31st Aug2022

ກອງປະຊຸມເຜີຍແຜ່ຜົນສຳເລັດກອງປະຊຸມ ສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງຫົວພັນ ຊຸດທີ II

by somda phoneor

ກອງປະຊຸມ ເຜີຍແຜ່ຜົນສຳເລັດກອງປະຊຸມ ສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງຫົວພັນ ຊຸດທີ II ໄດ້ຈັດຂື້ນໃນວັນທີ 30 ສິງຫາ 2022 ຢູ່ທີ່ຫໍວັດທະນາທຳ ແຂວງຫົວພັນ ເປັນກຽດເຜີຍແຜ່ເອກະສານໃນຄັ້ງນີ້ ໂດຍ ທ່ານ ຄອນປະພັນ ເລືອງສີຈັນທອງ ຮອງປະທານສະພາປະຊາຊົນແຂວງຫົວພັນ ພ້ອມດ້ວຍທີມງານ ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 8 ແລະ ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງຊຳເໜືອ ເປັນກຽດເຂົ້າຮ່ວມຮັບຟັງ ມີບັນດາທ່ານການນຳແຂວງ, ການນຳເມືອງ, ຫົວໜ້າ, ຮອງຫົວໜ້າພະແນກການ, ພະນັກງານ-ລັດຖະກອນ, ທະຫານ, ຕຳຫຼວດ, ບັນດາລັດວິສາຫະກິດ, ສາຂາທະນາຄານ, ອຳນາດການປົກຄອງບ້ານ ຕະຫລອດຮອດປະຊາຊົນ ອ້ອມຂ້າງເທດສະບານ ເມືອງຊຳເໜືອ ເຂົ້າຮ່ວມ ການເຜີຍແຜ່ໃນຄັ້ງນີ້ໄດ້ຍົກໃຫ້ເຫັນຜົນສຳເລັດຂອງ ກອງປະຊຸມສະໄຫມສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງຫົວພັນຊຸດທີ 2 ໃນບັນຍາກາດທີ່ທົ່ວ ພັກ-ລັດ ແລະ ປວງຊົນລາວທັງຊາດສຸມໃສ່ຈັດຕັ້ງປະຕິບັດ 2 ວາລະແຫ່ງຊາດ ຄື: ວາລະແຫ່ງຊາດ ວ່າດ້ວຍ ການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ວາລະແຫ່ງຊາດ ວ່າດ້ວຍການແກ້ໄຂບັນຫາ ຢາເສບຕິດ ຢ່າງເປັນຂະບວນຟົດຟື້ນ ທັງເປັນໄລຍະທີ່ລັດຖະບານໄດ້ມີມາດຕະການແກ້ໄຂບັນຫາການເໜັງຕີງ ຂອງລາຄານ້ໍາມັນເຊື້ອໄຟ, ລາຄາສິນຄ້າ, ອັດຕາແລກປ່ຽນ ແລະ ຄວາມຫຍຸ້ງຍາກອື່ນໆ ໃຫ້ມີຄວາມຜ່ອນຄາຍ ລົງ, ສ່ອງແສງໃຫ້ເຫັນເຖິງຄວາມຕັດສິນໃຈ ແລະ ຄວາມຮັບຜິດຊອບສູງ ຂອງບັນດາອົງການຈັດຕັ້ງ ພັກ-ລັດ ໃນການຮ່ວມກັນແກ້ໄຂບັນຫາທີ່ຫຍຸ້ງຍາກຂອງປະເທດ.

ກອງປະຊຸມໄດ້ຮັບຟັງການສະຫຼຸບສັງລວມວຽກງານ ລັດຖະບານ ຂອງທ່ານ ນາຍົກລັດຖະມົນຕີ ຕໍ່ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ແລະ ແຜນເງິນຕາ 6 ເດືອນຕົ້ນປີ 2022 ກໍ່ຄື ການຈັດຕັ້ງປະຕິບັດ 2 ວາລະແຫ່ງຊາດ ທີ່ສະພາແຫ່ງຊາດ ໄດ້ຮັບຮອງ ມີຄວາມຄືບຫນ້າເປັນຢ່າງດີ ເຊິ່ງສາມາດບັນລຸຄາດຫມາຍທາງດ້ານເສດຖະກິດມະຫາພາກຈໍານວນຫນຶ່ງ, ເຮັດໃຫ້ປະເທດຊາດສືບຕໍ່ມີສະຖຽນລະພາບທາງດ້ານການເມືອງ,ສັງຄົມມີຄວາມສະຫງົບໂດຍພື້ນຖານ, ເສດຖະກິດສືບຕໍ່ມີການຂະຫຍາຍຕົວ, ຊີວິດການເປັນຢູ່ຂອງປະຊາ ຊົນບັນດາເຜົ່າ ໄດ້ຮັບການຍົກສູງຂຶ້ນເປັນກ້າວໆ, ນອກນັ້ນຍັງໄດ້ຮັບຟັງການຊີ້ແຈງຕໍ່ບັນຫາທີ່ພົ້ນເດັ່ນ ຈາກບັນດາກະຊວງທີ່ກ່ຽວຂ້ອງອີກດ້ວຍ.

 

Off

Comments are closed.