16th Aug2022

ວຕປ ປ້ອງກັນວິທະຍານິພົນ ໃຫ້ນັກສຶກສາປະລິນຍາໂທ ຮຸ່ນທີ XIII.

by somda phoneor

ວິທະຍາຄານຕໍາຫຼວດປະຊາຊົນ ກະຊວງ ປກສ ໄດ້ຈັດພິທີປ້ອງກັນບົດວິທະຍານິພົນ ໃຫ້ນັກສຶກສາປະລິນຍາໂທ ຮຸ່ນທີ XIII ໃນວັນທີ 16 ສິງຫາ 2022, ເປັນປະທານຂອງ ພົຈວ ປອ ວົງເຊໂດນ ພັນທະແກ້ວ ຫົວໜ້າອຳນວຍການ ວິທະຍາຄານຕໍາຫຼວດປະຊາຊົນ, ມີຄະນະອຳນວຍການ, ຕາງໜ້າກົມກອງ, ກຳມະການ, ຄູ-ອາຈານທີ່ປຶກສາ ແລະ ນັກສຶກສາ ເຂົ້າຮ່ວມ.

ນັກສຶກສາປະລິນຍາໂທ ຮຸ່ນທີ XIII ມີທັງໝົດ ຈໍານວນ 25 ສະຫາຍ ຍິງ 1 ສະຫາຍ ມາຈາກບັນດາກົມກອງອ້ອມຂ້າງກະຊວງ, ກອງບັນຊາການ ປກສ ນະຄອນຫຼວງວຽງຈັນ, ກອງບັນຊາການ ປກສ ແຂວງ ໃນທົ່ວປະເທດ, ເຊິ່ງເລີ່ມເຂົ້າຮຽນແຕ່ວັນທີ 19 ກັນຍາ 2020 ເປັນຕົ້ນມາ, ສຳລັບການປ້ອງກັນບົດຄາດຈະໃຫ້ສໍາເລັດພາຍໃນຕົ້ນເດືອນ ກັນຍາ 2022; ສໍາລັບວັນທີ 16 ສິງຫານີ້, ໄດ້ມີນັກສຶກສາຂຶ້ນປ້ອງກັນ 2 ຫົວຂໍ້ ຄື: ເພີ່ມທະວີການກັນ-ສະກັດກັ້ນ ການກະທໍາຜິດລັກຊັບ ຢູ່ນະຄອນຫຼວງວຽງຈັນ, ປ້ອງກັນໂດຍ ພັທ ແສງດາວ ວິຜາສຸກ ແລະ ຫົວຂໍ້ ຍົກສູງຄຸນນະພາບວຽກງານສືບສວນ-ສອບສວນຄະດີຢາເສບຕິດ ຢູ່ແຂວງຫຼວງພະບາງ, ປ້ອງກັນໂດຍ ພັທ ສີພັນດອນ ກະເສີມສຸກ.

ຜ່ານການປ້ອງກັນບົດວິທະຍານິພົນຈົບຊັ້ນຂອງນັກສຶກສາແຕ່ລະຫົວຂໍ້ ບັນດາກໍາມະການ, ຄູ-ອາຈານ ແລະ ປະທານ ກໍໄດ້ມີຄໍາເຫັນແນະນໍາຕໍ່ການປ້ອງກັນວິທະຍານິພົນຈົບຊັ້ນ, ເພື່ອຮັບປະກັນໃຫ້ເນື້ອໃນວິທະຍານິພົນແຕ່ລະຫົວຂໍ້ມີເນື້ອໃນຄົບຖ້ວນສົມບູນ ມີລັກສະນະວິທະຍາສາດ ແລະ ສາມາດນໍາໄປຈັດຕັ້ງຜັນຂະຫຍາຍເຂົ້າໃນວຽກງານວິຊາສະເພາະໃຫ້ເກີດຜົນປະໂຫຍດສູງສຸດ.

 

 

Off

Comments are closed.