25th Aug2022

ງານວາງສະແດງຮູບພາບການພົວພັນຮ່ວມມືພິເສດຮອບດ້ານລະຫວ່າງ ກະຊວງປ້ອງກັນຄວາມສະຫງົບລາວ-ຫວຽດ

by Peaung Thanonkeo

ກະຊວງປ້ອງກັນຄວາມສະຫງົບລາວ ໄດ້ຈັດງານວາງສະແດງຮູບພາບການພົວພັນຮ່ວມມືພິເສດ ຮອບດ້ານ ລະຫວ່າງກະຊວງ ປກສ ລາວ ແລະ ຫວຽດນາມ, ເນືອງໃນໂອກາດສະເຫຼີມສະຫຼອງປີສາມັກຄີລາວ-ຫວຽດນາມ ປີ 2022 ຢູ່ທີ່ ຫໍພິພິທະພັນປ້ອງກັນຄວາມສະຫງົບລາວ, ໃນວັນທີ 25 ສິງຫາ 2022 ນີ້, ໂດຍການເປັນກຽດເຂົ້າຮ່ວມຂອງ ພົອ ວິໄລ ຫຼ້າຄຳຟອງ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະມົນຕີ ກະຊວງປ້ອງກັນຄວາມສະຫງົບລາວ, ພົອ ສຈ ປອ ໂຕເລີມ ກຳມະການກົມການສູນກາງພັກ ລັດຖະມົນຕີກະຊວງປ້ອງກັນຄວາມສະຫງົບຫວຽດນາມ, ການນຳພັກ-ລັດ, ຄະນະນຳກະຊວງປ້ອງກັນຄວາມສະຫງົບລາວ-ຫວຽດນາມເຂົ້າຮ່ວມ.

ພົຕ ວັນທອງ ກອງມະນີ ກຳມະການສູນກາງພັກ ຮອງລັດຖະມົນຕີ ຫົວໜ້າກົມໃຫ່ຍການເມືອງ ກະຊວງປ້ອງກັນຄວາມສະຫງົບ ໄດ້ກ່າວເປີດງານວາງສະແດງຮູບພາບຄັ້ງນີ້ວ່າ: ສອງວັນປະຫວັດສາດ ຄື: ວັນເຊັນສົນທິສັນຍາມິດຕະພາບ ແລະ ການຮ່ວມມືລາວ-ຫວຽດນາມ ຄົບ ຮອບ 45 ປີ (18 ກໍລະກົດ 1977 – 18 ກໍລະກົດ 2022) ແລະ ວັນສ້າງຕັ້ງສາຍພົວພັນທາງການທູດລາວ-ຫວຽດນາມ ຄົບຮອບ 60 ປີ (05 ກັນຍາ 1962 – 05 ກັນຍາ 2022) ແມ່ນສອງວັນທີ່ມີຄວາມໝາຍສຳຄັນຍິ່ງ ທີ່ໄດ້ໝູນວຽນມາບັນຈົບຄົບຮອບອີກວາລະໜຶ່ງໃນປີນີ້, ເຊິ່ງສອງພັກ, ສອງລັດລາວ-ຫວຽດນາມ ໄດ້ຕົກລົງຈັດຕັ້ງການສະເຫຼີມສະຫຼອງສອງວັນດັ່ງກ່າວ ໃຫ້ເປັນຂະບວນການຟົດຟື້ນ ແລະ ມີຄວາມໝາຍເລິກເຊິ່ງ ເພື່ອເປັນການຫວນຄືນມູນເຊື້ອແຫ່ງການພົວພັນມິດຕະພາບ ແລະ ຄວາມສາມັກຄີພິເສດລາວ-ຫວຽດນາມ ທີ່ເປັນປັດໄຈອັນສຳຄັນຕັດສິນ ໃຫ້ແກ່ໄຊຊະນະຂອງການປະຕິວັດລາວ ແລະ ຫວຽດນາມ ໃນພາລະກິດຕໍ່ສູ້ປົດປ່ອຍຊາດໃນເມື່ອກ່ອນ ກໍ່ຄືການສ້າງສາພັດທະນາຂອງທັງສອງປະເທດໃນປະຈຸບັນ, ທັງເປັນການເສີມຂະຫຍາຍມູນເຊື້ອ, ຍົກສູງຄວາມຮັບຜິດຊອບ ໃນການປົກປັກຮັກສາ, ເພີ່ມພູນຄູນສ້າງ ແລະ ພັດທະນາສາຍພົວພັນອັນຈົບງາມຂອງສອງປະເທດ ໃຫ້ນັບມື້ເຕີບໃຫຍ່ຂະຫຍາຍຕົວ, ກ້າວສູ່ລວງເລິກ ແລະ ດຳລົງຄົງຢູ່ຄູ່ກັບສອງຊາດລາວ-ຫວຽດນາມ ຊົ່ວກາລະນາ. ມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ຂອງສອງພັກ, ສອງລັດ ແລະ ປະຊາຊົນສອງຊາດ ໄດ້ຮັບການພິສູດ ແລະ ຢັ້ງຢືນຈາກຂະບວນວິວັດ ໃນປະຫວັດສາດແຫ່ງການຕໍ່ສູ້ຂອງສອງຊາດ, ທີ່ຜ່ານແປວໄຟສົງຄາມປະຕິວັດ ເຊິ່ງມັນໄດ້ຊຸບຫຼໍ່ນໍ້າໃຈມິດຕະພາບທີ່ບໍ່ມີວັນບົກແຫ້ງ; ຄວາມສາມັກຄີພິເສດອັນດູດດື່ມ ແລະ ຜ່ອງໃສນັ້ນ ຈະບໍ່ມີສັດຕູໂຕໃດ ທີ່ຈະສາມາດມາທັບມ້າງໄດ້, ອັນໄດ້ກາຍເປັນມູນມໍລະດົກທີ່ລໍ້າຄ່າຂອງສອງຊາດ; ເຊິ່ງປະທານ ໂຮ່ຈີມິນ, ປະທານ ໄກສອນ ພົມວິຫານ, ປະທານ ສຸພານຸວົງ ແລະ ການນຳຮຸ່ນທຳອິດ ເປັນຜູ້ລິເລີ່ມສ້າງຂຶ້ນ, ໄດ້ກາຍເປັນມູນເຊື້ອໃຫ້ການນໍາຮຸ່ນຕໍ່ໆມາຂອງສອງພັກ, ສອງລັດ ໄດ້ສືບຕໍ່ເສີມຂະຫຍາຍ, ເພີ່ມພູນຄູນສ້າງ, ທະນຸຖະໜອມຫອມຮັກ ໃຫ້ນັບມື້ງອກງາມ ທັງເປັນບົດຮຽນອັນລໍ້າຄ່າ ທີ່ບໍ່ສາມາດຊອກຫາໄດ້ອີກແລ້ວໃນໂລກນີ້.

ເມື່ອສອງປະເທດລາວ-ຫວຽດນາມ, ຫວຽດນາມ-ລາວ ໄດ້ຮັບການປົດປ່ອຍ ກໍ່ໄດ້ສືບຕໍ່ຊ່ວຍເຫຼືອເຊິ່ງກັນ ແລະ ກັນ ຢ່າງບໍ່ມີເງື່ອນໄຂ “ຄືໄມ້ຮ່ວມກໍ, ຄືປໍຮ່ວມເຊືອກ ແລະ ສຸກທຸກຮ່ວມກັນ” ພ້ອມກັນປະຕິບັດແນວທາງປ່ຽນແປງໃໝ່, ຕິດພັນກັບການປົກປັກຮັກສາ ແລະ ສ້າງສາພັດທະນາປະເທດຊາດຂອງຕົນ ເພື່ອກ້າວຂຶ້ນສູ່ຈຸດໝາຍທີ່ວາງໄວ້.

ເພື່ອສືບຕໍ່ເສີມຂະຫຍາຍມູນເຊື້ອ ມິດຕະພາບອັນຍິງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ຂອງສອງພັກ, ສອງລັດ ກໍ່ຄືກະຊວງປ້ອງກັນຄວາມສະຫງົບລາວ ແລະ ກະຊວງປ້ອງກັນຄວາມສະຫງົບຫວຽດນາມ, ທັງເປັນການຢັ້ງຢືນ ແລະ ຫວນຄືນປະຫວັດສາດແຫ່ງການພົວພັນຮ່ວມມື ຂອງສອງກະຊວງ ກໍ່ຄືສອງກຳລັງ ນັບແຕ່ອະດີດມາເຖິງປະຈຸບັນ; ກະຊວງປ້ອງກັນຄວາມສະຫງົບລາວ ຈື່ງໄດ້ຈັດງານວາງສະແດງຮູບພາບການພົວພັນຮ່ວມມືຮອບດ້ານ ລະຫວ່າງສອງກະຊວງປ້ອງກັນຄວາມສະຫງົບ ຂື້ນຢ່າງເປັນທາງການ ແລະ ກິດຈະກຳນີ້ ກໍ່ແມ່ນກິດຈະກຳໜຶ່ງ ທີ່ນອນໃນຂະບວນການລວມຂອງສອງພັກ, ສອງລັດຖະບານ ໃນການສະເຫຼີມ ສະຫຼອງປີສາມັກຄີມິດຕະພາບ ລາວ-ຫວຽດນາມ ປີ 2022.

ການຈັດວາງສະແດງຮູບພາບການພົວພັນຮ່ວມມື ທີ່ເປັນມູນເຊື້ອ ຂອງສອງກຳລັງປ້ອງກັນຄວາມສະຫງົບ ລາວ-ຫວຽດນາມ  ໃນໂອກາດປີສາມັກຄີມິດຕະພາບຄັ້ງນີ້ ແມ່ນເປັນຄັ້ງທີ 2 ໂດຍຄັ້ງທີ 1 ແມ່ນຈັດຂຶ້ນໃນປີ 2017 ແລະ ການວາງສະແດງຮູບພາບຄັ້ງນີ້ ກໍ່ເພື່ອໃຫ້ ຮັບຮູ້ ແລະ ເຂົ້າໃຈຢ່າງຖືກຕ້ອງ, ເລິກເຊີ່ງ ກ່ຽວກັບຂະບວນວິວັດ ທີ່ເປັນປະຫວັດສາດອັນຍາວນານ ແຫ່ງສາຍສຳພັນມິດຕະພາບ, ຄວາມສາມັກຄີພິເສດ ແລະ ເພື່ອເດັດດ່ຽວຕໍ່ສູ້, ຕິີຖອຍທຸກຖ້ອຍທຳນອງ ແລະ ພຶດຕິກຳ ທີ່ບໍ່ຖືກຕ້ອງ; ການໃສ່ຮ້າຍປ້າຍສີໃນຮູບການຕ່າງໆ ຂອງບັນດາອິດທິກຳລັງປໍລະປັກ ແລະ ກຸ່ມຄົນບໍ່ດີ ທີ່ຫວັງທຳລາຍມິດຕະພາບ, ຄວາມສາມັກ ຄີອັນສວຍສົດງົດງາມດັ່ງກ່າວ; ເພື່ອພ້ອມກັນປົກປັກຮັກສາມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ເພື່ອປົກປັກຮັກສາໝາກຜົນຂອງການປະຕິວັດລາວ-ຫວຽດນາມ ໃຫ້ໝັ້ນຄົງຍາວນານຕະຫຼອດໄປ.

Off

Comments are closed.