10th Aug2022

ໜ່ວຍສະຫະພັນແມ່ຍິງກົມສື່ມວນຊົນ ປກສ ເປີດບັ້ນດຳເນີນຊີວິດການເມືອງ ຈັດຕັ້ງປະຕິບັດຂໍ້ແຂ່ງຂັນ 3 ດີ

by Peaung Thanonkeo

ໜ່ວຍສະຫະພັນແມ່ຍິງກົມສື່ມວນຊົນ ກົມໃຫຍ່ການເມືອງ ກະຊວງ ປກສ ໄດ້ຈັດກອງປະຊຸມ ເປີດບັ້ນດຳເນີນຊີວິດການເມືອງ ຈັດຕັ້ງປະຕິບັດຂໍ້ແຂ່ງຂັນ 3 ດີ ປະຈຳປີ 2022, ໃນວັນທີ 10 ສິງຫາ 2022, ເປັນປະທານໂດຍພັທ ນາງ ຄໍາແສງ ທໍາມະວົງ ປະທານໜ່ວຍສະຫະພັນແມ່ຍິງກົມສື່ມວນຊົນ ປກສ

ເປັນກຽດເຂົ້າຮ່ວມໂດຍ ພັທ ສາຄອນ ແກ້ວປະເສີດ ຄະນະພັກຮາກຖານຜູ້ຊີ້ນຳອົງການຈັດຕັ້ງມະຫາຊົນ ກົມສື່ມວນຊົນ ພ້ອມດ້ວຍສະມາຊິກເອື້ອຍ-ນ້ອງແມ່ຍິງເຂົ້າຮ່ວມ.

ກອງປະຊຸມໄດ້ຮັບຟັງການຜ່ານມະຕິຕົກລົງວ່າດ້ວຍການອະນຸມັດເປີດບັ້ນດຳເນີນຊີວິດການເມືອງຈັດຕັ້ງປະຕິບັດຂໍ້ແຂ່ງຂັນ 3 ດີ ປະຈຳປີ 2022, ຜ່ານແຜນການຈັດຕັ້ງປະຕິບັດຕີລາຄາແບ່ງປະເພດການຈັດຕັ້ງປະຕິບັດຂໍ້ແຂ່ງຂັນ 3 ດີ ຂອງແມ່ຍິງລາວ ປະຈຳ ປິີ 2022 ແລະ ແນະນໍາວິທີການຂຽນໃບສໍາຫຼວດ.

ໃນໂອກາດນີ້, ພັທ ສາຄອນ ແກ້ວປະເສີດ ໄດ້ໃຫ້ທິດຊີ້ນຳວ່າ: ເພື່ອເປັນການກວດກາຄືນການຈັດຕັ້ງປະຕິບັດຂໍ້ແຂ່ງຂັນ 3 ດີ ຂອງແມ່ຍິງລາວໃນໄລຍະຜ່ານມາ, ໂດຍສະເພາະແມ່ນເພື່ອເປັນການປັບປຸງການຈັດຕັ້ງ ແລະ ສະມາຊິກແມ່ຍິງພາຍໃນໜ່ວຍສະຫະພັນແມ່ຍິງກົມສື່ມວນຊົນ ປກສ ໃຫ້ມີຄວາມໜັກແໜ້ນເຂັ້ມແຂງທາງດ້ານການເມືອງແນວຄິດ, ຊອກໃຫ້ເຫັນຜົນງານພົ້ນເດັ່ນເພື່ອເສີມຂະຫຍາຍຈຸດດີ ແລະ ຈຸດອ່ອນຂໍ້ຄົງຄ້າງທີ່ຈະຕ້ອງໄດ້ປັບປຸງແກ້ໄຂໃນຕໍ່ໜ້າ, ບັນດາສະຫາຍຕ້ອງຈິງໃຈຕຳນິສົ່ງຂ່າວເຊິ່ງກັນແລະກັນ ດ້ວຍຄວາມຈິງແລ້ວນຳເອົາໄປປັບປຸງແກ້ໄຂຈຸດອ່ອນ ແລະ ເສີມຂະຫຍາຍດ້ານດີຜົນງານ, ຕີລາຄາແບ່ງປະເພດໃຫ້ຖືກຕ້ອງ ແລະ ຢ່າງພາວະວິໄສຮັກສາໃຫ້ໄດ້ຄວາມສາມັກຄີພາຍໃນຢ່າງໜັກແໜ້ນ, ທຸກສະຫາຍຕ້ອງສຸມໃສ່ຈັດຕັ້ງປະຕິບັດຂໍ້ແຂ່ງຂັນ 3 ດີ ຂອງແມ່ຍິງລາວ. ໃນນີ້ຄະນະຮັບຜິດຊອບໂດຍສະເພາະຫົວໜ້າໜ່ວຍ, ຄະນະໜ່ວຍແມ່ຍິງກົມ ຈົ່ງເປັນເຈົ້າການນຳພາສະມາຊິກແມ່ຍິງດຳເນີນຊີວິດການເມືອງໃນການປະຕິບັດຂໍ້ແຂ່ງຂັນ 3 ດີ ໃຫ້ມີຜົນສຳເລັດຕາມລະດັບຄາດໝາຍ.

ບັ້ນດຳເນີນຊີວິດການເມືອງຈັດຕັ້ງປະຕິບັດຂໍ້ແຂ່ງຂັນ 3 ດີ ຂອງໜ່ວຍແມ່ຍິງກົມສື່ມວນຊົນ ຈະດຳເນີນໄປເຖິງວັນທີ 19 ສິງຫາ ຈຶ່ງສໍາເລັດ, ໂດຍຈະໄດ້ແບ່ງຈຸສຳຫຼວດກວດກາຕຳນິສົ່ງຂ່າວກໍ່ສ້າງເຊິ່ງກັນແລະກັນ.

 

 

Off

Comments are closed.