12th Aug2022

ສຳເລັດຝຶກອົບວຽກງານສະກັດກັ້ນ ແລະ ຕ້ານອັກຄີໄພ.

by somda phoneor

ພະແນກຕໍາຫຼວດສະກັດກັ້ນ ແລະ ຕ້ານອັກຄີໄພ ນະຄອນຫຼວງວຽງຈັນ ໄດ້ສຳເລັດຝຶກອົບຮົມວຽກງານສະກັດກັ້ນ ແລະ ຕ້ານອັກຄີໄພ ໃຫ້ພະນັກງານບໍລິສັດລັດວິສາຫະກິດລາວເດີນອາກາດໃນວັນທີ 11 ສິງຫາ 2022, ໂດຍການເຂົ້າຮ່ວມຂອງ ພັທ ຄໍາເພັດ ດາລາວົງ ຫົວໜ້າພະແນກຕໍາຫຼວດສະກັດກັ້ນ ແລະ ຕ້ານອັກຄີໄພ ນະຄອນ ຫຼວງວຽງຈັນ, ພັທ ບຸນໃສ ວົງເວີນເໜືອ ຮອງຫົວໜ້າພະແນກຝຶກອົບຮົມບໍລິສັດລັດວິສາຫະກິດລາວເດີນອາກາດ, ພ້ອມດ້ວຍພະນັກງານພາຍໃນບໍລິສັດເຂົ້າຮ່ວມ.
ພັຕ ບຸນມີ ແສງອາລຸນ ຮອງຫົວໜ້າກອງໂຄສະນາ ພະແນກຕໍາຫຼວດສະກັດກັ້ນ ແລະ ຕ້ານອັກຄີໄພ ນະຄອນຫຼວງວຽງຈັນ ກ່າວວ່າ: ການລົງເຜີຍແຜ່ໃນຄັ້ງນີ້ເພື່ອເປັນການປູກຈິດສໍານຶກໃຫ້ພະນັກງານພາຍໃນບໍລິສັດ ໄດ້ຮັບຮູ້, ເຂົ້າໃຈກ່ຽວກັບພາກທິດສະດີການສະກັດກັ້ນ ແລະ ຕ້ານອັກຄີໄພຂັ້ນພື້ນຖານໂດຍສະເພາະກໍແມ່ນຄວາມຮູ້ກ່ຽວກັບລະບົບການນໍາໃຊ້ໄຟຟ້າທີ່ຖືກວິທີ ຮັບປະກັນບໍ່ໃຫ້ເກີດມີໄຟຟ້າລັດວົງຈອນ ແລະ ການນໍາໃຊ້ບັ້ງມອດໄຟທີ່ຖືກຕ້ອງຕາມຫຼັກການຂອງວິຊາສະເພາະວຽກງານສະກັດກັ້ນ ແລະ ຕ້ານອັກຄີໄພຂັ້ນພື້ນຖານ, ການໄຕ້ທູບທຽນບູຊາ, ການນໍາໃຊ້ຖັງແກ໊ດແຕ່ງຢູ່ຄົວກິນ ແລະອື່ນໆ.
ນອກນີ້, ຍັງມີສາທິດຈາກທິມງານກູ້ໄພ 1628 ໃນການຊ່ວຍເຫຼືອຄົນເຈັບຂັ້ນພື້ນຖານໃນເວລາກິນອາຫານແລ້ວມີການສະໝັກອາຫານ, ຫາຍໃຈບໍ່ອອກ, ການປະຖົມພະຍາບານເບື້ອງຕົ້ນ ຫຼື ການໂປ້ມຫົວໃຈເພື່ອກອບກູ້ຊ່ວຍຊີວິດຄົນເຈັບໃຫ້ທັນກັບເວລາ.
ໂອກາດດຽວກັນນີ້, ບັນດາພະນັກງານ ກໍໄດ້ລົງປະຕິບັດວິທີການສະກັດກັ້ນ ແລະ ຕ້ານອັກຄີໄພຕົວຈິງໂດຍການໃຊ້ມືເປົ່າເຂົ້າປິດຖັງແກ໊ດ, ນໍາໃຊ້ບັ້ງມອດໄຟເຂົ້າໄປມອດດັບໄຟທີ່ເກີດຂຶ້ນຈາກຖັງແກ໊ດ, ເກີດຈາກນໍ້າມັນເຊື້ອໄຟ ແລະອື່ນໆ; ວິທີການປະກອບ ແລະ ນໍາໃຊ້ສາຍນໍ້າແຮງສູງເພື່ອສີດນໍ້າໃສ່ຕຶກ-ອາຄານໃນເວລາໄຟໃໝ້ ແລະ ຮຽນຮູ້ວິທີການອອກຈາກຕຶກໜີໄຟເມື່ອມີເຫດການໄຟໃໝ້.
ພາຍຫຼັງສໍາເລັດການຝຶກອົບຮົມວຽກງານສະກັດກັ້ນ ແລະ ຕ້ານອັກຄີໄພ ພັທ ຄໍາເພັດ ດາລາວົງ ກໍໄດ້ມອບໃບຢັ້ງຢືນຜ່ານການຝຶກອົບຮົມວຽກງານສະກັດກັ້ນ ແລະ ຕ້ານອັກຄີໄພ ໃຫ້ບໍລິສັດລັດວິສາຫະກິດລາວເດີນອາກາດ ຕາງໜ້າຮັບໂດຍ ພັທ ບຸນໃສ ວົງເວີນເໜືອ.

Off

Comments are closed.