19th Aug2022

ອະດີດນັກຮຽນ ນາຍຮ້ອຍຕໍາຫຼວດລາວ ໂຮງຮຽນ 12-75 ເຂົ້າອວຍພອນ ອົງການ ຜູ້ຕາງໜ້າກະຊວງຕໍາຫຼວດຫວຽດນາມປະຈໍາລາວ.

by somchan

ໃນວັນທີ 17 ສິງຫາ 2022ນີ້  ເພື່ອສະແດງຄວາມຮູ້ບຸນຄຸນ ແລະ ປະກອບສ່ວນ ເຂົ້າໃນຂະບວນການສະເຫຼີມສະຫຼອງ ປີສາມັກຄີມິດຕະພາບລາວ-ຫວຽດນາມ ປະຈໍາປີ 2022 ຄືວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ ແລະ ວັນເຊັນສົນທິສັນຍາ ມິດຕະພາບ ລາວ-ຫວຽດນາມ ຄົບຮອບ 45 ປີ ໃຫ້ມີບັນຍາກາດຟົດຟື້ນ ກວ້າງຂວາງ ແລະ ເຕັມໄປດ້ວຍຄວາມໝາຍຄວາມສຳຄັນ ທາງປະຫວັດສາດ. ອະດີດນັກຮຽນນາຍຮ້ອຍຕໍາຫຼວດລາວ ໂຮງຮຽນ 12-75 ສສ. ຫວຽດນາມ ນໍາໂດຍ ພົຕ ບຸນມີ ແສງຄໍາຢອງ ພະນັກງານບໍານານ ພ້ອມດ້ວຍຄະນະ ໄດ້ເຂົ້າອວຍພອນ ສະຫາຍ ພົຈວ ຟານແທງ ຕ້ວນ ຫົວໜ້າອົງການຜູ້ຕາງໜ້າກະຊວງຕໍາຫຼວດຫວຽດນາມປະຈໍາລາວ  ພ້ອມຄະນະ. ການພົບປະໃນຄັ້ງນີ້ແມ່ນເຕັມໄປດວ້ຍບັນຍາກາດ ຖານມິດສະຫາຍ ອ້າຍນ້ອງ ທີ່ເຄີຍຮ່ວມສຸກຮ່ວມທຸກນໍາກັນ, ຜ່ານມາ ທັງສອງຝ່າຍມີຄວາມພາກພູມໃຈ ພ້ອມຕີລາຄາສູງ ຕໍ່ສາຍພົວພັນ ທີ່ເປັນມູນເຊື້ອ, ຄວາມສາມັກຄີພິເສດ, ນໍ້າໃຈມິດຕະພາບ ອັນຍິ່ງໃຫຍ່ ແລະ ການຮ່ວມມືຮອບດ້ານ ໄດ້ຮັບການ ເພີ່ມພູນຄູນສ້າງ ມີປະສິດທິພາບ ປະສິດທິຜົນ ທາງລວງກວ້າງ ລວງເລິກ ຕະຫຼອດມາ ໂດຍສະເພາະ ແມ່ນການຮ່ວມມືລະຫວ່າງ ສອງກະຊວງ ປກສ ລາວ – ຫວຽດນາມ ທີ່ມີອົງການ ຜູ້ຕາງໜ້າກະຊວງຕໍາຫຼວດຫວຽດນາມ ປະຈໍາລາວ  ເປັນເສນາທິການ ທັງເປັນຂົວຕໍ່ ເຫັນວ່າມີຜົນສໍາເລັດຫຼາຍໆດ້ານ ອັນເປັນການປະກອບສ່ວນ ເປັນກໍາລັງແຮງສັງລວມ ຮັກສາຄວາມສະຫງົບ ປອດໄພ ຂອງສອງຊາດ ໄວ້ໄດ້ຢ່າງໜັກແໜ້ນ ທັງເປັນການສະແດງເຖິງຄວາມຊື່ສັດ ຈົ່ງຮັກພັກດີ ຮູ້ບຸນຄຸນ ຕໍ່ບັນພະບູລຸດຜູ້ກໍ່ຕັ້ງ ທັງສອງຊາດ ຄື ປະທານໂຮ່ຈີມິ່ນ, ປະທານ ໄກສອນ ພົມວິຫານ ແລະ ປະທານ ສຸພານຸວົງ ຜູ້ນໍາທີ່ແສນເຄົາລົບຮັກ ຂອງ ປະຊາຊົນ ລາວ-ຫວຽດນາມ ຕະຫຼອດມາ.

ພົຕ ບຸນມີ ແສງຄໍາຢອງ ໄດ້ຕາງໜ້າໃຫ້ຄະນະ ສະແດງຄວາມຮູ້ບຸນຄຸນ ຕໍ່ອະດີດ ຄະນະອໍານວຍການ ພະນັກງານ ຄູອາຈານ ໂຮງຮຽນ 12-75 ພິເສດແມ່ນ ຂອງສອງພັກ-ສອງລັດ ແລະ ສອງກະຊວງ ປກສ ລາວ-ຫວຽດນາມ ທີ່ໄດ້ກໍານົດຍຸດທະສາດ ມອງກວ້າງ ເຫັນໄກ ນໍາພາເດັດຂາດໂດຍກົງ ຮອບດ້ານ ຕໍ່ກໍາລັງປະກອບອາວຸດປະຕິວັດ ທີ່ໄດ້ໃຫ້ການສິດສອນ ສຶກສາອົບຮົມ, ໃຫ້ມີວິຊາອາຊີບ ຖານະບົດບາດຈົນເຖິງທຸກວັນນີ້. ຂໍສະແດງຄວາມກະຕັນຍູ ຮູ້ບຸນຄຸນ ພ້ອມອວຍພອນ ຂໍໃຫ້ຊີວິດ ແລະ ການເຄື່ອນໄຫວປະຕິວັດ ຂອງ ປະທານ ໂຮ່ຈີມີນ, ປະທານ ໄກສອນ ພົມວິຫານ, ປະທານ ສຸພານຸວົງ ຈົ່ງຍືນຍົງໃນດວງໃຈ ຂອງ ປະຊາຊົນ ສອງຊາດ ລາວ-ຫວຽດນາມ ຊົ່ວຟ້າກາລະນານ.

ພອ້ມນີ້ທັງສອງຝ່າຍໄດ້ຈັດກິດຈະກໍາແຂ່ງຂັນກິລາເປຕັງເພື່ອສະເຫຼີມສະຫຼອງສອງວັນປະຫວັດສາດ ລາວ-ຫວຽດນາມ, ວັນສ້າງຕັ້ງຕໍາຫຼວດຫວຽດນາມ ຄົບຮອບ 77 ປີ ແລະ ວັນຊາດ ສສ ຫວຽດນາມ ຄົບຮອບ 77 ປີ ຢ່າງຟົດຟື້ນ.

 

Off

Comments are closed.