19th Aug2022

ປະກາດແຕ່ງຕັ້ງ ຮອງລັດຖະມົນຕີ ກະຊວງປ້ອງກັນຄວາມສະຫງົບ.

by somda phoneor

ກະຊວງປ້ອງກັນຄວາມສະຫງົບ ໄດ້ຈັດພິທີປະກາດການແຕ່ງຕັ້ງ ພົຕ ຄໍາກິ່ງ ຜຸຍຫຼ້າມະນີວົງ ເປັນຮອງລັດຖະມົນຕີ ກະຊວງປ້ອງກັນຄວາມສະຫງົບ.   ໃນວັນທີ 19 ສິງຫາ 2022, ເປັນກຽດເຂົ້າຮ່ວມໂດຍ ພົອ ວິໄລ ຫຼ້າຄຳຟອງ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫງົບ ມີບັນດາຄະນະກົມໃຫຍ່, ກົມ, ກອງ, ວິທະຍາຄານ, ກອງບັນຊາການ ແລະ ປກສ ນະຄອນຫຼວງວຽງຈັນເຂົ້າຮ່ວມ.

ທ່ານ ດວງຕາ ຈູມພາວັນ ຜູ້ຊ່ວຍຄະນະຈັດຕັ້ງສູນກາງພັກ ໄດ້ຜ່ານດຳລັດ ຂອງທ່ານນາຍົກລັດຖະມົນຕີ ວ່າດ້ວຍການແຕ່ງຕັ້ງຮອງລັດຖະມົນຕີ, ທັງເປັນຫົວໜ້າກົມໃຫຍ່ຕຳຫຼວດ ກະຊວງປ້ອງກັນຄວາມສະຫງົບ, ໃນນີ້້ ຕົກລົງແຕ່ງຕັ້ງ ພົຕ ຄຳກິ່ງ ຜຸຍຫຼ້າມະນີວົງ ເປັນຮອງລັດຖະມົນຕີ, ທັງເປັນຫົວໜ້າກົມໃຫຍ່ຕຳຫຼວດ ກະຊວງປ້ອງກັນຄວາມສະຫງົບ.

ໃນໂອກາດນີ້, ພົອ ວິໄລ ຫຼ້າຄຳຟອງ ໄດ້ມີຄຳເຫັນໂອ້ລົມ ແລະ ສະແດງຄວາມຊົມເຊີຍ ພ້ອມທັງໄດ້ເນັ້ນໜັກໃຫ້ຮອງລັດຖະມົນຕີຄົນໃໝ່ ເອົາໃຈໃສ່ສືບຕໍ່ຄວາມສາມັກຄີສ້າງຄວາມເປັນເອກະພາບໜັກແໜ້ນພາຍໃນກະຊວງ, ເພີ່ມທະວີຄວາມຮັບຜິດຊອບທາງດ້ານການເມືອງ ເຮັດໃຫ້ກຳລັງຍຶດໝັ້ນອຸດົມການຂອງຊາດ, ຊີ້ນຳ-ນຳພາກຳລັງ ຈັດຕັ້ງປະຕິບັດວຽກງານວິຊາສະເພາະໃນການແກ້ໄຂປະກົດການຫຍໍ້ທໍ້ ໂດຍສະເພາະແມ່ນສຸມໃສ່ຈັດຕັ້ງປະຕິບັດວາລະແຫ່ງຊາດ ເພື່ອເຮັດໃຫ້ສັງຄົມມີຄວາມສະຫງົບ, ຄວາມເປັນລະບຽບຮຽບຮ້ອຍ, ຕ້ອງເດັດຂາດມີໄຫວພິບ ມີຄວາມຈົ່ງຮັກພັກດີຕໍ່ພັກ-ລັດ, ຕໍ່ປະເທດຊາດ ຕໍ່ປະຊາຊົນ ໃຫ້ຄວາມເປັນທຳແກ່ປະຊາຊົນ, ຕ້ອງປຶກສາຫາລືກັບໝູ່ຄະນະໃນການແກ້ໄຂບັນຫາຫາງສຽງສັງຄົມ ຕໍ່ກຳລັງປ້ອງກັນຄວາມສະຫົງບ ເພື່ອເຮັດໃຫ້ກຳລັງປກສເປັນກຳລັງຂອງປະຊາຊົນຮັບໃຊ້ປະຊາຊົນ ເພື່ອໃຫ້ປະເທດຊາດມີຄວາມສະຫງົບ, ປອດໄພ ແລະ ເປັນລະບຽບຮຽບຮ້ອຍໃນສັງຄົມ.

Off

Comments are closed.