22nd Aug2022

ຈະລາຈອນ ເມືອງໄຊທານີ ເຂັ້ມງວດຕໍ່ລົດຕິດດອກໄຟສະປອດໄລ

by somda phoneor

ລະຫວ່າງວັນທີ 17-19 ສິງຫາ 2022 ກອງຕໍາຫຼວດຈະລາຈອນ ກອງບັນຊາການ ປກສ ເມືອງໄຊທານີ ນະຄອນຫຼວງວຽງຈັນ ລົງຕັ້ງຈຸດກວດກາ ຢູ່ 3 ຈຸດຄື: ເສັ້ນທາງເລກ 10 ເຂດບ້ານໄຮ ຫາ ທ່າງ່ອນ, ເສັ້ນທາງ 450 ປີ ແລະ ເສັ້ນທາງເລກທີ 13 ໃຕ້ ເຂດຫຼັກ 18 ເພື່ອກວດກາລົດທີ່ຕິດດອກໄຟສະປອດໄລ; ຜ່ານການກວດກາຕົວຈິງໃນ 3 ວັນ ພົບລົດໃຫຍ່ທີ່ລະເມີດດ້ວຍການຕິດດອກໄຟສະປອດໄລໃສໜ້າລົດ ແລະ ຫຼັງຄາລົດ ຈໍານວນ 60 ກວ່າຄັນ.

ພັຕ ສຸນີ ໄຊຍະວົງ ຮອງຫົວໜ້າພະແນກຕໍາຫຼວດ ຜູ້ຊີ້ນໍາກອງຕໍາຫຼວດຈະລາຈອນ ເມືອງໄຊທານີ ກ່າວຕໍ່ສື່ມວນຊົນ ປກສ ວ່າ: ໂດຍປະຕິບັດຕາມແຈ້ງການ ຂອງກະຊວງໂຍທາທິການ ແລະ ຂົນສົ່ງ ແລະ ຂອງກົມຕໍາຫຼວດຈະລາຈອນ ກົມໃຫຍ່ຕໍາຫຼວດ ກະຊວງ ປກສ ກ່ຽວກັບການນໍາໃຊ້ໄຟສະຫວ່າງ ແລະ ການຕິດຕັ້ງອຸປະກອນປະກອບຂອງຍານພາຫະນະທາງບົກ; ດັ່ງນັ້ນ, ກອງບັນຊາການ ປກສ ເມືອງໄຊທານີ ຈິ່ງມອບໃຫ້ກອງຕໍາຫຼວດຈະລາຈອນ ເມືອງລົງຈັດຕັ້ງປະຕິບັດ ໂດຍການຕັ້ງຈຸດກວດກາ ຢູ່ຕາມເສັ້ນທາງພາຍໃນເມືອງ ໂດຍເລັ່ງໃສ່ກວດກາການດັດແປງສະພາບເຕັກນິກລົດເປັນຕົ້ນແມ່ນລົດໃຫຍ່ທີ່ດັດແປງໄຟຕາ, ຕິດດອກໄຟສະປອດໄລ ຫຼື ດອກແອວອີດີໃສ່ໜ້າລົດ ຫຼື ຫຼັງຄາລົດ; ຜ່ານການລົດປະຕິບັດໜ້າທີ່ ໃນ 3 ວັນຜ່ານມາ ເຈົ້າໜ້າທີ່ກວດພົບເຫັນລົດທີ່ລະເມີດຈໍານວນ 60 ກວ່າຄັນ, ຈໍານວນທີ່ລະເມີດນີ້ ເຈົ້າໜ້າທີ່ໄດ້ນຳຕົວເຈົ້າຂອງລົດມາສຶກສາອົບຮົມ ແລະ ເຮັດບົດບັນທຶກກ່າວເຕືອນໃຫ້ປົດດອກໄຟສະປອດໄລ ຫຼື ເອວອີດີ ອອກພາຍໃນ 30 ວັນ, ຖ້າກວດກາພົບເຫັນໃນຄັ້ງຕໍ່ໄປຈະໃຊ້ມາດຕະການປັບໃໝຕາມລະບຽບກົດໝາຍວາງອອກຢ່າງເຂັ້ມງວດ; ນອກຈາກນີ້, ເຈົ້າໜ້າທີ່ຍັງໄດ້ກວດກາຍານພາຫະນະທີ່ບໍ່ຕິດປ້າຍທະບຽນ, ດັດແປງສະພາບເຕັກນິກລົດ, ບໍ່ເສຍຄ່າທໍານຽມທາງ, ບໍ່ກວດກາເຕັກນິກລົດ, ລົດບໍ່ມີເອກະສານ ແລະ ອື່ນໆ.

ໂອກາດດຽວກັນ, ພັຕ ສຸນີ ໄຊຍະວົງ ຍັງຮຽກຮ້ອງມາຍັງພະນັກງານ, ທະຫານ-ຕໍາຫຼວດ, ປະຊາຊົນ, ຜູ້ໃຊ້ລົດ-ໃຊ້ຖະໜົນຢູ່ພາຍໃນເມືອງໄຊທານີ ຈົ່ງເອົາໃຈໃສ່ປະຕິບັດກົດລະບຽບຈະລາຈອນຢ່າງເຂັ້ມງວດ ໂດຍສະເພາະແມ່ນການດັດແປງໄຟຕາລົດດ້ວຍການນໍາເອົາດອກໄຟສະປອດໄລ ຫຼື ດອກເອວອີດີ ມາຕິດໃສລົດນັ້ນແມ່ນບໍ່ຄວນເຮັດ ເພາະເວລາສັນຈອນໄປ-ມາໃນຍາມຄໍ່າຄືນ ໄຟຕາລົດຂອງທ່ານອາດສ້າງຄວາມລົບກວນເຫຼື້ອມຕາເຮັດໃຫ້ລົດຄັນອື່ນທີ່ຂີ່ສວນທາງກັບລົດຂອງທ່ານແນມບໍ່ເຫັນ ສ່ຽງຕໍ່ການເກີດອຸບັດຕິເຫດໄດ້ງ່າຍ; ສະນັ້ນ, ຫາກທ່ານໄດມີດອກໄຟສະປອດໄລຕິດຢູ່ໜ້າລົດ ຫຼື ຫຼັງຄາລົດບັນດາທ່ານຄວນປົດອອກ ເພື່ອບໍ່ເປັນການລົບກວນ ແລະ ສ້າງຄວາມເດືອດຮ້ອນໃຫ້ແກ່ລົດຄັນອື່ນໆທີ່ຂີ່ສວນທາງມາ ແລະ ເປັນການປ້ອງກັນບໍ່ໃຫ້ລົດຄັນອື່ນ ຫຼື ລົດຂອງຕົນເອງເກີດອຸບັດຕິເຫດໃນຍາມຄໍ່າຄືນ.

Off

Comments are closed.