22nd Aug2022

ກອງບັນຊາການປ້ອງກັນຄວາມສະຫງົບເມືອງນາຊາຍທອງ ຈັດກອງປະຊຸມສະຫຼຸບວຽກງານຮອບດ້ານ 06 ເດືອນຕົ້ນປີ 2022

by somda phoneor

ກອງບັນຊາການປ້ອງກັນຄວາມສະຫງົບເມືອງນາຊາຍທອງ,ນະຄອນຫຼວງວຽງຈັນ,ຈັດກອງປະຊຸມສະຫຼຸບວຽກງານຮອບດ້ານ 06 ເດືອນຕົ້ນປີ ແລະ ທິດທາງແຜນການ 06 ເດືອນທ້າຍປີ2022,ໃນວັນທີ 22ສິງຫາ2022ນີ້, ພາຍໃຕ້ການເປັນປະທານຂອງ ພັທ ກົງ ຄະນະລັງສຸກ ຫົວໜ້າກອງບັນຊາການ ປກສ ເມືອງນາຊາຍທອງ ໃຫ້ກຽດເຂົ້າຮ່ວມມີທ່ານ ວຽງຄໍາ ສີຫາໂຄດ ເຈົ້າເມືອງນາຊາຍທອງ,ພັອ ພິມມະສອນ ທໍາມະວົງ ຮອງຫົວໜ້າກອງບັນຊາການປ້ອງກັນຄວາມສະຫງົບນະຄອນຫຼວງວຽງຈັນ, ມີບັນດາຄະນະພັກກອງບັນຊາການ ປກສ ເມືອງ, ປກສ ກຸ່ມບ້ານ, ນາຍບ້ານ ແລະພະນັກງານ-ນັກຮົບເຂົ້າຮ່ວມ.

ພັທ ບຸນສົງ ມຸນຕີ ຮອງຫົວໜ້າກອງບັນຊາການ ປກສ ເມືອງນາຊາຍທອງໄດ້ສະຫຼຸບຕີລາຄາບັນດາໜ້າວຽກງານຕ່າງໆທີ່ໄດ້ຈັດຕັ້ງປະຕິບັດໃນ 06 ເດືອນຜ່ານມາ, ຊື່ງທ່ານໄດ້ຍົກໃຫ້ເຫັນດ້ານດີຜົນງານທີ່ເຮັດໄດ້ ແລະ ດ້ານອ່ອນຂໍ້ຄົງຄ້າງ, ເປັນຕົ້ນດ້ານດີຜົນງານແມ່ນສາມາດຮັກສາໄດ້ຄວາມເປັນລະບຽບຮຽບຮ້ອຍທາງສັງຄົມ ປະຕິບັດຕາມມະຕິຄໍາສັ່ງຂອງ ຂັ້ນເທີງວາງອອກຢ່າງເຂັ້ມງວດ ໂດຍໄດ້ຫັນມາເປັນໂຄງການແຜນງານ ແລະ ນໍາພາຈັດ ຕັ້ງປະຕິບັດຢ່າງເປັນຂະບວນການຕໍ່ເນື່ອງ ອັນພົ້ນເດັ່ນ ແມ່ນໄດ້ປະຕິບັດຕາມແຜນງານສະກັດກັ້ນ ແກ້ໄຂປະກົດການຫຍໍ້ທໍ້ທົ່ວສັງຄົມໃນນີ້:​ ວຽກງານແກ້ໄຂອາຊະຍາກໍາທົ່ວໄປ ໃນ 06 ເດືອນຕົ້ນປີ ສາມາດແກ້ໄຂໄດ້ 64 ເລື່ອງ, ກັກຕົວຜູ້ຖືຫາ139 ຄົນ, ຍິງ 61 ຄົນ, ເຈົ້າໜ້າທີ່ຕໍາຫຼວດສາມາດເກັບກູ້ເຄື່ອງຂອງກາງໄດ້ຄືນ ມີເງິນກີບ 500.000.000 ກີບ,ຄໍາ 11 ບາດລົດຈັກ 06 ຄັນ, ແກ້ໄຂຄະດີຢາເສບຕິດ 06 ເດືອນຜ່ານມາ ສາມາດແກ້ໄຂໄດ້ ຄະດີທີ່ພົວພັນບັນຫາຢາເສບຕິດ ໄດ້ 64 ລາຍ, ກັກຕົວຜູ້ກະທຳຜິດມາດໍາເນີນຄະດີໄດ້ 142 ຄົນ, ຍິງ 19 ຄົນ,ໃນນັ້ນຄ້າ-ຂາຍຢາເສບຕິດ 37 ລາຍ, ກັກຕົວຜູ້ຕ້ອງາໄດ້ 74 ຄົນ, ຍິງ 13 ຄົນ, ມີຢາເສບຕິດໄວ້ໃນຄອບຄອງ  27 ລາຍ, ກັກຕົວຕ້ອງຫາໄດ້  68 ຄົນ, ຍິງ 06 ຄົນ,ຢຶດຂອງກາງຢາບ້າໄດ້ 1.041.095 ເມັດ, ລົດໃຫຍ່ 01 ຄັນ,ແກ້ໄຂຈຸດມົວສຸມໄດ້ 08 ຄັ້ງ,ກັກຕົວຜູ້ຕ້ອງຫາ 64 ຄົນ, ຍິງ 04 ຄົນແລະຂື້ນບັນຊີ ເປົ້າໝາຍທົ່ວເມືອງມີທັງໝົດ 1.179 ຄົນ, ຍິງ 66 ຄົນ, ພ້ອມນີ້ ວຽກງານ ສໍາມະໂນຄົວ ແລະ ກໍ່ສ້າງຮາກຖານ,ການປະເມີນຄອບຄົວບ້ານປອດຢາເສບຕິດ, ບ້ານປ້ອງ ກັນຄວາມສະຫງົບດີ,ພະນັກງານ ກໍ່ສ້າງຮາກຖານ ໄດ້ສົມທົບກັບບັນດາ 06 ກຸ່ມ ແລະ  54 ບ້ານ ລົງເຜີຍແຜ່ ຜົນ ຮ້າຍຂອງຢາເສບຕິດ ຕິດພັນກັບວາລະແຫ່ງຊາດໃຫ້ປະຊາຊົນໄດ້ເຊື່ອມຊຶມ ແລະ ເຂົ້າໃຈ,ເຊິ່ງໃນນີ້ມີຈໍານວນເຂົ້າຮ່ວມຮັບຟັງທັງໝົດ 1.855 ຄົນ, ຍິງ 363 ຄົນ,ນອກນັ້ນ ຍັງໄດ້ໂຄສະນາຜ່ານທາງໂທລະໂຄງ 232 ຄັ້ງ ,ລົງເຜີຍແຜ່ວາລະແຫ່ງຊາດໄດ້ 173 ຫົວຫນ່ວຍ,ມີຈໍານວນພົນເຂົ້າຮ່ວມ 1.024 ຄົນ, ຍິງ 358 ຄົນ,ລົງເຮັດບົດບັນທຶກ ສັນຍາຮັກສາຄວາມສະຫງົບ ກັບ ບັນດາຫ້າງຮ້ານ,ຫົວຫນ່ວຍທຸລະກິດທົ່ວເມືອງນາຊາຍທອງ 211 ຫົວຫນ່ວຍ,ໄດ້ຝຶກອົບຮົມ ແລະ ປັບປຸງກໍາລັງ ປກຊ – ປກສ ບ້ານໃຫ້ມີຄວາມເຂັ້ມແຂງ ພ້ອມນັ້ນ ຍັງບໍາລຸງສິດ ພາລະບົດບາດໜ້າທີ່ໃຫ້ມີຄວາມເຂັ້ມແຂງຈໍານວນ 54 ບ້ານແລະປະເມີນບ້ານປອດຢາເສບຕິດ ແລະ ບ້ານປ້ອງກັນຄວາມສະຫງົບດີໄດ້ 17 ບ້ານແລະອື່ນໆ.

ພ້ອມນີ້ບັນດາຜູ້ເຂົ້າຮ່ວມຍັງໄດ້ປະກອບຄໍາເຫັນໃສ່ບົດສະຫຼຸບແລະທິດທາງແຜນການວຽກງານຈຸດສຸມ06ເດືອນທ້າຍປີ 2022 ຢ່າງກົງໄປກົງມາ ແລະ ມີເນື້ອໃນເລິກເຊິ່ງ, ເພື່ອພ້ອມກັນສືບຕໍ່ຈັດຕັ້ງປະຕິບັດໜ້າທີ່ວຽກງານ ທີ່ພັກ-ລັດ,ການຈັດຕັ້ງຂັ້ນເທີງ ແລະ ປະຊາຊົນມອບໝາຍໃຫ້ຜົນສໍາເລັດອັນໃໝ່ທີ່ຍີ່ງໃຫ່ຍກວ່າເກົ່າ.

Off

Comments are closed.