02nd Feb2016

ບົ່ງຕົວແຕ່ງຕັ້ງເລຂາຄະນະພັກ ວຕປ ຜູ້ໃຫມ່

by somchan

ວິທະຍາຄານຕຳຫຼວດປະຊາຊົນ (ວຕປ) ກະຊວງ ປກສ ໄດ້ຈັດພິທີປະກາດບົ່ງຕົວແຕ່ງຕັ້ງ ເລຂາຄະນະພັກຜູ້ໃຫມ່ຂຶ້້ນ ໃນວັນທີ 29 ມັງກອນ 2016 ເພື່ອສືບຕໍ່ຊີ້ນຳ-ນຳພາ ວຽກງານພັກ-ວຽກງານວິຊາສະເພາະ ໃຫ້ໄດ້ຮັບໝາກຜົນໃນຕໍ່ໜ້າ, ໃຫ້ກຽດເຂົ້າຮ່ວມຂອງ ພົນຕີ ກົງທອງ ພົງວິຈິດ ຮອງເລຂາຄະນະພັກ ລັດຖະມົນຕີຊ່ວຍວ່າການກະຊວງ ປກສ ມີບັນດາຄະນະພັກ-ຄະນະນຳ ພ້ອມດ້ວຍແຂກ ແລະ ພະນັກງານ-ນັກຮົບພາຍໃນ ວຕປ ເຂົ້າຮ່ວມ.

ພັອ ສຸດສະສົມ ບຸນນະສິງ ຫົວໜ້າກົມກໍ່ສ້າງພັກ ກົມໃຫຍ່ການເມືອງ ປກສ ຂຶ້ນຜ່ານມະຕິຕົກລົງຂອງຄະນະພັກກະຊວງ ປກສ ວ່າດ້ວຍການບົ່ງຕົວແຕ່ງຕັ້ງເລຂາຄະນະພັກວິທະຍາຄານຕຳຫຼວດປະຊາຊົນ ອີງຕາມການປັບປຸງກົງຈັກການຈັດຕັ້ງຂອງ ວຕປ ເຊິ່ງຄະນະພັກກະຊວງ ປກສ ຕົກລົງແຕ່ງຕັ້ງ ພົຈວ ບຸນຊູ ນາມມະຈັກ ເປັນເລຂາຄະນະພັກ ວຕປ ຜູ້ໃໝ່, ພ້ອມທັງ, ຜ່ານດຳລັດຂອງນາຍົກລັດຖະມົນຕີວ່າດ້ວຍການອະນຸມັດໃຫ້ນາຍຕຳຫຼວດພັກຜ່ອນ-ຮັບເບ້ຍບຳນານ ເຊິ່ງດຳລັດດັ່ງກ່າວໄດ້ຕົກລົງອະນຸມັດໃຫ້ ພັອ ບຸນກອງ ພຸດທະຈັກ ຮອງອຳນວຍການ ວຕປ ອອກພັກຜ່ອນ-ຮັບເບ້ຍບຳນານ ພ້ອມທັງປະຕິບັດນະໂຍບາຍທາງດ້ານວັດຖຸ ແລະ ຈິດໃຈຕາມນະໂຍບາຍຂອງກະຊວງ ປກສ.

ໂອກາດດຽວກັນ, ພົນຕີ ກົງທອງ ພົງວິຈິດ ລັດຖະມົນຕີຊ່ວຍວ່າການກະຊວງ ປກສ ໄດ້ເນັ້ນໜັກໃຫ້ຜູທີ່ໄດ້ຮັບການບົ່ງຕົວແຕ່ງຄັ້ງນີ້ ຈົ່ງເພີ່ມທະວີໃນການຄົ້ນຄວ້າຮ່ຳຮຽນທິດສະດີ ແລະ ພຶດຕິກຳການນຳພາ-ຄຸ້ຄອງພັກ-ລັດເພື່ອປັບປຸງຕົນເອງ ໃຫ້ມີຄວາມໜັກແໜ້ນເຂັ້ມແຂງ, ເອົາໃຈໃສ່ໃນການຄຸ້ມຄອງ-ບັນຊາຢ່າງມີວິໄສທັດ ໃນການຄົ້ນຄວ້າພິຈາລະນາແກ້ໄຂບັນຫາຢ່າງເຂັ້ມງວດ ພ້ອມທັງເປັນແບບນຳໜ້າ, ນຳພາບັນຊາ ແລະ ກວດກາໃຫ້ແທດເຖິງຮາກຖານຕົວຈິງ ແລະ ຕັ້ງໜ້າເຕົ້າໂຮມຄວາມສາມັກຄີໃນຄະນະ ແລະ ບັນດາພະນັກງານຢູ່ແຕ່ລະເຫຼົ່າວິຊາການໃຫ້ກາຍເປັນປຶກແຜນ, ສາມັກຄີ ແລະ ຍາດແຍ່ງການຊ່ວຍເຫຼືອຈາກສາກົນໃຫ້ກວ້າງຂວາງ ເພື່ອເຮດໃຫ້ວຽກງານຮັກສາຄວາມສະຫງົບ, ມີຄວາມເປັນລະບຽບຮຽບຮ້ອຍ ໂດຍສະເພາະແມ່ນວຽກງານປັບປຸງ-ບຳລຸງ ແລະ ກໍ່ສ້າງໃຫ້ກຳລັງ ປກສ ມີຄວາມຮູ້ຄວາມສາມາດ ເພື່ອຕອບສະໜອງຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລະຍະໃໝ່.

 

Off

Comments are closed.