18th Aug2022

ແຂວງ ໄຊຍະບູລີ ສປປລາວ ແລະ ແຂວງ ເຊີນລາ ສສ ຫວຽດນາມ ສືບຕໍ່ຮ່ວມມືຮອບດ້ານ

by somda phoneor

ການພົບປະລະຫວ່າງ ຄະນະຜູ້ແທນແຂວງ ໄຊຍະບູລີ ສປປ ລາວ ແລະ ແຂວງ ເຊີນລາ ສສ ຫວຽດນາມ ໄດ້ຈັດຂຶ້ນໃນຕອນເຊົ້າຂອງວັນທີ 18 ສິງຫາ ນີ້, ທີ່ສະໂມສອນຫ້ອງວ່າການແຂວງ ໄຊຍະບູລີ, ແຂວງ ໄຊຍະບູລີ ນໍາໂດຍ ທ່ານ ພົງສະຫວັນ ສິດທະວົງ ເລຂາພັກແຂວງ, ເຈົ້າແຂວງ ພ້ອມຄະນະ, ແຂວງ ເຊີນລາ ນໍາໂດຍ ທ່ານ ລໍມິງຮຸງ ຮອງເລຂາພັກແຂວງ, ຜູ້ປະຈໍາການ ພ້ອມຄະນະ.

ການພົບປະຄັ້ງນີ້, ທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ ແມ່ນໄດ້ກ່າວຕ້ອນຮັບຄະນະຜູ້ແທນແຂວງ ເຊີນລາ, ພ້ອມທັງໄດ້ແຈ້ງສະພາບການພັດທະນາເສດຖະກິດ-ສັງຄົມຂອງແຂວງໂດຍສັງເຂບໃຫ້ຄະນະຜູ້ແທນແຂວງ ເຊີນລາ ໄດ້ຮັບຊາບ, ເຊິ່ງທ່າແຮງບົ່ມຊ້ອນຂອງແຂວງມີ: ກະສິກໍາ-ການປຸກຝັງລ້ຽງສັດ ຕິດພັນກັບການປຸງແຕ່ງ,  ອະນາຄົດແມ່ນອຸດສາຫະກໍາໄຟຟ້າ ປະຈຸບັນມີ 2 ແຫ່ງ (ໄຟຟ້ານໍ້າຂອງເມືອງໄຊຍະບູລີ ແລະ ໂຮງງານໄຟຟ້າຖ່ານຫີນ ເມືອງຫົງສາ), ອັດຕາການເຕີບໂຕຂອງເສດຖະກິດພາຍໃນແຂວງ ແມ່ນມີການຂະຫຍາຍຕົວ, ລາຍຮັບສະເລ່ຍຫົວຄົນໜຶ່ງ 3.100 ໂດລາສະຫະລັດ, ຄາດວ່າຈະບັນລຸ 2,500 ໂດລາສະຫະລັດ, ທ່ານເຈົ້າແຂວງ ໄຊຍະບູລີ ຍັງໄດ້ກ່າວຕື່ມອີກວ່າ: ເພື່ອເປັນ​ການ​ຜັນ​ຂະຫຍາຍ​ບັນດາເນື້ອໃນຈິດໃຈຂອງຂໍ້​ຕົກລົງ, ບົດ​ບັນທຶກ, ສັນຍາ, ສົນທິ ສັນຍາ ​ແລະ ຖະ​ແຫຼ​ງການຂອງສອງພັກ-ສອງ​ລັດ​ ທີ່ໄດ້​ຕົກລົງຮ່ວມ​ມື​ກັນໃນໄລຍະ​ທີ່ຜ່ານມາ, ການພົບ​ປະ​ໃນ​ຄັ້ງນີ້ ຈະກາຍເປັນຂີດ  ໝາຍ ແຫ່ງການເພີ່ມທະວີສາຍພົວພັນມິດຕະພາບອັນເປັນມູນເຊື້ອ,

ຄວາມສາມັກແບບຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງຊາດ ກໍ່ຄືສອງ​ແຂວງພວກເຮົາ ໃຫ້ນັບມື້ມີການຂະຫຍາຍຕົວ​ເຂົ້າສູ່ລວງເລິກ ແລະ ເພີ່ມພູນຄູນສ້າງໃຫ້ຈະເລີນງອກງາມຍິ່ງໆຂຶ້ນ, ການພົບປະກັນຄັ້ງນີ້ທັງສອງແຂວງແມ່ນໄດ້ຮ່ວມກັນລົງນາມໃສ່ບົດບັນທືກການຮ່ວມມືຮອບດ້ານໄລຍະປີ 2022-2024 ເຊິ່ງຈະໄດ້ຮ່ວມມືກັນໃນຂົງເຂດການເມືອງ, ຂົງເຂດປ້ອງກັນຊາດ-ປ້ອງກັນຄວາມສະຫງົບ,  ຂົງເຂດເສດຖະກິດ, ຂົງເຂດວັດທະນະທໍາ-ສັງຄົມ ແລະ ສາທາລະນະສຸກ, ຈາກນັ້ນທັງສອງແຂວງກໍ່ໄດ້ລົງນາມໃສ່ບົດບັນທືກຢ່າງເປັນທາງການ, ຝ່າຍແຂວງ ໄຊຍະບູລີ ລົງນາມໂດຍ ທ່ານ ເພັດພິໄຊ ສູນວິໄລ ຮອງເຈົ້າແຂວງ,  ແລະ ຝ່າຍແຂວງ ເຊີນລາ ລົງນາມໂດຍ ທ່ານ ດັງງອັກເຮົາ ຮອງປະທານ ຄະນະກໍາມະການ ປະຊາຊົນແຂວງ ໂດຍມີຄະນະຜູ້ແທນທັງສອງແຂວງຮ່ວມເປັນສັກຂີພິຍານ, ຕອນທ້າຍຂອງພິທີຜູ້ແທນທັງສອງແຂວງແມ່ນໄດ້ມອບຂອງທີ່ລະນືກເຊິ່ງກັນ ແລະ ກັນ.

Off

Comments are closed.