30th Aug2022

ຮອງນາຍົກລັດຖະມົນຕີ ຕິດຕາມສະພາບນ້ຳຖ້ວມ ຢູ່ແຂວງອຸດົມໄຊ ພ້ອມມອບເຄື່ອງຊ່ວຍເຫລືອ

by Peaung Thanonkeo

ວັນທີ 29 ສິງຫາ 2022 ນີ້, ພົນເອກ ຈັນສະໝອນ ຈັນຍາລາດ ຮອງນາຍົກລັດຖະ ມົນຕີ, ລັດຖະມົນຕີກະຊວງປ້ອງກັນປະເທດ, ປະທານຄະນະກຳມະການຄຸ້ມຄອງໄພພິບັດຂັ້ນສູນກາງ ພ້ອມຄະນະໄດ້ ເດີນທາງໄປເຄື່ອນໄຫວຕິດຕາມສະພາບນ້ຳຖ້ວມ ຢູ່ແຂວງອຸດົມໄຊ ໂດຍມີ ທ່ານ ບຸນຄົງ ຫລ້າຈຽມພອນ ເຈົ້າແຂວງອຸດົມໄຊ ພ້ອມດ້ວຍການນຳຂອງແຂວງ ໃຫ້ການຕ້ອນຮັບ.

ທ່ານ ເຈົ້າແຂວງອຸດົມໄຊ ໄດ້ລາຍງານໃຫ້ຮູ້ວ່າ: ໃນວັນທີ 26 ສິງຫາ 2022 ພາຍຸລະດູຮ້ອນ (MA ON) ໄດ້ພັດເຂົ້າແຂວງອຸດົມໄຊ ເຮັດໃຫ້ເກີດມີຝົນຕົກໜັກຕິດຕໍ່ກັນຫລາຍຊົ່ວໂມງ ເຮັດໃຫ້ເກີດນ້ຳຖ້ວມໄຫລຊຸແຮງ ສ້າງຜົນເສຍຫາຍໃຫ້ແກ່ 4 ເມືອງຄື: ເມືອງໄຊ, ເມືອງນາໝໍ້, ເມືອງງາ ແລະ ເມືອງຫລາ, ສ້າງຄວາມເສຍຫາຍຢ່າງໜັກໜ່ວງ ໃຫ້ແກ່ປະຊາຊົນທີ່ອາໄສຢູ່ລຽບຕາມແຄມນໍ້າກໍ (ເມືອງໄຊ), ນໍ້າພາກ (ເມືອງຫລາ), ນໍ້າແຊ (ເມືອງນາໝໍ້), ນໍ້າຫ້ວຍຊານ (ເມືອງງາ) ແລະ ບັນດາຫ້ວຍຮ່ອງຕ່າງໆ ເຮັດໃຫ້ພື້ນຖານໂຄງລ່າງ, ຊີວິດ, ຊັບສິນ, ເຮືອນຊານບ້ານຊ່ອງ, ສັດລ້ຽງ, ເນື້ອທີ່ທໍາການຜະລິດ, ເສັ້ນທາງຄົມມະນາຄົມ, ໄຟຟ້າ, ນໍ້າປະປາ, ນໍ້າລິນ, ໂຮງຮຽນ, ໂຮງໝໍ, ການສື່ສານ ແລະ ອື່ນໆ ແມ່ນບໍ່ສາມາດນໍາໃຊ້ໄດ້. ຜົນກະທົບດັ່ງກ່າວສ້າງຄວາມຫຍຸ້ງຍາກ ໃຫ້ແກ່ປະຊາຊົນ ໂດຍສະເພາະເຂົ້າກິນ, ນໍ້າດື່ມ-ນໍ້າໃຊ້, ຢາປົວພະຍາດ, ທີ່ພັກອາໄສຊົ່ວຄາວ, ເຄື່ອງນຸ່ງຫົ່ມ ແລະ ອື່ນໆ.

ພາຍຫລັງເກີດເຫດໄພນ້ຳຖ້ວມ ຂະແໜງແຮງງານ ແລະ ສະຫວັດດີການສັງຄົມແຂວງ ກໍໄດ້ສົມ ທົບກັບພາກສ່ວນກ່ຽວຂ້ອງ ລົງເກັບກໍາຂໍ້ມູນຜົນກະທົບ ແລະ ຜົນເສຍຫາຍໃນ 4 ເມືອງ. ໃນນັ້ນ ມີບ້ານທີ່ໄດ້ຮັບຜົນກະທົບ ແລະ ເສຍຫາຍທັງໝົດ 25 ບ້ານ, ມີ 469 ຫລັງຄາເຮືອນ, ມີພົນລະເມືອງ 2.324 ຄົນ, ຍິງ 900 ຄົນ, ມີຜູ້ເສຍຊີວິດ 2 ຄົນ, ບາດເຈັບ 3 ຄົນ; ເຮືອນຖືກຜົນກະທົບ ຈໍານວນ 66 ຫລັງ ໃນນັ້ນ, ເຮືອນຖືກນໍ້າພັດຊຸໄຫລ ຈໍານວນ 58 ຫລັງ, ດິນເຊາະເຈື່ອນ 2 ຫລັງ ແລະ ເລົ້າເຂົ້າ 23 ຫລັງ. ນອກນີ້ ຍັງມີເສົາໄຟຟ້າເສຍຫາຍ ຈໍານວນ 301 ຕົ້ນ, , ດອກກັນໄຟເສຍຫາຍ 327 ດອກ ແລະ ສາຍໄຟຟ້າເສຍຫາຍ 24.900 ແມັດ; ຂະນະທີ່ ນໍ້າຖ້ວມອັ່ງຖະໜົນຫົນທາງມີຫລາຍຈຸດ, ເສັ້ນທາງເລກທີ 2E ເມືອງໄຊ ຫາ ເມືອງຫລາ ລະຫວ່າງກິໂລແມັດ 15-24 ຖຶກຕັດຂາດ 4 ຈຸດ, ຂົວຖືກຕັດຂາດ 4 ແຫ່ງ, ເປເພ່ 3 ແຫ່ງ, ດິນເຈື່ອນຖົມທາງ 15 ຈຸດ ແລະ ເສັ້ນທາງຊົນນະບົດເປ່ເພ ແລະ ຂົວຖືກຕັດຂາດ 11 ແຫ່ງ; ເຄື່ອງວັດແທກລະດັບນໍ້າແບບອັດຕະໂນມັດຈຸດວັດແທກຂົວນໍ້າກໍ ບ້ານກໍນ້ອຍເມືອງໄຊ ໄດ້ຮັບຜົນກະທົບ ແລະ ເສຍຫາຍທັງໝົດ ມູນຄ່າ 65 ລ້ານກີບ, ຫລາວັດແທກລະດັບນໍ້າກໍ ຈຸດວັດແທກບ້ານໂຮມໄຊ, ຈຸດວັດ ແທກຂົວນໍ້າກໍ 2 ບ້ານເຈງ, ຈຸດວັດແທກບ້ານຫ້ວຍຂຸມ ໄດ້ຮັບຜົນກະທົບ ແລະ ເສຍຫາຍ ລວມມູນຄ່າ 79 ລ້ານກີບ; ໂຮງຮຽນປະຖົມຖືກຜົນກະທົບ(ນໍ້າຖ້ວມ) ຈໍານວນ 5 ແຫ່ງ, ລະບົບນໍ້າລິນເປ່ເພ 7 ຈຸດ, ເນື້ອທີ່ທໍາການຜະລິດເສຍຫາຍ 35 ເຮັກຕາ ໃນນັ້ນເນື້ອທີ່ນາ ເສຍຫາຍ 20 ເຮັກຕາ, ເຂົ້າເນີນສູງ 8 ເຮັກຕາ ແລະ ເນື້ອທີ່ສວນ 7 ເຮັກຕາ.

ສໍາລັບມູນຄ່າເສຍຫາຍຢູ່ ເມືອງນາໝໍ້ ໃນເບື້ອງຕົ້ນ 6,2 ຕື້ກວ່າກີບ, ສ່ວນເມືອງອື່ນໆແມ່ນຍັງບໍ່ທັນໄດ້ປະເມີນມູນຄ່າເສຍຫາຍ. ປັດຈຸບັນຄະນະກໍາມະການຄຸ້ມຄອງໄພພິບັດແຕ່ລະຂັ້ນ ຍັງສືບຕໍ່ເກັບກໍາຂໍ້ມູນຜົນເສຍຫາຍຕື່ມອີກ.

ຕໍ່ກັບເຫດການດັ່ງກ່າວ  ຄະນະກໍາມະການຄຸ້ມຄອງໄພພິບັດຂັ້ນແຂວງ ໄດ້ຊຸກຍູ້ບັນດາຄະນະກໍາມະການຄຸ້ມຄອງໄພພິບັດ ແລະ ພາກສ່ວນຕ່າງໆໃນການຕອບໂຕ້ເຫດການສຸກເສີນໄພພິບັດຢູ່ໃນ 4 ເມືອງ ໂດຍການລະດົມກໍາລັງພົນຈາກກອງບັນຊາການ ປກສ, ປກຊ ແລະ ຊາວໜຸ່ມຕະລຸມບອນ ໃນການຊ່ວຍເຫລືອຂົນຍ້າຍປະຊາຊົນ, ເຄື່ອງຂອງຄົວເຮືອນ ແລະ ອະນາໄມເຮືອນຊານບ້ານຊ່ອງຂອງປະຊາຊົນໃນ 3 ເມືອງຄື: ເມືອງໄຊ, ເມືອງຫລາ ແລະ ເມືອງນາໝໍ້, ຄົ້ນຫາຜູ້ສູນຫາຍ, ສັນນະສູດຊາກສົບຜູ້ເສຍຊີວິດຢູ່ເມືອງຫລາ. ສໍາລັບເມືອງງາ ແມ່ນເສຍຫາຍແຕ່ເນື້ອທີ່ທໍາການຜະລິດ ເຊິ່ງໄດ້ນໍາເອົາເຄື່ອງອຸປະໂພກ-ບໍລິໂພກໄປຊ່ວຍເຫລືອສຸກເສີນ ເປັນຕົ້ນ ແມ່ນເຂົ້າສານໜຽວ ຈໍານວນ 105 ກິໂລ, ໝີ່ຈໍານວນ 7 ແກັດ, ນໍ້າດື່ມ 400 ແພັກ, ເຄື່ອງບໍລິໂພກແບບປະສົມ ຈໍານວນ 7 ເປົາ ແລະ ເກືອ ຈໍານວນ 12 ຖົງ ຊ່ວຍເຫລືອໃຫ້ແກ່ 7 ຫລັງຄາເຮືອນ; ບັນດາຂະແໜງການຕ່າງໆ ໄດ້ສຸມໃສ່ແກ້ໄຂສຸກເສີນເປັນຕົ້ນ ແມ່ນຖະໜົນຫົນທາງ, ສ້ອມແປງລະບົບໄຟຟ້າ, ນໍ້າປະປາ, ນໍ້າລິນ, ສ້ອມແປງລະບົບການສື່ສານ ແລະ ອື່ນໆ.

ໂອກາດນີ້, ພົນເອກຈັນສະໝອນຈັນຍາລາດ ຮອງນາຍົກລັດຖະມົນຕີ ກະຊວງປ້ອງກັນປະເທດ ໄດ້ສະແດງຄວາມເປັນຫ່ວງເປັນໃຍ ຕໍ່ປະຊາຊົນຊາວແຂວງອຸດົມໄຊ ໂດຍສະເພາະແມ່ນຜູ້ທີ່ໄດ້ຮັບຜົນກະທົບ ຈາກເຫດການນ້ຳຖ້ວມໃນຄັ້ງນີ້, ພ້ອມທັງສະ ແດງຄວາມຊົມເຊີຍຕໍ່ອົງການປົກຄອງທຸກຂັ້ນ ທີ່ໄດ້ສຸມທຸກກຳລັງໃຫ້ການຊ່ວຍເຫລືອ ບັນດາຄອບຄົວທີ່ໄດ້ເສຍຫາຍ. ທ່ານຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນປະເທດ ໄດ້ຕາງໜ້າຄະນະກຳມະການຄຸ້ມຄອງໄພພິບັດຂັ້ນສູນກາງ ນຳເອົາເຂົ້າສານໜຽວຈຳນວນ 20 ໂຕນ, ສັງກະສີຈຳນວນ 2.000 ແຜ່ນ, ເຫລັກຕະປູຈຳນວນ 500 ກັບ ແລະ ເງິນກອງທຶນນ້ຳມັນຈຳນວນ 200 ລ້ານກີບ ລວມມູນຄ່າ 462 ລ້ານກວ່າກີບ ມອບໃຫ້ແຂວງອຸດົມໄຊ ແລະ ຕາງໜ້າໃຫ້ແກ່ກະຊວງປ້ອງກັນປະເທດ ມອບເງິນສົດຈຳນວນ 200 ລ້ານກີບ ເພື່ອຊ່ວຍເຫລືອໃຫ້ແກ່ປະຊາຊົນ ທີ່ປະສົບໄພພິບັດຢູ່ແຂວງອຸດົມໄຊໃນຄັ້ງນີ້ດ້ວຍ.

ໃນການມາ ເຄື່ອນໄຫວຕິດຕາມສະພາບນ້ຳຖ້ວມຢູ່ແຂວງອຸດົມໄຊຄັ້ງນີ້, ທ່ານ ຮອງນາຍົກ ລັດຖະມົນຕີ, ລັດຖະມົນຕີກະຊວງປ້ອງກັນປະເທດ ພ້ອມຄະນະ ຍັງໄດ້ລົງກວດກາເບິ່ງ ສະພາບພື້ນທີ່ເກີດໄພພິບັດ ຢູ່ບ້ານສາມັກຄີໄຊ, ບ້ານໂພນໄຊ ແລະ ບ້ານຫ້ວຍຫລາ ເມືອງຫລາ ຕື່ມອີກ.

Off

Comments are closed.