12th Aug2022

ຮອງນາຍົກລັດຖະມົນຕີ ພົບປະຫາລືຂົງເຂດວຽກງານສື່ມວນຊົນ

by Peaung Thanonkeo

ຕອນບ່າຍວັນທີ 11 ສິງຫາ 2022 ນີ້, ທ່ານ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ ໄດ້ຮ່ວມປຶກສາຫາລືກັບ ຄະນະນໍາກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ແລະ ບັນດາຄະນະບັນນາທິການອົງການສື່ມວນຊົນ ໂດຍມີ ທ່ານນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ມີຮອງລັດຖະມົນຕີ, 

ມີຜູ້ອຳນວຍການ,ຄະນະບັນນາທິການຈາກບັນດາສື່ມວນຊົນສຳນັກງານຕ່າງໆອ້ອມຂ້າງສູນກາງ ເຂົ້າຮ່ວມ. ເພື່ອເຮັດໃຫ້ວຽກງານຖະແຫລງຂ່າວ-ສື່ມວນຊົນໄດ້ຮັບການພັດທະນາກ້າວໄປສູ່ຄຸນນະພາບ ແລະ ທັນສະໄໝ, ສົມກັບເປັນເຄື່ອງມືອັນແຫລມຄົມຂອງພັກ, ເປັນປາກກະບອກສຽງໃຫ້ພັກ, ລັດ ແລະ ປະຊາຊົນ, ເປັນເວທີແຫ່ງການສົ່ງເສີມປະຊາທິ ປະໄຕປະຊາຊົນລາວບັນດາເຜົ່າ, ປົກປັກຮັກສາໝາກຜົນຂອງການນຳພາ-ຊີ້ນຳ ຂອງພັກຕະຫລອດໄລຍະ ຂອງການປົກປັກຮັກສາ ແລະ ພັດທະນາປະເທດຊາດ ພ້ອມທັງຕອບໂຕ້ຖ້ອຍທຳນອງຂອງກຸ່ມຄົນບໍ່ດີ, ບັນດາອິດທິກຳລັງປໍລະປັກ ແລະ ກຳລັງຫັນປ່ຽນໂດຍສັນຕິຂອງສັດຕູ ໃຫ້ນັບມື້ແຂງແຮງ, ເລິກເຊິ່ງ ແລະ ຮອບດ້ານ.

ໃນກອງປະຊຸມ, ບັນດາຫົວໜ້າສື່ມວນຊົນຈາກພາກສ່ວນຕ່າງໆກໍໄດ້ມີການແລກປຽນບົດຮຽນໃນການ ເຄື່ອນໄຫວວຽກງານຕົວຈິງໃນໄລຍະຜ່ານມາ ເຊິ່ງມີທັງຂໍ້ສະດວກ ແລະ ຂໍ້ຫຍຸ້ງຍາກ ເປັນ ຕົ້ນ ບັນຫາການສະໜອງຂໍ້ມູນຂ່າວສານ ຈາກພາກສ່ວນຕ່າງໆໃຫ້ແກ່ສື່ມວນຊົນບາງຄັ້ງຍັງມີລັກຊະນະຊັກຊ້າ, ບໍ່ທັນກັບສະພາບການຕົວຈິງ, ບັນຫາຂໍ້ຫຍຸ້ງຍາກທາງດ້ານງົບປະມານ, ພາຫະນະຮັບໃຊ້, ບັນຫາບຸກຄະລາກອນ ແລະ ບັນຫາສຳຄັນອື່ນໆ.

ໂອກາດນີ້, ທ່ານ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ ກໍໄດ້ຊີ້ນຳໃຫ້ຄະນະພັກ ຄະນະນຳທຸກຂັ້ນ ຕ້ອງນຳພາວຽກງານໂດຍກົງ-ຮອບດ້ານ, ຖືສຳຄັນວຽກງານຖະແຫລງຂ່າວເປັນກົກ, ບັນດານິຕິກໍາໃດທີ່ບໍ່ສອດຄ່ອງຕ້ອງໄດ້ຕິດຕາມກວດກາ ແລະ ປັບປຸງຄືນໃໝ່ ໃຫ້ມັນສອດຄ່ອງແທດເໝາະ, ຕ້ອງສັບຊ້ອນຈັດວາງບຸກຄະລາກອນໃສ່ຕຳແໜງງານຢ່າງເໝາະສົມ; ຕ້ອງກໍາແໜ້ນທັດສະນະຂອງພັກເຮົາຕໍ່ວຽກງານສື່ມວນຊົນ ການເພີ່ມທະວີການຄຸ້ມຄອງຂອງລັດຕໍ່ສື່ມວນຊົນ ໂດຍການຄຸ້ມຄອງດ້ວຍກົດໝາຍ ພ້ອມທັງກວດກາຄືນກົດໝາຍທີ່ຄຸ້ມຄອງວ່າສອດຄ່ອງກັບສະພາບປັດຈຸບັນບໍ່ ຖ້າບໍ່ສອດຄ່ອງກໍຕ້ອງມີການປັບປຸງແກ້ໄຂຄືນໃໝ່. ພ້ອມກັນນີ້ ບັນນາທິການ ຕ້ອງມີຄວາມຮູ້ເລິກເຊິ່ງກ່ຽວກັບວຽກງານວິຊາສະເພາະ, ກຳໄດ້ລັກສະນະຈຸດພິເສດຂອງວຽກວິຊາສະເພາະ, ຕ້ອງເປັນຜູ້ຊຳນິຊຳນານໃນວຽກງານ, ມີຄວາມສະດຸ້ງໄວຕໍ່ບັນຫາ, ຕ້ອງມີແຜນການເຄື່ອນໄຫວວຽກງານຂອງຕົນເອງຄື: ແຜນໄລຍະສັ້ນ, ໄລຍະຍາວ ແລະ ອື່ນໆ.

Off

Comments are closed.