11th Aug2022

ສຳເລັດການດຳເນີນກອງປະຊຸມ ສະໄຫມສາມັນ ເທື່ອທີ 3 ຂອງສະພາປະຊາຊົນແຂວງອຸດົມໄຊ ຊຸດທີ II

by Peaung Thanonkeo

ກອງປະຊຸມ ສະໄຫມສາມັນ ເທື່ອທີ 3 ຂອງສະພາປະຊາຊົນແຂວງອຸດົມໄຊ ຊຸດທີ II ໄດ້ໄຂຂຶ້ນຢ່າງເປັນທາງການ ໃນ ວັນທີ 9 ສິງຫາ ແລະໄດ້ອັດລົງດ້ວຍຜົນສຳເລັດໃນວັນທີ 10 ສິງຫາ 2022 ທີ່ສະໂມສອນ ແຂວງອຸດົມໄຊ ໂດຍການເປັນປະທານຂອງທ່ານ ຄຳດີ ວົງລ້ອມ ສະມາຊິກສະພາແຫ່ງຊາດ,ປະທານສະພາປະຊາຊົນແຂວງ,

ມີທ່ານ ບຸນຄົງ ຫລ້າຈຽມພອນ ກຳມະການສຳຮອງສູນກາງພັກ,ເຈົ້າແຂວງອຸດົມໄຊ,ມີສະມາຊິກສະພາແຫ່ງຊາດ ປະຈຳເຂດເລືອກຕັ້ງ ທີ 4 ແຂວງອຸດົມໄຊ, ມີການນຳແຂວງ, ອະດີດສະມາຊິກສະພາແຫ່ງຊາດ,ສະມາຊິກສະພາປະຊາຊົນແຂວງ ຕະຫລອດຮອດ ຂະແຫນງການພາຍໃນແຂວງ ເຂົ້າຮ່ວມ.

ຕະຫລອດໄລຍະ 2 ວັນຂອງການດໍາເນີນກອງປະຊຸມ ໄດ້ພິຈາລະນາ ແລະ ຮັບຮອງເອົາບັນດາເນື້ອໃນ ສໍາຄັນພື້ນຖານຂອງແຂວງ ເປັນຕົ້ນແມ່ນ ແຜນພັດທະນາເສດຖະກິດ – ສັງຄົມ,ແຜນງົບປະມານແຫ່ງລັດ ແລະ ບັນຫາພົ້ນເດັ່ນອື່ນໆ ຈຳນວນຫນຶ່ງ ທີ່ສັງຄົມໃຫ້ຄວາມສົນໃຈ ແລະ ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກ ທາງດ້ານເສດຖະກິດ – ການເງິນ ກໍຄື ການຄຸ້ມຄອງຮ້ານແລກປ່ຽນເງິນຕາ,ການຄຸ້ມຄອງລາຄາສິນຄ້າ,ບັນຫາເງິນເຟີ້,ບັນຫານ້ຳມັນເຊື້ອໄຟແພງ ແລະ ການແກ້ໄຂບັນຫາຢາເສບຕິດ ຕິດພັນກັບການແກ້ໄຂ ບັນຫາປະກົດການຫຍໍ້ທໍ້ ພາຍໃນແຂວງອຸດົມໄຊ ປະຈຳ 6 ເດືອນຕົ້ນປີ. ນອກນັ້ນ ໃນກອງປະຊຸມ ຍັງໄດ້ ພ້ອມກັນ ຄົ້ນຄວົ້າ,ພິຈາລະນາ ແລະ ຮັບຮອງເອົາບົດລາຍງານ ການເຄື່ອນໄຫວ 6 ເດືອນຕົ້ນປີ ແລະ ທິດທາງແຜນການ 6 ເດືືອນທ້າຍປີ 2022 ຂອງສະພາປະຊາຊົນແຂວງ ພ້ອມທັງ ຕີລາຄາສູງ ຕໍ່ການຊີ້ນຳ – ນໍາພາ ຂອງຄະນະປະຈໍາສະພາປະຊາຊົນແຂວງ ແລະ ພິຈາລະນາ ແລະຮັບຮອງເອົາ ຂໍ້ຕົກລົງຂອງທ່ານເຈົ້າແຂວງ ທີ່ສ້າງໃຫມ່ 1 ສະບັບ ກໍຄື ຂໍ້ຕົກລົງ ວ່າດ້ວຍການຄຸ້ມຄອງ ການຈັດງານປະເພນີຕ່າງໆ ແລະ ປັບປຸງໃຫມ່ 1 ສະບັບ ຄື: ຂໍ້ຕົກລົງ ວ່າດ້ວຍການປະເມີນລາຄາທີ່ດິນໃນທົ່ວແຂວງ ເຊິ່ງການພິຈາລະນາ ແລະ ຮັບຮອງ ໃນຄັ້ງນີ້ ກໍເພື່ອສືບຕໍ່ຫັນປ່ຽນຢ່າງແຂງແຮງ ແລະ ຮອບດ້ານ ໃນການສ້າງລັດທີ່ປົກຄອງດ້ວຍກົດຫມາຍ ແລະ ນິຕິກຳ ໃຫ້ເປັນຮູບປະທຳ ແລະ ມີປະສິດທິຜົນຢ່າງແທ້ຈິງ.

 

ໂອກາດດັ່ງກ່າວ ທ່ານ ບຸນຄົງ ຫລ້າຈຽມພອນ ກໍາມະການສໍາຮອງສູນກາງພັກ,ເຈົ້າແຂວງອຸດົມໄຊ ໄດ້ປະກອບຄຳເຫັນໃສ່ແຕ່ລະບັນຫາ ກໍຄື ການຊັກຖາມຂອງສະມາຊິກສະພາປະຊາຊົນແຂວງ ແລະ ການຕອບຄຳຊັກຖາມຂອງຂະແຫນງການທີ່ກ່ຽວຂ້ອງ ເພື່ອເປັນທິດໃນການຈັດຕັ້ງປະຕິບັດວຽກງານ ຂອງອົງການປົກຄອງແຂວງ ໃນຕໍ່ຫນ້າ. 

ຜົນສໍາເລັດ ຂອງການດໍາເນີນ ກອງປະຊຸມສະໄຫມສາມັນ ເທື່ອທີ 3 ຂອງສະພາປະຊາຊົນແຂວງອຸດົມໄຊ ຊຸດທີ II ໃນຄັ້ງນີ້ ແມ່ນເປັນການສືບຕໍ່ຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ຄັ້ງທີ XI ຂອງພັກ ແລະ ມະຕິກອງປະຊຸມໃຫຍ່ ຄັ້ງທີ IX ຂອງອົງຄະນະພັກແຂວງ ເຂົ້າສູ່ຊີວິດຕົວຈິງ,ສືບຕໍ່ພັດທະນາແຂວງອຸດົມໄຊ ຕາມທິດ 4 ໃຈກາງ. 

ຕອນທ້າຍຂອງກອງປະຊຸມ ໄດ້ມີພິທີ ມອບໃບຍ້ອງຍໍ ໃຫ້ບັນດາພາກສ່ວນທີ່ປະກອບສ່ວນເຂົ້າໃນການເຄື່ອນ ໄຫວວຽກງານ ຂອງສະພາປະຊາຊົນແຂວງ ໃນໄລຍະຜ່ານມາ. ຈາກນັ້ນ ທ່ານ ຄຳດີ ວົງລ້ອມ ສະມາຊິກສະພາແຫ່ງຊາດ,ປະທານສະພາປະຊາຊົນແຂວງ ໄດ້ມີຄຳຄິດເຫັນ ພ້ອມທັງກ່າວປິດກອງປະຊຸມ ຢ່າງເປັນທາງການ. 

 

Off

Comments are closed.