02nd Sep2022

ພິທີປະກາດການນຳຂັ້ນສູງ ກະຊວງ ປກສ ພັກການ-ຮັບອຸດໜູນບຳນານ

by Peaung Thanonkeo

ກະຊວງປ້ອງກັນຄວາມສະຫງົບໄດ້ຈັດພິທີ ປະກາດການນຳຂັ້ນສູງ ພັກການ-ຮັບອຸດໜູນບຳນານ ຈຳນວນ 8 ທ່ານ. ໃນວັນທີ 2 ກັນຍາ 2022 ນີ້, ໂດຍການເປັນກຽດເຂົ້າຮ່ວມຂອງ ພົທ ກົງທອງ ພົງວິຈິດ ຮອງລັດຖະມົນຕີກະຊວງປ້ອງກັນຄວາມສະຫງົບ, ມີຄະນະພັກ-ຄະນະນຳ, ພະນັກງານຫຼັກແຫຼ່ງ ແລະ ຜູ້ທີ່ໄດ້ຮັບອຸດໜູນບຳນານເຂົ້າຮ່ວມ.

ພົຈວ ປອ ສຸວັນນີ ສີສຸພາບມີໄຊ ຮອງຫົວໜ້າກົມໃຫຍ່ການເມືອງປ້ອງກັນຄວາມສະຫງົບ ໄດ້ຜ່ານດຳລັດຂອງນາຍົກລັດຖະມົນຕີ ແລະ ຂໍ້ຕົກລົງ ຂອງລັດຖະມົນຕີ ກະຊວງປ້ອງກັນຄວາມສະຫງົບ ວ່າດ້ວຍການອະນຸມັດໃຫ້ນາຍຕຳຫຼວດພັກການ-ຮັບອຸດໜູນບຳນານ ຈຳນວນ 8 ທ່ານ ໃນນັ້ນມີ ພົຈວ ທອງເຄນ ບຸນໝັ້ນ ຫົວໜ້າກອງບັນຊາການ ປກສ ແຂວງວຽງຈັນ, ພົຈວ ສົມຈັນ ແກ້ວຈັນດາ ຫົວໜ້າກອງບັນຊາການ ປກສ ແຂວງ ຫຼວງພະບາງ, ພົຈວ ສົມໄຊ ຈັນທະວົງ ຫົວໜ້າກອງບັນຊາການ ປກສ ແຂວງ ຫຼວງນ້ຳທາ, ພັອ ບຸນສີ ທຳມະລັງສີ ຮອງຫົວໜ້າຫ້ອງການເມືອງ ກົມໃຫຍ່ການເມືອງປ້ອງກັນຄວາມສະຫງົບ, ພັອ ພົມມາ ທອງດາວັນ ຮອງຫົວໜ້າຫ້ອງກຳມະການ ກົມໃຫຍ່ການເມືອງປ້ອງກັນຄວາມສະຫງົບ, ພັອ ຄຳພັດ ພົມພິພັກ ຮອງຫົວໜ້າກອງບັນຊາການ ປກສ ແຂວງ ຫຼວງນ້ຳທາ, ພັອ ກາຍຍະສອນ ສິງວິໄຊ ຮອງຫົວໜ້າກອງບັນຊາການ ປກສ ແຂວງບໍ່ແກ້ວ ແລະ ພັອ ໂອລົມ ອິນທະວົງ ຮອງຫົວໜ້າກອງບັນຊາການ ປກສ ແຂວງ ໄຊສົມບູນ.

ໂອກາດດັ່ງກ່າວ ພົທ ກົງທອງ ພົງວິຈິດ ຮອງລັດຖະມົນຕີ ກະຊວງປ້ອງກັນຄວາມສະຫງົບ ໄດ້ມີຄຳເຫັນໂອ້ລົມ ແລະ ຍ້ອງຍໍຊົມເຊີຍຕໍ່ຜົນງານຂອງບັນດາສະຫາຍທີ່ໄດ້ຮັບອຸດໜູນບຳນານຄັ້ງນີ້, ໃນໄລຍະຜ່ານມາບັນດາສະຫາຍໄດ້ທຸ້ມເທເຫື່ອແຮງສະຕິປັນຍາ ເຂົ້າໃນໜ້າທີ່ວຽກງານວິຊາສະເພາະທີ່ການຈັດຕັ້ງມອບໝາຍໃຫ້ ຍາດໄດ້ຜົນງານດີເດັ່ນປະກອບສ່ວນເຂົ້າໃນການປະຕິວັດ ໃນແຕ່ລະໄລຍະຢ່າງສຸດກົກສຸດປາຍ ສະແດງເຖິງຄຸນງາມຄວາມດີ ມີນ້ຳໃຈພິລະອາດຫານ, ຄວາມເດັດດ່ຽວ, ຄວາມເສຍສະຫຼະອັນສູງສົ່ງ ທີ່ໄດ້ສ້າງສາພັດທະນາປະເທດຊາດເວົ້າລວມ, ເວົ້າສະເພາະແມ່ນພາລະກິດປົກປັກຮັກສາຄວາມສະຫງົບ, ຄວາມເປັນລະບຽບຮຽບຮ້ອຍຂອງສັງຄົມ. ພ້ອມທັງໃຫ້ສືບຕໍ່ເສີມຂະຫຍາຍບົດບາດ, ເປັນແບບຢ່າງໃນການປົກປັກຮັກສາອຸດົມການປະຕິວັດຂອງພັກ-ລັດ ແລະ ໝາກຜົນຂອງການປະຕິວັດ, ເປັນເຈົ້າການເຕົ້າໂຮມຄວາມສາມັກຄີພາຍໃນ ໃຫ້ມີຄວາມໜັກແໜ້ນເຂັ້ມແຂງ, ຖ່າຍທອດມູນເຊື້ອປະຕິວັດ ແລະ ເປັນແວ່ນແຍງໃຫ້ລູກຫຼານໄດ້ສືບທອດເອົາມູນເຊື້ອທີ່ດີ, ສົມທົບກັບອຳນາດການປົກຄອງບ້ານ ແລະ ປະກອບສ່ວນສຳຄັນຕ່າງໆເຂົ້າໃນບ້ານເພື່ອສືບຕໍ່ວຽກງານປະຕິວັດປົກປັກຮັກສາ ແລະ ສ້າງສາພັດທະນາປະເທດຊາດກໍຄືພັດທະນາບ້ານ ແລະ ປົກປັກຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍ.

Off

Comments are closed.