23rd Aug2022

ຜົນຂອງກອງປະຊຸມປຶກສາຫາລື ອາຊຽນ-ຣັດເຊຍ ສຳລັບຜູ້ແທນຂັ້ນສູງ ວ່າດ້ວຍຄວາມໝັ້ນຄົງ ຄັ້ງທີ 2.

by somda phoneor

ກອງປະຊຸມປຶກສາຫາລືສໍາລັບເຈົ້າໜ້າທີ່ການນໍາຂັ້ນສູງ ດ້ານວຽກງານຮັກສາຄວາມໝັ້ນຄົງ ລະຫວ່າງ ອາຊຽນ ແລະ ຣັດເຊຍ ຄັ້ງທີ 2 ໄດ້ຈັດຂຶ້ນໃນວັນທີ 22 ສິງຫາ 2022 ໃນຮູບ​ແບບ​ທາງ​ໄກໂດຍແມ່ນ​ປະ​ເທດກຳ​ປູ​ເຈຍ​ເປັນ​ເຈ​ົ້າ​ພາບແລະປະ​ທານກອງ​ປະ​ຊຸມຮ່ວມກັບ ຣັດເຊຍ, ເຊີ່ງມີບັນດາຜູ້ແທນຂັ້ນສູງຮັບຜິດຊອບວຽກງານຄວາມໝັ້ນຄົງຈາກປະເທດສະມາຊິກອາຊຽນ, ຕາງໜ້າກອງເລຂາອາຊຽນ ແລະ ​ປະເທດຣັດເຊຍເຂົ້າຮ່ວມ ສຳ​ລັບຄະ​ນະ​ຜູ້​ແທນ​ຝ່າຍ​ ລາວແມ່ນ​ນຳໂດຍ ພົອ ວິໄລຫຼ້າຄໍາຟອງ, ຮອງນາຍົກລັດຖະມົນຕີ, ລັດຖະມົນຕີກະ​ຊວງ​ປ້ອງ​ກັນ​ຄວາມ​ສະ​ຫງົບພ້ອມທັງນາຍ ແລະ ພົນຕໍາຫຼວດຈາກ​ກົມ​ກອງ​ທີ່​ກ່ຽວ​ຂ້ອງເຂົ້າ​ຮ່ວມ.

ຈຸດ​ປະ​ສົງຂອງກອງປະຊຸມ​ແມ່ນເພື່ອປຶກສາຫາລືກັນກ່ຽວກັບບັນຫາຄວາມໝັ້ນຄົງ ແລະ ສິ່ງທ້າທາຍໃນພາກພື້ນອາຊີ-ປາຊີຟິກ, ເຊິ່ງລວມມີ: 2 ຫົວຂໍ້ຄື: ສະຖຽນລະພາບດ້ານຍຸດ​ທະ​ສາດ​​, ໂດຍສະເພາະແມ່ນ ກົນ​ໄກການ​ຄວບ​ຄຸມ​ອາວຸດເສິກ ​ແລະ ການ​ບໍ່​ແຜ່​ຜາຍອາວຸດເສິກ, ຜົນກະທົບຕໍ່ຄວາມໝັ້ນຄົງໃນພາກພື້ນອາຊີ-ປາຊີຟິກ ແລະ ສະພາບການ ໃນພາກພື້ນອາຊີ-ປາຊີຟິກ ໃນຂົງເຂດການເມືອງ ແລະ ຄວາມໝັ້ນຄົງ ໃນທ່າມກາງຄວາມເຄັ່ງຕຶຶງທີ່ເພີ່ມຂຶ້ນ ລະຫວ່າງປະເທດມະຫາອໍານາດໃນພາກພື້ນ.

ທັດສະນະຂອງ ສປປ ລາວ: ພາກພື້ນອາຊີ-ປາຊີຟິກ, ເປັນທີ່ຢູ່ອາໃສຂອງປະຊາຊົນ 4.3 ຕື້ຄົນ, ແມ່ນໜຶ່ງໃນບັນດາຂົງເຂດທີ່ມີທ່າແຮງສູງທາງດ້ານການພັດທະນາເສດຖະກິດ-ສັງຄົມ, ວິທະຍາສາດ-ເຕັກໂນໂລຊີ ແລະ ອື່ນໆ. ເຖິງຢ່າງໃດກໍ່ຕາມ ພາກພື້ນອາຊີ-ປາຊີຟິກ ເປັນພາກພື້ນທີ່ມີຄວາມສຳຄັນທາງຍຸດທະສາດ ແລະ ເປັນພາກພື້ນທີ່ຫຼາຍປະເທດມີຄວາມແຕກຕ່າງໃນການເບິ່ງບັນຫາຕ່າງໆ. ໃນຂະນະດຽວກັນ ສະພາບການຂອງໂລກ ໄດ້ມີການຝັນແປໄປຢ່າງສະຫຼັບສັບຊ້ອນ ແລະ ມີຫຼາຍປັດໃຈທີ່ຈະກໍ່ໃຫ້ເກີດບັນຫາຮ້າຍແຮງ ກະທົບຕໍ່ຄວາມໝັ້ນຄົງໃນພາກພື້້ນ ຖ້າບໍ່ໄດ້ຮັບການແກ້ໄຂຢ່າງຖືກຕ້ອງ ທັນເວລາ ຕາມລະບຽບຫຼັກ ການຂອງພາກພື້ນ ແລະ ສາກົນ.

ເຖິງຢ່າງໃດກໍ່ຕາມ ສປປ ລາວ ເຊື່ອໝັ້ນຢ່າງໜັກແໜ້ນວ່າ ບັນດາປະເທດສະມາຊິກອາຊຽນ ແລະ ສະຫະພັນ ຣັດເຊຍ ຈະຮ່ວມມືກັນຢ່າງໃກ້ຊິດ, ຊ່ວຍເຫຼືອ ເຊິ່ງກັນ ແລະ ກັນ ພ້ອມກັນຮັກສາສັນຕິ ພາບ, ສະຖຽນລະພາບ ແລະ ຄວາມໝັ້ນຄົງໃນພາກພື້ນ. ສຳລັບ ສປປ ລາວ ຍາມໃດກໍ່່ຍຶດໝັ້ນນະໂຍບາຍການຕ່າງປະເທດ ສັນຕິພາບ, ເອກະລາດ, ມິດຕະພາບ ແລະ ການຮ່ວມມື ພ້ອມທັງຫຼັກການແກ້ໄຂຂໍ້ຂັດແຍ່ງດ້ວຍສັນຕິວິທີ, ບໍ່ແຊກແຊງເຂົ້າໃນກິດຈະການພາຍໃນຂອງກັນ ແລະ ກັນ. ພ້ອມນັ້ນ ໃນນາມເປັນປະເທດສະມາຊິກອາຊຽນ, ສປປ ລາວ ຍຶດໝັ້ນໃນຫຼັກການ ແລະ ກົນໄກການຮ່ວມມືຂອງອາຊຽນທີ່ຖືເອົາອາຊຽນເປັນແກນກາງ ແນໃສ່ການບັນລຸເປົ້າໝາຍການສ້າງປະ ຊາຄົມອາຊຽນ ທີ່ມີຄວາມສາມັກຄີ, ກົມກຽວກັນ, ທຸກຄົນດຳລົງຊີວິດພາຍໃຕ້ສັນຕິພາບ ແລະ ມີຄວາມຈະເລີນຮຸ່ງເຮືອງ.

ສປປ ລາວ ສະໜັບສະໜູນການພົວພັນຮ່ວມມືລະຫວ່າງ ອາຊຽນ ແລະ ສະຫະພັນ ຣັດເຊຍ ເຊິ່ງເປັນຄູ່ຮ່ວມຍຸດທະສາດທີ່ສຳຄັນ ແລະ ຍາວນານ ຂອງອາຊຽນ. ໃນຂົງເຂດຄວາມໝັ້ນຄົງ ຣັດເຊຍ ແລະ ອາຊຽນ ໄດ້ມີຫຼາຍກົນໄກຮ່ວມມືທີ່ມີປະສິດທິພາບນຳກັນ ເຊັ່ນ: ກົນໄກກອງປະຊຸມປຶກສາຫາລືເວທີພາກພື້້ນອາຊຽນ, ກົນໄກກອງປະຊຸມລັດຖະມົນຕີປ້ອງກັນປະເທດອາຊຽນ ບວກ ຣັດເຊຍ ແລະ ກົນໄກກອງປະຊຸມປຶກສາຫາລື ອາຊຽນ-ຣັດເຊຍ ສຳລັບເຈົ້າໜ້າທີ່ລະດັບສູງດ້ານຄວາມໝັ້ນຄົງນີ້ ເຊິ່ງຫາກໍ່ໄດ້ຮັບການສ້າງຕັ້ງຂຶ້ນໃນປີຜ່ານມາ. ການພົວພັນຮ່ວມມືອັນດີ ລະຫວ່າງ ອາຊຽນ ແລະ ສະຫະພັນ ຣັດເຊຍ ໃນໄລຍະຜ່ານມາ ໄດ້ປະກອບສ່ວນຢ່າງໃຫຍ່ຫຼວງເຂົ້າໃນການຮັກສາສັນຕິພາບ ແລະ ຄວາມໝັ້ນຄົງໃນພາກພື້້ນ ແລະ ໃນໂລກ.

ນອກຈາກບັນຫາທີ່ກ່າວມາຂ້າງເທິງແລ້ວ ອາຊຽນ ແລະ ສະຫະພັນ ຣັດເຊຍ ໄດ້ມີການຮ່ວມມືກັນເປັນຢ່າງດີໃນການຕ້ານອາຊະຍາກຳຂ້າມຊາດ ໂດຍຜ່ານກົນໄກກອງປະຊຸມປຶກສາຫາລືເຈົ້າໜ້າທີ່ອາວຸ ໂສ ອາຊຽນ-ຣັດເຊຍ ວ່າດ້ວຍການຕ້ານອາຊະຍາກຳຂ້າມຊາດ. ໃນແຕ່ລະປີເຈົ້າໜ້າທີ່ທີ່ກ່ຽວຂ້ອງຂອງສອງຝ່າຍໄດ້ມີການປະຊຸມປຶກສາຫາລືແລກປ່ຽນສະພາບການ, ບົດຮຽນ ແລະ ວິທີການແກ້ໄຂບັນຫາອາຊະຍາກຳຮ່ວມກັນ. ເຖິງຢ່າງໃດກໍ່ຕາມ ເຫັນວ່າ ບັນຫາການລັກລອບຄ້າຂາຍອາວຸດ, ການລັກ ລອບຄ້າຂາຍຢາເສບຕິດ, ອາຊະຍາກໍາທາງຄອມພິວເຕີ, ການສໍ້ໂກງທາງໂທລະຄົມ, ການສໍ້ໂກງທາງທະ ນາຄານ, ການກໍ່ການຮ້າຍ, ຄ້າມະນຸດ, ແລະ ອື່ນໆ ຍັງເປັນໄພຂົ່ມຂູ່ຕໍ່ຄວາມໝັ້ນຄົງຂອງບັນດາປະເທດໃນພາກພື້ນ. ພວກກໍ່ອາຊະຍາກຳ ໄດ້ສວຍໃຊ້ວິທະຍາສາດ ແລະ ເຕັກໂນໂລຊີທີ່ທັນສະໄໝເຂົ້າໃນການ ເຄື່ອນໄຫວກະທຳຜິດ ເພື່ອຫຼົບຫຼີກການຈັບກຸມ ແລະ ດຳເນີນຄະດີຂອງເຈົ້າໜ້າທີ່, ເຊິ່ງໄດ້ສ້າງຄວາມເສຍຫາຍຢ່າງຫຼວງຫຼາຍຕໍ່ຊີວິດ ແລະ ຊັບສິນຂອງປະຊາຊົນ ໃນພາກພື້້ນ ແລະ ໃນໂລກ.

ສປປ ລາວ ຍາມໃດກໍ່ເຫັນວ່າ ການຮ່ວມມືສາກົນເປັນສິ່ງສຳຄັນ ແລະ ຈຳເປັນສຳລັບການແກ້ໄຂບັນຫາອາຊະຍາກຳປະເພດຕ່າງໆ ເພື່ອຮັກສາຄວາມສະຫງົບປອດໄພສ້າງເງື່ອນໄຂເອື້ອອຳນວຍໃຫ້ແກ່ການພັດທະນາຍົກລະດັບຊີວິດການເປັນຢູ່ຂອງປະຊາຊົນໃຫ້ນັບມື້ດີຂຶ້ນ ແລະ ເຊື່ອໝັ້ນວ່າ ບັນດາປະເທດສະມາຊິກອາຊຽນ ແລະ ສະຫະພັນຣັດເຊຍ ຈະສືບຕໍ່ຮ່ວມມືກັນ, ແລກປ່ຽນຂໍ້ມູນຂ່າວສານ, ບົດຮຽນ, ປະສົບການນຳກັນ, ຊ່ວຍເຫຼືອ ເຊິ່ງກັນ ແລະ ກັນ ໃນການຍົກລະດັບຄວາມສາມາດຂອງເຈົ້າໜ້າທີ່ ເພື່ອປ້ອງກັນ, ສະກັດກັ້ນ ແລະ ແກ້ໄຂບັນຫາທີ່ຄວາມເປັນອັນຕະລາຍຮ້າຍແຮງຕໍ່ສັງຄົມ.

ສປປ ລາວ ເຊື່ອໝັ້ນຢ່າງໜັກແໜ້ນວ່າ ການເປັນຄູ່ຮ່ວມຍຸດທະສາດ ແລະ ການພົວພັນຮ່ວມມືລະຫວ່າງອາຊຽນ ແລະ ຣັດເຊຍ, ໂດຍສະເພາະແມ່ນຂົງເຂດການຮັກສາຄວາມໝັ້ນຄົງ ແລະ ຄວາມເປັນລະບຽບຮຽບຮ້ອຍຂອງສັງຄົມຈະໄດ້ຮັບການສືບຕໍ່ເສີມຂະຫຍາຍຢ່າງບໍ່ຢຸດຢັ້ງ.

 

Off

Comments are closed.