25th Aug2022

ພິທີວາງສີລາລຶກໂຄງການກໍ່ສ້າງວິທະຍາຄານການເມືອງປ້ອງກັນຄວາມສະຫງົບປະຊາຊົນລາວ

by Peaung Thanonkeo

ພິທີວາງສີລາລຶກໂຄງການກໍ່ສ້າງວິທະຍາຄານການເມືອງປ້ອງກັນຄວາມສະຫງົບປະຊາຊົນລາວ ໄດ້ຈັດຂື້ນໃນວັນທີ 25 ສິງຫາ 2022 ນີ້ ຢູ່ທີ່ ບ້ານໂນນສະອາດ ເມືອງໄຊທານີ ນະຄອນຫຼວງວຽງຈັນ, ເປັນກຽດເຂົ້າຮ່ວມຂອງ ພົອ ວິໄລ ຫຼ້າຄຳຟອງ ກຳມະການກົມການເມືອງສູນກາງພັກ ຮອງນາຍົກ ລັດຖະມົນຕີ ລັດຖະມົນຕີກະຊວງປ້ອງກັນຄວາມສະຫງົບລາວ, ພົອ ສຈ. ປອ ໂຕເລີມ ກຳມະການກົມການເມືອງສູນກາງພັກຄອມມູນິດຫວຽດນາມ ລັດຖະມົນຕີກະຊວງປ້ອງກັນຄວາມສະຫງົບຫວຽດນາມ, ມີເອກອັກຄະລັດຖະທູດຜູ້ມີອຳນາດເຕັມແຫ່ງສສຫວຽດນາມປະຈຳ ສປປລາວ, ຄະນະນຳທັງສອງກະຊວງ ແລະ ແຂກຖືກເຊີນເຂົ້າຮ່ວມ.

ໂຄງການກໍ່ສ້າງວິທະຍາຄານປ້ອງກັນຄວາມສະຫງົບປະຊາຊົນລາວແມ່ນສ່ວນໜື່ງຂອງແຜນການຜັນຂະຫຍາຍສັນຍາຮ່ວມມືລະຫວ່າງກະຊວງປ້ອງກັນຄວາມສະຫງົບລາວ ແລະ ກະຊວງປ້ອງກັນຄວາມສະຫງົບຫວຽດນາມ ປີ 2022 ເຊີ່ງເປັນທືນຊ່ວຍເຫຼືອຈາກລັດຖະບານຫວຽດນາມ ດ້ວຍງົບປະມານ 250 ຕື້ດົງ ແລະ ທືນສົມທົບຈາກລັດຖະບານລາວ ຂອບເຂດການລົງທືນກໍ່ສ້າງພື້ນຖານໂຄງລ່າງ ແລະ ວັດຖຸອຸປະກອນຈຳເປັນເພື່ອຮັບໃຊ້ໃນການສິດສອນຮ່ຳຮຽນ. ເນື້ອທີ່ກໍ່ສ້າງທັງໝົດ 6,5 ເຮັກຕາ .

ໂອກາດດັ່ງກ່າວ ພົອ ວິໄລ ຫຼ້າຄໍາຟອງ ໄດ້ກ່າວມີຄໍາເຫັນວ່າ: ໂຄງການກໍ່ສ້າງວິທະຍາຄານການເມືອງປ້ອງກັນຄວາມສະຫງົບປະຊາຊົນ ແມ່ນສ້າງຂຶ້ນໃນທ່າມກາງບັນຍາກາດທົ່ວພັກ-ທົ່ວລັດ , ທົ່ວກຳລັງປະກອບອາວຸດ ແລະ ທົ່ວປວງຊົນລາວທັງຊາດພວມເບີກບານມ່ວນຊື່ນໃນການຈັດຕັ້ງສະເຫຼີມສະຫຼອງສອງວັນປະຫັວດສາດ ລາວ-ຫວຽດນາມ, ວັນສ້າງຕັ້ງສາຍພົວພັນການທູດ ຄົບຮອບ 60 ປີ ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດນາມຄົບຮອບ 45 ປີ, ໂຄງການດັ່ງກ່າວ ກະຊວງປ້ອງກັນຄວາມສະຫງົບຫວຽດນາມໄດ້ເອົາໃຈໃສ່ຊ່ວຍເຫຼືອເປັນພິເສດ ໃນການສະເໜີລັດຖະບານ ແລະ ປະສານສົມທົບພາກສ່ວນກ່ຽວຂ້ອງເຮັດໃຫ້ໂຄງການນີ້ໄດ້ຮັບການອະນຸມັດໂດຍໄວ. ເຫດຜົນໃນການສະເໜີກໍ່ສ້າງວິທະຍາຄານການເມືອງປ້ອງກັນຄວາມສະຫງົບ ອີງໃສ່ສະພາບ ຄວາມເປັນຈິງ ກ່ຽວກັບຄວາມຕ້ອງການຂອງໜ້າທີ່ການເມືອງໃນໄລຍະໃໝ່ ແລະ ມາດຖານເງື່ອນໄຂ ຂອງພະນັກງານຂັ້ນນຳພາ-ບັນຊາ ໃນປະຈຸບັນ ແລະ ເພື່ອຍົກລະດັບຄວາມຮູ້ທາງດ້ານທິດສະດີການເມືອງ ໃນກຳລັງປ້ອງກັນຄວາມສະຫງົບ ໃຫ້ສູງຂື້ນກວ່າເກົ່າ ກະຊວງປ້ອງກັນຄວາມສະຫງົບ ເຫັນວ່າ: ຕ້ອງໄດ້ຍົກລະດັບໂຮງຮຽນທິດສະດີການເມືອງປ້ອງກັນຄວາມສະຫງົບ ເປັນວິທະຍາຄານການເມືອງປ້ອງກັນຄວາມສະຫງົບ, ໃນເມື່ອຍົກລະດັບເປັນວິທະຍາຄານແລ້ວ ທຽບໃສ່ສະພາບຂອງພື້ນທີ່ໃນປະຈຸບັນແມ່ນຄັບແຄບ, ພື້ນທີ່ຕ່ຳມີຄວາມຫຍຸ້ງຍາກຂະຫຍາຍສະພາບຂອງອາຄານຮຽນ, ຫໍພັກນັກສຶກສາເກົ່າແກ່ຊຸດໂຊມ, ສະພາບຫ້ອງຮຽນ, ອາຄານຮຽນ ແລະ ຈຳນວນນັກສຶກສາໃນປະຈຸບັນແມ່ນເພີມຂື້ນຫຼາຍ ເຫັນວ່າພື້ນຖານໂຄງລ່າງບໍ່ພຽງພໍ ສະນັ້ນ, ເພື່ອເປັນການຍົກລະດັບ ຄວາມຮູ້ທາງດ້ານທິດສະດີການເມືອງ ຂອງກຳລັງປ້ອງກັນຄວາມສະຫງົບ ໃຫ້ສູງຂຶ້ນໃນສະເພາະໜ້າ ແລະ ຍາວນານ ມີຄວາມຈຳເປັນຕ້ອງໄດ້ຍົກລະດັບ ເປັນວິທະຍາຄານການເມືອງປ້ອງກັນຄວາມສະຫງົບ ແລະ ມີຄວາມຈຳເປັນຕ້ອງໄດ້ກໍ່ສ້າງລະບົບພື້ນຖານໂຄງລ່າງຂອງວິທະຍາຄານໃຫ້ເປັນລະບົບຄົບຊຸດ, ເຊື່ອໝັ້ນວ່າໂຄງການດັ່ງກ່າວຈະກາຍເປັນການປະກອບສ່ວນອັນສຳຄັນ ໃຫ້ກະຊວງ ປ້ອງກັນຄວາມສະຫງົບລາວ ເຮັດສຳເລັດໜ້າທີ່ຂອງຕົນ ໃນວຽກງານບໍາລຸງກໍ່ສ້າງ, ຍົກສູງຄຸນນະພາບ ການສຶກສາໃຫ້ພະນັກງານ, ນັກສຶກສາທົ່ວກຳລັງປ້ອງກັນຄວາມສະຫງົບລາວ ໄດ້ຮັບການສຶກສາທີ່ມີ ຄຸນນະພາບ ແລະ ພື້ນຖານໂຄງລ່າງ, ວັດຖຸອຸປະກອນການຮຽນ -ການສອນທີ່ດີຂື້ນ. ພາຍຫຼັງສຳເລັດໂຄງການ ກະຊວງປ້ອງກັນຄວາມສະຫງົບລາວ ຈະນໍາໃຊ້ວິທະຍາຄານດັ່ງກ່າວ ເຂົ້າໃນວຽກງານ ບຳລຸງກໍ່ສ້າງ, ສິດສອນ ແລະ ຮໍ່າຮຽນ ໃຫ້ເກີດຜົນປະໂຫຍດສູງສຸດ ເພື່ອຍົກລະດັບຄວາມຮູ້, ຄວາມສາມາດໃຫ້ກັບນັກສຶກສາທົ່ວກຳລັງ ແລະ ປະກອບສ່ວນສໍາຄັນໃນການສ້າງບຸກຄະລາກອນໃຫ້ເຂົ້າໃຈມີຄວາມຮູ້ທາງດ້ານທິດສະດີການເມືອງ, ກຳໄດ້ແນວທາງຂອງພັກ ແລະ ລັດຖະບານ ກໍຄືຂົງເຂດວຽກງານປ້ອງກັນຄວາມສະຫງົບ. ມີຄຸນທາດການເມືອງໜັກແໜ້ນ, ມີວິຊາສະເພາະທີ່ແຫຼມຄົມເພື່ອຮັບໃຊ້ປະເທດຊາດ. ພ້ອມກັນນັ້ນ, ກໍຈະປົກປັກຮັກສາຫ້ອງຮຽນ, ຕຶກອາຄານ ພ້ອມວັດຖຸອຸປະກອນຕ່າງໆ ໃນວິທະຍາຄານໃຫ້ດີ ເພື່ອນໍາໃຊ້ໄດ້ຍາວນານ.

 

Off

Comments are closed.