕຳຫຼວດຈະລາຈອນ ປກສ ແຂວງ ໄດ້ຮັບແຈ້ງເຫດກໍ່ໄດ້ຮີບຮ້ອນຈັດຕັ້ງກຳລັງລົງສົມທົບກັບເຈົ້າໜ້າທີ່ຕຳຫຼວດຈະລາຈອນ ປກສ ເມືອງ ວຽງຄຳ

ແລະ ພາກສ່ວນທີ່ກ່ຽວຂ້ອງລົງກວດກາຊັນນະສູດວັດແທກສະຖານທີ່ເກີດເຫດ ແລະ ເກັບກຳຂໍ້ມູນຫຼັກຖານ, ວັດຖຸສີ້ນສວນ, ຮ່ອງຮອຍຮຸກຖູທີ່ປະໄວ້ຢູ່ໃນສະຖານທີ່ເກີດເຫດ ຕາມຫຼັກການວິຊາສະເພາະ ແລະ ຕາມຂັ້ນຕອນຂອງກົດໝາຍ, ຜ່ານການລົງກວດກາ, ເກັບກໍາຂໍ້ມູນເອົາຄໍາໃຫ້ການຈາກພະຍານຜູ້ທີ່ຮູ້ເຫັນເຫດການ, ຫຼັກຖານຈາກສະຖານທີ່ເກີດເຫດຕົວຈິງ ຈຶ່ງພົບເຫັນວັດຖຸ ສີ້ນສ່ວນການເປ່ເພຂອງລົດໃຫຍ່ທີ່ຕົກເຮ່ຍໃນສະຖານທີ່ເກີດເຫດຮ່ອງຮອຍຮຸກຖູຈາກການເກີດອຸປະຕິເຫດ, ລົດຈັກເປ່ເພ່ 01 ຄັນ ແລະ ຄົນເສຍຊີວິດ 1 ຄົນຊື່ ທ້າວ ແຫຼ້ ອາຍຸ 47 ປີ ອາຊີບ ກຳມະກອນ ປະຈຸບັນແມ່ນອາໃສຢູ່ບ້ານສ້າງໃຫ່ຍ, ເມືອງໂພນໂຮງ, ແຂວງວຽງຈັນ ສ່ວນຜູ່ຂັບຂີ່ລົດໃຫຍ່ແມ່ນໄດ້ເອົາຕົວຫຼົບໜີພ້ອມດ້ວຍລົດໃຫຍ່ຄັນທີ່ເກີດອຸປະຕິເຫດ ຈາກນັ້ນທາງເຈົ້າໜ້າທີ່ພະແນກຕຳຫຼວດຈະລາຈອນ ໄດ້ປະສານສົມທົບກັບເຈົ້າໜ້າທີ່ວິຊາສະເພາະພະແນກຕຳຫຼວດສືບຂ່າວອາຍາ ປກສ ແຂວງ ແລະ ເຈົ້າໜ້າທີ່ຕຳຫຼວດຈະລາຈອນ ປກສ ເມືອງວຽງຄຳ ຮ່ວມກັນເຄື່ອນໄຫວ ເກັບກໍາຂໍ້ມູນ, ຈຶ່ງສາມາດຮູ້ໄດ້ວ່າລົດທີ່ກໍ່ເຫດແລ້ວລົບໜີແມ່ນ ລົດກະບະ ສີຂາວມຸກ, ຍີ່ຫໍ້ນິດສັນ, ໜາຍເລກທະບຽນ ຫຕ 6886 ກຳແພງນະຄອນ ອອກຊື່ ນາງ ຕ້ອຍ ບ້ານໜອງພະຍາ ເມືອງໄຊທານີ ນະຄອນຫຼວງວຽງຈັນ ຫຼັງຈາກນັ້ນທາງເຈົ້າໜ້າທີ່ຕໍາຫຼວດຈະລາຈອນ ສົມທົບເຈົ້າໜ້າທີ່ໆກ່ຽວຂ້ອງລົງກວດກາ ແລະເກັບກໍາຂໍ້ມູນຈາກ ນາງ ຕ້ອຍ ແລະ ຮູ້ວ່າຜູ້ຂັບລົດໃນມື້ນັ້ນແມ່ນ ທ້າວ ນົກ ເບື້ອງຕົ້ນຜູ້ກ່ຽວຍັງບໍ່ຍອມຮັບຕໍ່ກັບການເກີດອຸປະຕິເຫດ ແລະ ໄດ້ປົກປິດຮ່ອງຮອຍດ້ວຍການເຮັດສີໃໝ່ , ສ້ອມແປງຫຼາຍຈຸດທີ່ເປເພ່ ຫຼັງຈາກນັ້ນເຈົ້າໜ້າທີ່ຈຶ່ງໄດ້ກວດກາຮ່ອງຮອຍການເປ່ເພຂອງລົດຄັນດັ່ງກ່າວ ແລ້ວສົມທຽບກັບວັດຖຸສີ້ນສ່ວນທີ່ຕົກເຮ່ຍຢູ່ໃນສະຖານທີ່ເກີດເຫດບວກກັບຄໍາໃຫ້ການຂອງພະຍານຜູ້ທີ່ຮູ້ເຫັນເຫດການ ເຫັນວ່າກົງກັນກັບລົດຍົນຄັນເປົ້າໝາຍດັ່ງກ່າວ ພ້ອມຂໍ້ມູນຫຼັກຖານຕ່າງໆ ທ້າວ ນົກ ຈິ່ງຍອມຮັບສາລະພາບວ່າ ຕົນເອງໄດ້ເປັນຜູ້ກະທຳແທ້ແລ້ວເອົາຕົວຫຼົບໜີ.

ປະຈຸບັນເຈົ້າໜ້າທີພວມດຳເນີນຄະດີຕາມລະບຽບກົດໝາຍ.

 

Comments are closed.