19th Aug2022

ຄະນະນໍາຫ້ອງວ່າການກະຊວງ ປກສ ເຂົ້າອວຍພອນຫົວໜ້າອົງການຜູ້ຕາງໜ້າກະຊວງ ຕຳຫຼວດຫວຽດນາມ ປະຈໍາລາວ

by Peaung Thanonkeo

ໃນວັນທີ 18 ສິງຫາ 2022, ຄະນະນໍາຫ້ອງວ່າການກະຊວງປ້ອງກັນຄວາມສະຫງົບ ນໍາໂດຍ ພົຕ ຈັນສະແຫວງ ທິບຄູນທອງ ຮອງຫົວໜ້າຫ້ອງວ່າການກະຊວງປ້ອງກັນຄວາມສະຫງົບ ພ້ອມຄະນະ ໄດ້ນໍາເອົາກະຕ່າດອກໄມ້ ແລະ ກະຕ່າຂອງຂວັນ ເຂົ້າອວຍພອນ ພົຈວ ຟານ ແທັງ ຕວັນ ຫົວໜ້າອົງການຜູ້ຕາງໜ້າກະຊວງ ຕຳຫຼວດ ຫວຽດນາມ ປະຈໍາລາວ ເນື່ອງໃນໂອກາດວັນສ້າງຕັ້ງກໍາລັງປ້ອງກັນຄວາມສະຫງົບ ຫວຽດນາມ ຄົບຮອບ 77 ປີ (19 ສິງຫາ 1945-19 ສິງຫາ 2022) ໂດຍມີຄະນະທັງສອງຝ່າຍ ເຂົ້າຮ່ວມ.

ໃນໂອກາດນີ້, ພົຕ ຈັນສະແຫວງ ທິບຄູນທອງ ກໍໄດ້ກ່າວຄໍາອວຍພອນໄຊອັນປະເສີດມາຍັງທ່ານຫົວໜ້າອົງການຜູ້ຕາງໜ້າກະຊວງ ຕຳຫຼວດ ຫວຽດນາມ ປະຈໍາລາວ ພ້ອມດ້ວຍຄະນະ ຈົ່ງມີຄວາມຜາສຸກໃນຊີວິດສວນຕົວ, ຄອບຄົວ ແລະ ມີຜົນສໍາເລັດໃນໜ້າທີ່ວຽກງານອັນມີກຽດສະຫງ່າທີ່ພັກ-ລັດ ໄດ້ມອບໝາຍໃຫ້ ແລະ ພ້ອມກັນສືບຕໍ່ເພີ່ມທະວີສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງພັກສອງລັດ ແລະ ປະຊາຊົນສອງຊາດລາວ-ຫວຽດນາມ ເວົ້າສະເພາະແມ່ນສອງກໍາລັງປ້ອງກັນຄວາມສະຫງົບລາວ-ຫວຽດນາມ, ຫວຽດນາມ-ລາວ ແລະ ລະຫວ່າງ ຫ້ອງວ່າການກະຊວງປ້ອງກັນຄວາມສະຫງົບ ກັບ ອົງການຜູ້ຕາງໜ້າກະຊວງ ຕຳຫຼວດ ຫວຽດນາມ ປະຈໍາລາວ ໃຫ້ໝັ້ນຄົງທະນົງແກ່ນ ແລະ ຈະເລີນງອກງາມຍິ່ງຂຶ້ນ.

ໂອກາດດຽວກັນນີ້, ພົຈວ ຟານ ແທັງ ຕວັນ ກໍໄດ້ສະແດງຄວາມຂອບໃຈເປັນຢ່າງສູງມາຍັງ ພົຕ ຈັນສະແຫວງ ທິບຄູນທອງ ພ້ອມຄະນະ ທີ່ໄດ້ອວຍພອນໃນຄັ້ງນີ້ ແລະ ກ່າວອວຍພອນມາຍັງ ພົຕ ຈັນສະແຫວງ ທິບຄູນທອງ ພ້ອມຄະນະ ມີຄວາມຈະເລີນກ້າວໜ້າໃນໜ້າທີ່ການງານ ແລະ ພ້ອມກັນສືບຕໍ່ສ້າງຄວາມສາມັກຄີ, ໃຫ້ການສະໜັບສະໜູນ, ຊ່ວຍເຫຼືອເຊິ່ງກັນແລະກັນ ໃນທຸກດ້ານຂອງວຽກງານ ແລະ ພ້ອມກັນສືບຕໍ່ຮັກສາມູນເຊື້ອຄວາມສາມັກຄີ, ສາຍພົວພັນພິເສດລະຫວ່າງລາວ-ຫວຽດນາມ, ຫວຽດນາມ-ລາວ ໃຫ້ມີຄວາມແໜ້ນແຟ້ນຂຶ້ນເລື່ອຍໆ.

ຂ່າວຍັງໃຫ້ຮູ້ຕື່ມອີກວ່າ: ໃນໂອກາດຂອງວັນດຽວກັນນີ້, ຄະນະນໍາກອງບັນຊາການປ້ອງກັນຄວາມສະຫງົບ ນໍາໂດຍ ພັອ ປອ ບົວພັນ ຟອງມະນີ ພ້ອມຄະນະ ກໍ ອວຍພອນຫົວໜ້າອົງການຜູ້ຕາງໜ້າກະຊວງ ຕຳຫຼວດ ຫວຽດນາມ ປະຈໍາລາວ ໃນໂອກາດວັນສ້າງຕັ້ງກໍາລັງປ້ອງກັນຄວາມສະຫງົບ ຫວຽດນາມ ຄົບຮອບ 77 ປີ (19 ສິງຫາ ເຊັ່ນດຽວກັນ.

Off

Comments are closed.