12th Aug2022

ປກສ ເມືອງສີສັດຕະນາກ ຈັບພວກຂະບວນການຄ້າຂາຍຢາເສບຕິດ 17 ຄົນ, ຢຶດຢາບ້າໄດ້ 2 ພັນກວ່າເມັດ

by Peaung Thanonkeo

ໃນທ້າຍເດືອນກໍລະກົດ ຫາ ຕົ້ນເດືອນສິງຫາ 2022, ພະແນກຕໍາຫຼວດ ກອງບັນຊາການ ປກສ ເມືອງສີສັດຕະນາກ ນະຄອນຫຼວງວຽງຈັນ ສົມທົບກັບ ພາກສ່ວນກ່ຽວຂ້ອງ ແກ້ໄຂຄະດີຢາເສບຕິດສາມາດຢຶດຢາບ້າໄດ້ 2 ພັນກວ່າເມັດ ແລະ ຈັບພວກຕ້ອງຫາໄດ້ 17 ຄົນ, ຍິງ 1 ຄົນ.

ພັທ ສີທາດ ໜູການ ຮອງຫົວໜ້າພະແນກຕໍາຫຼວດ ກອງບັນຊາການ ປກສ ເມືອງສີສັດຕະນາກ  ໃຫ້ຮູ້ວ່າ:

ໃນທ້າຍເດືອນກໍລະກົດ ຫາຕົ້ນເດືອນສິງຫາ 2022, ແກ້ໄຂຄະດີຢາເສບຕິດໄດ້ 5 ລາຍຄື: ໃນວັນທີ 21 ກໍລະກົດ 2022 ໄດ້ສົມທົບກັບ ປກສ ກຸ່ມວັດນາກ ແລະ ພາກສ່ວນກ່ຽວຂ້ອງ ມ້າງຈຸດມົ້ວສຸມຄ້າຂາຍຢາເສບຕິດ  ຢູ່ຮ້ານອິນເຕີເນັດກາເຟ ຫຼື ຮ້ານເກມ ຕັ້ງຢູ່ບ້ານໂພນປ່າເປົ້າ ເມືອງສີສັດຕະນາກ ຈັບຕົວຜູ້ຖືກຫາໄດ້ 4 ຄົນຊື່ ທ້າວ ເກື່ອງ ອາຍຸ 37 ປີ  ຢູ່ບ້ານສີເມືອງ, ທ້າວ ອານຸສອນ ຢູ່ບ້ານທາດຂາວ, ທ້າວ ພຸດທະສອນ ຢູ່ບ້ານໂພນປ່າເປົ້າ ແລະ ທ້າວ ບຸນທະວີ ຢູ່ບ້ານທ່າພະລານໄຊ ເມືອງສີສັດຕະນາກ ພ້ອມຂອງກາງຢາບ້າ 903 ເມັດ, ຢາໄອ໌ 2 ຖົງນ້ອຍ ຫຼັງຈາກສືບສວນ-ສອບສວນຂະຫຍາຍຜົນ ມາຮອດວັນທີ 27 ກໍລະກົດ 2022 ສາມາດຈັບຕົວເປົ້າໝາຍຄ້າຂາຍຢາເສບຕິດ ຢູ່ເຂດບ້ານທົົ່ງພານທອງ ຊື່ທ້າວ ຄໍາພູ ອາຍຸ 19 ປີ ຢູ່ບ້ານທົ່ງພານທອງ ເມືອງສີສັດຕະນາກ ພ້ອມກາງຢາບ້າ 28 ເມັດ, ວັນທີ 1 ສິງຫາ 2022, ຈັບຕົວ  ທ້າວ ເກ ອາຍຸ 30 ປີ ຢູ່ບ້ານໄຊສະຖານ ພ້ອມຢາບ້າ 101 ເມັດ, ທ້າວ ເສດຖາ ອາຍຸ 28 ປີ ພ້ອມຢາບ້າ 30 ເມັດ, ທ້າວ ວິລະບຸດ ອາຍຸ 25 ປີ ພ້ອມຢາບ້າ 172 ເມັດ, ທ້າວ ເພັດນິນ ອາຍຸ 22 ປີ ພ້ອມຢາບ້າ 100 ເມັດ, ທ້າວ ສົມຈັນ ອາຍຸ 25 ປີ ພ້ອມຢາບ້າ 5 ເມັດ, ທ້າວ ວັນເພັງ ອາຍຸ 34 ປີ ພ້ອມຢາບ້າ 4 ເມັດ, ທັງ 5 ຄົນຢູ່ບ້ານຈອມເພັດໃຕ້, ທ້າວ ຟ້າມີໄຊ  ອາຍຸ 48 ປີ ຢູ່ບ້ານສວນມອນ ເມືອງ ສີສັດຕະນາກ ແລະ ນາງ ໄຊນາ  ອາຍຸ 29 ປີ ຢູ່ບ້ານກາງທ່າ ເມືອງຫາດຊາຍຟອງ ພ້ອມຂອງກາງຢາບ້າ 351 ເມັດ, ວັນທີ 3 ສິງຫາ 2022 ໄດ້ຈັບຕົວ ທ້າວ ສຸກສັນ ອາຍຸ 48 ປີ ຢູ່ ບ້ານທ່າພະລານໄຊ ເມືອງສີສັດຕະນາກ ພ້ອມຂອງກາງຢາບ້າ 250 ເມັດ, ວັນທີ 4 ສິງຫາ 2022, ໄດ້ເຂົ້າຈັບທ້າວ ໄຊນະຄອນ ອາຍຸ 39 ປີ, ຢູ່ບ້ານທົ່ງພານທອງ ພ້ອມຢາບ້າ 168 ເມັດ, ທ້າວ ພອນປະເສີດ ອາຍຸ 32 ປີ ພ້ອມຢາບ້າ 10 ເມັດ, ທ້າວ ຄໍາຮູ້ ອາຍຸ 31 ປີ ພ້ອມຢາບ້າ 157 ເມັດ ແລະ ທ້າວ ບຸນມີໄຊ ອາຍຸ 32 ປີ ພ້ອມຢາບ້າ 7 ເມັດ ທັງ 3 ຄົນ ແມ່ນຢູ່ ບ້ານໂພນປ່າເປົ້າ ແລະ ພວກຕ້ອງຫາທັງໝົດ 17 ຄົນ, ຍິງ 1 ຄົນ ແມ່ນ ຢູ່ເມືອງສີສັດຕະນາກ ນະຄອນຫຼວງວຽງຈັນ.

ປະຈຸບັນເຈົ້າໜ້າທີ່ ກອງບັນຊາການ  ປກສ ເມືອງສີສັດຕະນາກ ພວມດໍາເນີນຄະດີຕາມກົດໝາຍ.

Off

Comments are closed.