16th Aug2022

ກອງປະຊຸມສະຫຼຸບ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2022 ຂອງກອງບັນຊາການປ້ອງກັນສູນກາງ.

by somda phoneor

ກອງບັນຊາການປ້ອງກັນສູນກາງ ກະຊວງປ້ອງກັນຄວາມສະຫົງບ ໄດ້ຈັດກອງປະຊຸມສະຫຼຸບວຽກງານ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2022. ໄດ້ຈັດໃນວັນທີ 16 ສິງຫາ 2022 ໂດຍການເປັນປະທານຂອງ ພົຈວ ສົມພົງ ຂໍາວິລຸນ ຄະນະພັກກະຊວງ ຫົວໜ້າກອງບັນຊາການປ້ອງກັນສູນກາງ, ມີຄະນະພັກ-ຄະນະກອງບັນຊາການ, ບັນດາຫ້ອງ, ກອງພັນ, ໂຮງຮຽນ ແລະ ພະນັກງານ-ນັກຮົບເຂົ້າຮ່ວມ.

ພັອ ບຸນທົງ ສີດາວົງ ຮອງຫົວໜ້າກອງບັນຊາການປ້ອງກັນສູນກາງ ໄດ້ຜ່ານບົດສະຫຼຸບການເຄື່ອນໄຫວວຽກງານໃນໄລຍະ 6 ເດືອນຜ່ານມາໄດ້ຈັດຕັ້ງປະຕິບັດບັນດາວຽກງານດ້ານຕ່າງໆມີຜົນສຳເລັດຫຼາຍດ້ານ ສະແດງອອກຄື: ວຽກງານເສນາທິການ ຄະນະພັກ-ຄະນະບັນຊາໄດ້ຊີ້ນຳ-ນຳພາບັນດາວຽກງານວິຊາສະເພາະໃຫ້ເຄື່ອນໄຫວເຮັດໜ້າທີ່ຢ່າງຕັ້ງໜ້າຕິດຕາມ, ກວດກາ ແລະ ບັນຊາການປະຕິບັດໜ້າທີ່ເປັນເສນາທິການໃຫ້ແກ່ກອງບັນຊາການໃນການຄົ້ນຄ້ວາວາງແຜນ, ຈັດວາງກຳລັງປ້ອງກັນການນຳພັກ-ລັດ, ສຳນັກງານ-ອົງການ, ກອງປະຊຸມລະດັບຊາດ, ສາກົນ,  ງານບຸນສຳຄັນຕ່າງໆຂອງຊາດ ແລະ ແຂກຂັ້ນສູງຕ່າງປະເທດທີ່ມາຢ້ຽມຢາມເຮັດວຽກຢູ່ ສປປລາວ ໄດ້ມີຄວາມປອດໄພຮອບດ້ານ. ວຽກງານປ້ອງກັນການນຳພັກ-ລັດ ເອົາໃຈໃສ່ຊີ້ນຳ-ນຳພາຕິດຕາມ ກວດກາ, ຊຸກຍູ້ກອງພັນປ້ອງກັນການນຳພັກ-ລັດ ໃຫ້ເຄື່ອນໄຫວຕາມພາລະບົດບາດຂອບເຂດສິດ ເຮັດໜ້າທີ່ປ້ອງກັນເວນຍາມສະຖານທີ່ພັກເຊົາ, ປຸງແຕ່ງອາຫານ, ຂັບລົດຮັບໃຊ້ ແລະ ປ້ອງກັນໃກ້ສິດໂດຍສະເພາະກຳມະການກົມການເມືອງສູນກາງພັກ, ກຳມະການສູນກາງພັກ ແລະ ອາດີດກຳມະການກົມການເມືອງ ສາມາດຮັບປະກັນຄວາມສະຫົງບປອດໄພ ສະແດງອອກ ປ້ອງກັນເວນຍາມປະຈຳການຕາມຈຸດຕ່າງໆ 4.400 ຄັ້ງ, ປ້ອງກັນການນຳລົງເຄື່ອນໄຫວເຮັດວຽກຢູ່ທ້ອງຖິ່ນ 83 ຄັ້ງ, ປ້ອງກັນການນຳໄປຕ່າງປະເທດ 9 ຄັ້ງ, ຂັບລົດ 3.780 ຄັ້ງ ແລະ ບັນດາວຽກງານອື່ນໆຕາມໜ້າທີ່ວິຊາສະເພາະຢ່າງເປັນປົກກະຕິ. ວຽກງານປ້ອງກັນສຳນັກງານ-ອົງການ ເອົາໃຈໃສ່ຊີ້ນຳ-ນຳພາລົງໃກ້ຊິດຕິດແທດບັນດາກອງຮ້ອຍ ເຮັດໜ້າທີ່ໃນການປ້ອງກັນເວນຍາມ-ປະຈຳການ, ຕິດຕາມ, ກວດກາຄົນເຂົ້າ-ອອກໃນຂອບເຂດຄວາມຮັບຜິດຊອບຢ່າງເຂັ້ມງວດ, ຮັກສາລະບຽບ, ເປັນເຈົ້າການປ້ອງກັນເວນຍາມຕະຫຼອດ 24 ຊົ່ວໂມງ, ນຳໃຊ້ອຸປະກອນເຕັກນິກ ແລະ ເຄື່ອງປະຈຳຕົວໃຫ້ສອດຄ່ອງກັບຫຼັກການວິຊາສະເພາະ, ປະສານສົມທົບກັບຄະນະຮັບຜິດຊອບປ້ອງກັນພາຍໃນສຳນັກງານ-ອົງການ, ອຳນາດການປົກຄອງບ້ານ, ປກສກຸ່ມ ເພື່ອຕິດຕາມກຳສະພາບການ ຖ້າມີກໍລະນີເກີດຂຶ້ນສາມາດປະສານງານ ແລະ ແກ້ໄຂໄດ້ທັນເວລາ, ຈາກການເຮັດໜ້າທີ່ວິຊາສະເພາະສາມາດເກັບກຳຜົນງານຄື: ປ້ອງກັນປະຈຳທີ່ 4.525 ຊົ່ວໂມງ, ຢືນຍາມກຽດຕິຍົດ 1.070 ຊົ່ວໂມງ, ກວດກາຄົນ, ຍານພາຫະນະເຂົ້າ-ອອກ 4.698 ຄົນ, ປ້ອງກັນການເຂົ້າຢ້ຽມຂ່ຳນັບ ແລະ ກອງປະຊຸມຕ່າງ 82 ຄັ້ງ, ປ້ອງກັນແຂກເຂົ້າຊົມຫໍພິພິທະພັນ, ອານຸສອນສະຖານ ແລະ ວາງກະຕ່າດອກໄມ້ອວຍພອນ 11 ຄັ້ງ ສາມາດເຮັດໃຫ້ສຳນັກງານ-ອົງການຂອງການນຳພັກ-ລັດ ມີຄວາມປອດໄພຮອບດ້ານ ແລະ ວຽກອື່ນໆມີຜົນສຳເລັດຕາມຄາດໝາຍທີ່ວາງໄວ້. ສຳລັບທິດທາງແຜນການໃນຕໍ່ໜ້າສືບຕໍ່ປັບປຸງກໍ່ສ້າງວຽກງານພັກ ແລະ ກຳລັງປ້ອງກັນສູນກາງໃຫ້ມີຄວາມປອດໃສ, ເຂັ້ມແຂງ, ໜັກແໜ້ນຕໍ່ການຈັດຕັ້ງ, ລະບຽບວິໄນ, ມີຈັນຍາທຳ ແລະ ມີວິທະຍາສາດເຊີດຊູບົດບາດການນຳຂອງພັກ ທຸກຂົງເຂດວຽກງານ, ຕັ້ງໜ້າຜັນຂະຫຍາຍແຜນການຂອງກະຊວງປ້ອງກັນຄວາມສະຫົງບວາງອອກໃນຂົງເຂດວຽກງານປ້ອງກັນສູນກາງໃຫ້ເປັນຮູບປະທຳ, ມີປະສິດທິພາບ ແລະ ປະສິດທິຜົນສູງ.

Off

Comments are closed.