25th Aug2022

ຄະນະພົວພັນຕ່າງປະເທດສູນກາງພັກຕີລາຄາການເຄື່ອນໄຫວວຽກງານຕ່າງປະເທດຂອງພັກ ແລະ ການທູດປະຊາຊົນ

by Peaung Thanonkeo

ຄະນະພົວພັນຕ່າງປະເທດສູນກາງພັກ,ໄດ້ຈັດກອງປະຊຸມສະຫລຸບຕີລາຄາ ແລະ ຖອດຖອນບົດຮຽນ ການເຄື່ອນໄຫວວຽກງານຕ່າງປະເທດ ຂອງບັນດາອົງການພັກ,ສູນກາງແນວລາວສ້າງຊາດ,ສະຫະພັນນັກຮົບເກົ່າແຫ່ງຊາດລາວ,ບັນດາອົງການຈັດຕັ້ງມະຫາຊົນຂັ້ນສູນກາງ,ຄະນະສັນຕິພາບ,ສາມັກຄີຂອງລາວ ແລະ  ບັນດາສະມາຄົມມິດຕະພາບລາວກັບຕ່າງປະເທດປະຈຳ 6 ເດືອນຕົ້ນປີ ແລະ ວາງທິດທາງແຜນການ 6 ເດືອນ ທ້າຍປີ 2022,ໃນວັນທີ 24 ສິງຫາ 2022ນີ້,ພາຍໃຕ້ເປັນປະທານຂອງສະຫາຍ ທອງສະຫວັນ ພົມວິຫານ ກຳມະການສູນກາງພັກ,ຫົວໜ້າຄະນະພົວພັນຕ່າງປະເທດສູນກາງພັກ,ມີຜູ້ຕາງໜ້າຈາກບັນດາຄະນະນໍາ,ຄະນະກົມ ແລະ ພະນັກງານ ຈາກອົງການຈັດຕັ້ງທີ່ກ່ຽວຂ້ອງເຂົ້າຮ່ວມ.

ໃນກອງປະຊຸມ,ຜູ້ເຂົ້າຮ່ວມໄດ້ແລກປ່ຽນຄວາມຄິດເຫັນຢ່າງກົງໄປກົງມາ,ໄດ້ຕີລາຄາດ້ານດີ,ຍົກໃຫ້ເຫັນດ້ານຄົງຄ້າງ,ບົດຮຽນທີ່ຖອດຖອນໄດ້ໃນໄລຍະຜ່ານມາ ກ່ຽວກັບການຈັດຕັ້ງປະຕິບັດວຽກງານການຕ່າງປະເທດຂອງພັກ ແລະ ການທູດປະຊາຊົນ ໂດຍເນັ້ນເຖິງຄວາມສໍາຄັນ ແລະ ຈໍາເປັນໃນການເພີ່ມທະວີການເປັນເສນາທິການໃຫ້ແກ່ສູນກາງພັກ ໃນການເຄື່ອນໄຫວວຽກງານຕ່າງປະເທດ ຕາມມະຕິກອງປະຊຸມໃຫຍ່ ສະໄໝ XI ຂອງພັກວາງອອກໃນທ່າມກາງສະພາບການຢູ່ພາກພື້ນ ແລະ ສາກົນ ສືບຕໍ່ມີການປ່ຽນແປງຢ່າງໄວວາ ແລະ ສະຫລັບສັບຊ້ອນຄາດຄະເນໄດ້ຍາກມີທັງສິ່ງທ້າທາຍໃໝ່ຫລາຍປະການເກີດຂຶ້ນ.

ໂອກາດດັ່ງກ່າວ,ສະຫາຍ ທອງສະຫວັນ ພົມວິຫານ ໄດ້ມີຄຳເຫັນໂອ້ລົມໂດຍໄດ້ສະແດງຄວາມຊົມ ເຊີຍ ແລະ ຕີລາຄາສູງຕໍ່ຜົນງານ,ຜົນສໍາເລັດໃນການເຄື່ອນໄຫວການຕ່າງປະເທດຂອງພັກ ແລະ ການທູດປະຊາຊົນ ທີ່ຍາດມາໄດ້ໃນໄລຍະຜ່ານມາ,ພ້ອມທັງຮຽກຮ້ອງໃຫ້ທຸກພາກສ່ວນທີ່ກ່ຽວຂ້ອງຈົ່ງສືບຕໍ່ເປັນເຈົ້າການຈັດຕັ້ງຜັນຂະຫຍາຍແນວທາງການຕ່າງປະເທດ ທີ່ກອງປະຊຸມໃຫຍ່ຄັ້ງທີ XI ຂອງພັກວາງອອກ,ສືບຕໍ່ເປີດກວ້າງການພົວພັນດ້ານພັກ ກັບຕ່າງປະເທດຍູ້ແຮງການທູດປະຊາຊົນ,ຍາດແຍ່ງຂົນຂວາຍການສະໜັບສະໜູນ ແລະ ຊ່ວຍເຫລືອຈາກເພື່ອນມິດທັງໃກ້ ແລະ ໄກ,ສືບຕໍ່ປະຕິບັດແຜນການສະເຫຼີມສະຫລອງປີສາມັກຄີມິດຕະພາບ ລາວ-ຫວຽດນາມ 2022 ກໍຄື ວັນສ້າງຕັ້ງສາຍພົວພັນການທູດລາວ-ຫວຽດນາມ ຄົບຮອບ 60 ປີ ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມືຄົບຮອບ 45 ປີ ໃຫ້ເປັນຂະບວນຟົດຟື້ນ,ທັງເປັນການໂຄສະນາແນວທາງການຕ່າງປະເທດຂອງພັກ ເພື່ອປະກອບສ່ວນເຂົ້າໃນການສ້າງສະພາບແວດລ້ອມສາກົນ ທີ່ເອື້ອອໍານວຍໃຫ້ແກ່ພາລະກິດການປົກປັກຮັກສາ ແລະ ສ້າງສາພັດ ທະນາປະເທດຊາດ,ສືບຕໍ່ຍົກສູງຖານະບົດບາດຂອງພັກ,ລັດເຮົາໃນເວທີພາກພື້ນ ແລະ ສາກົນ.

Off

Comments are closed.